Tim jo-Lawi 5 - MUMA MALER 2015

¹ Ka omi ng’ato okuong’ore mondo ohul gima oseneno kata mosewinjo, to otamore hulo, en bende odoko jaketho, kendo nyaka ochul.

² Ka ng’ato omulo gimoro makuero, kaka le makuero motho, bed ni en le maoko kata mopidhi, kata gima mol motho,

³ kata ka ogere kuom gimoro amora makuero moa kuom dhano, ka ok ong’eyo, mi ofwenyo achien, to enodok jaketho.

⁴ Kata ka ng’ato omwomore, mokuong’ore ka ok ong’eyo, mondo otim gima rach kata gima ber e wach moro ma ji thoro mwomoree kakuong’ore, mi ofwenyo achien, to enodok jaketho.

⁵ Ka achiel kuom buchegi omako ng’ato, mi ohulo kaka oseketho,

⁶ to nyaka okel ni Ruoth Nyasaye chiayo madhako, ma rombo kata diel, kuom ketho mosetimono mondo otimgo misango mar golo richo. Eka jadolo nopwodhnego kethoneno, mi nowene.

⁷ Ka ng’ato odhier ma ok onyal yudo kata mana chiayo moro matin, to enokel ni Ruoth Nyasaye akuch odugla ariyo, kata nyithi akuru ariyo, kuom richo mosetimono. Akuru achiel notimgo misango mar golo richo, to machielo notimgo misango miwang’o pep.

⁸ Enokel ni jadolo winygo, kendo nokuong ochiw winyo monego timgo misango mar golo richo, mi jadolo nomin wiye, to ok nochod chuth.

⁹ Enokir remb winyono moko e kor kendo-mar-misango, to remo modong’ nyaka bi, mi chuer e tiend kendono. En misango mar golo richo.

¹⁰ Winyo machielo, to notimgo misango miwang’o pep, kaka chik dwaro. Kamano e kaka jadolo nopwodhnigo ng’atno kethone, mi nowene.

¹¹ Ka ng’ato ok nyal kata mana chiwo akuch odugla ariyo kata nyithi akuru ariyo kuom richone, to nyaka ochiw kilo ang’wen mag mogo mayom mondo otimgo misango mar golo richo. To kik oolie mo, kata kik oketie ubani, nikech en misango mar golo richo.

¹² Enokel ni jadolo mogono, mi jadolo nojuk sanja ka rapar, mondo owang’ e kendo-mar-misango ewi misengni miwang’o ni Ruoth Nyasaye.

¹³ Kamano e kaka jadolo nopwodh ni ng’atno ketho mosetimo kuom chikego, mi nowene.

Misango mipwodhogo ketho mar gowi

¹⁴ Ruoth Nyasaye nowacho ni Musa niya:

¹⁵ Ka ng’ato oboth, moketho, mi ok ochiwo gima onego ochiw ni Ruoth Nyasaye, to nyaka okelni Ruoth Nyasaye im maonge songa, mondo otimgo misango mipwodhogo ketho mar gowi. Nengo imno nyaka pim gi shekel mar fedha mitiyogo e tich Nyasaye. En misango mar golo ketho.

¹⁶ Bende nyaka ochul nengo mar gima ne ok ochiwo ni Ruoth Nyasaye, komedoe achiel kuom abich mar nengono. Enochiwe ni jadolo, mi jadolo nokaw imno, kendo notimgo misango mipwodhogo ketho mar gowi, mi ketho ng’atno nowene.

¹⁷ Ka ng’ato oketho, motimo gima Ruoth Nyasaye okwero, bed ni ok ong’eyo ni osetimo kamano, to pod en mana jaketho.

¹⁸ Nyaka okel ni jadolo im maonge songa, mondo otimgo misango mipwodhogo ketho mar gowi, kendo jadolo nopwodhnego ketho mosetimo kokia, mi nowene.

¹⁹ En misango mipwodhogo ketho mar gowi, nikech ng’atno oseketho mobedo gi gowi e nyim Ruoth Nyasaye.