Tim jo-Lawi 7 - MUMA MALER 2015

¹ Ma e chik mar misango mipwodhogo ketho mar gowi. En gima ler moloyo.

² Chiach misango mipwodhogo ketho mar gowi nyaka yang’ mana kama iyang’oe jamni mitimogo misengni miwang’o pep, kendo rembe nyaka kir e bethe duto mag kendo-mar-misango.

³ Jadolo nokaw bochene duto, kaka sembe gi boche moumo jambich,

⁴ kod nyiroke kaachiel gi boche mogawogi man but oguro kod jwala mabor manie wi chuny kod nyiroke. Enochiwgi

⁵ kowang’ogi e kendo-mar-misango mondo obed misango miwang’o ni Ruoth Nyasaye. En misango mipwodhogo ketho mar gowi.

⁶ Ng’ato ka ng’ato ma dichwo ma jaodgi jodolo nyalo chame, to nyaka chame kama owal ni Ruoth Nyasaye, nikech en gima ler moloyo.

⁷ Nitie chik achiel moriwo misango mar golo richo kod misango mipwodhogo ketho mar gowi. Misengnigo nodong’ ni jadolo motimogi, kopwodhogo richo.

⁸ Jadolo motimo misango miwang’o gi chiayo ma ng’ato ochiwo, nodong’ gi pien chiayono.

⁹ Bende misango ka misango mar cham motedi e kendo, kata mochiel e sufuria kata e tawo, nodong’ ni jadolo matime.

¹⁰ To misengni mamoko duto mag cham, moruw gi mo kata ma ok oruw gi mo, joka Harun duto nopogre maromre.

¹¹ Chik mar misango mar sawo michiwo ni Ruoth Nyasaye ema:

¹² Ka ng’ato ochiwe ka gir erokamano, to nyaka omedie makati ma ok oketie thowi, moted gi mo, gi chapat maonge thowi mowirie mo, kod kek matindotindo moted gi mogo mayom, modwal gi mo.

¹³ To bende nyaka medie makati moketie thowi.

¹⁴ To kek achiel kuom misango ka misango nyaka yiegi e nyim Ruoth Nyasaye. Enodong’ ni jadolo ma kiro remb misango mar sawo e kendo mar misango.

¹⁵ Ring misango mar sawo nyaka cham chieng’ mochiwee. Ok nowe kata matin nindi nyaka okinyi.

¹⁶ To ka ng’ato otimo misango mochopogo kuong’ruok, kata ma otimo atima kuom herone, to jodolo nyaka chame chieng’ mochiweno kod kinyne.

¹⁷ To ka ring’o moko odong’ nyaka chieng’ mar adek, to nyaka wang’ie e mach.

¹⁸ Ka ring misango mar sawo ocham nyaka chieng’ mar adek, to Nyasaye ok noyie gi ng’at mochiweno, kata misango bende ok nochiw ka gima ber, to enobed gima kwero, kendo ng’at mochame nobed jaketho.

¹⁹ Ring’o aring’a ma ogere kuom gima ogak ok nocham, to nyaka wang’e gi mach. Ng’ato ang’ata ma ok ogak nyalo chamo ring’o,

²⁰ to ng’at mogak kochamo ring misango mar sawo mochiw ni Ruoth Nyasaye, to nong’ad kare oko kuom ogandagi.

²¹ Ka ng’ato ogere kuom gimoro mogak, bed ni en dhano kata le, kata gimoro amora makuero, to bang’e ochamo ring misango mar sawo mochiw ni Ruoth Nyasaye, to nong’ad kare oko kuom ogandagi.

²² Ruoth Nyasaye nowacho ni Musa

²³ ni mondo onyis jo-Israel kama: Kik ucham bor chiayo moro amora.

²⁴ Bor chiayo motho athoya kende kata ma ondiek onego unyalo konyorugo e tich moro, to kik uchame.

²⁵ Ng’ato ang’ata mochamo bor chiayo ma lembe moko nono osetimgo misango miwang’o ni Ruoth Nyasaye, nyaka ng’ad kare oko kuom ogandagi.

²⁶ Kik ucham remo moro amora, bed ni en mar winyo kata mar le, kamoro amora mudakie.

²⁷ Ng’ato ang’ata mochamo remo nong’ad kare oko kuom ogandagi.

²⁸ Ruoth Nyasaye nowacho ni Musa

²⁹ ni mondo onyis jo-Israel kama: “Ng’ato ang’ata mobiro mondo otim misango mar sawo nyaka pog lemo moko obed misango michiwo ni Ruoth Nyasaye.

³⁰ En owuon nokel ni Ruoth Nyasaye boche miwang’o gi mach, kod agoko ma iyiego e nyim Ruoth Nyasaye.

³¹ Jadolo nowang’ bochego e kendo-mar-misango, to agoko nodong’ ni Harun gi yawuote.

³² Bende unumi jadolo em ma korachwich mar chiayo ka chiayo motimgo misango mar sawo.

³³ Jaka Harun machiwo remo kod boche mag misango mar sawo ema nokaw emno.

³⁴ Agoko kod em mag chiayo ka chiayo ma jo-Israel timogo misengni mag sawo, amiyo Harun jadolo kod yawuote mondo obed mich moyiedhi migolo kuom jo-Israel nyaka chieng’.

³⁵ Mano en lemo momi Harun gi yawuote kuom misengni miwang’o, chakre chieng’ mane oketgie jodolo mag Ruoth Nyasaye.

³⁶ Chieng’ mane owirgieno, Ruoth Nyasaye nogolo chik ni, jo-Israell nyaka mi jodolo migepego. Mano en chik momako jo-Israel nyaka chieng’.

³⁷ “Mago e chike mag misango miwang’o pep, gi mag misango mar cham, gi mag misango mar golo richo, gi mag misango mipwodhogo ketho mar gowi, gi mag misengni mitimo chieng’ miketo jadolo e tich, kod mag misengni mag sawo.

³⁸ Ruoth Nyasaye nomiyo Musa chikego e got Sinai chieng’ mane ochikoe jo-Israel mondo ochiwni Ruoth Nyasaye misengni maggi, ka gin e thim Sinai.”