Tim jo-Lawi 3 - MUMA MALER 2015

Misengni mag sawo

¹ Ka ng’ato chiwo rwath kata dwasi mondo otimgo ni Ruoth Nyasaye misango mar sawo, to nyaka obed mana dhiang’ ma onge songa.

² Ng’atno nyaka ket lwete ewi dheno, kendo oyang’e e dho Hemb Romo. Jodolo ma joka Harun nokaw remo, kendo nokir e bethe duto mag kendo-mar-misango.

³ Achiel kuom jodologo nyaka kaw boche duto mag jambich,

⁴ gi nyiroke gi boche mogawogi man but oguro, kod jwala mabor man ewi chuny gi nyiroke, mi owang’gi ni Ruoth Nyasaye ka misango miwang’o pep.

⁵ Joka Harun nowang’gi e kendo-mar-misango ewi misango miwang’o pep man e yien moket e mach mondo obed misango miwang’o madum mamit ni Ruoth Nyasaye.

⁶ Ka ng’ato chiwo diel kata rombo mondo otimgo ni Ruoth Nyasaye misango mar sawo, to nyaka obed ma dichwo kata ma dhako maonge songa.

⁷ Ka im ema otimogo misango, to nyaka okele e nyim Ruoth Nyasaye,

⁸ mi oket lwete e wiye, kendo oyang’e e nyim Hemb Romo. Eka joka Harun nokaw remo, kendo nokir e bethe duto mag kendo-mar-misango.

⁹ Bang’ mano, ng’atno nyaka pog boche duto kaka sembe mong’ad gie lihumblu, gi boche mag jambich,

¹⁰ kod nyiroke kaachiel gi boche mogawogi man but oguro kod jwala mabor man ewi chuny gi nyiroke, mondo obed misango miwang’o ni Ruoth Nyasaye.

¹¹ Jadolo nowang’ mago duto e kendo-mar-misango ka chiemo michiwo ni Ruoth Nyasaye.

¹² Ka chiwo ma otimogo misangono en diel, to nyaka ochiwe e nyim Ruoth Nyasaye,

¹³ mi oket lwete ewi chiayono, kendo oyang’e e nyim Hemb Romo. Eka joka Harun nokaw remo, kendo nokir e bethe duto mag kendo-mar-misango.

¹⁴ Bang’ mano ng’atno nyaka pog boche duto mag jambich,

¹⁵ kod nyiroke, kaachiel gi boche mogawogi man but oguro, kod jwala mabor man ewi chuny gi nyiroke, mondo obed misango miwang’o ni Ruoth Nyasaye.

¹⁶ Jadolo nowang’ mago duto e kendo-mar-misango madum mamit. Boche duto gin mag Ruoth Nyasaye.

¹⁷ Enobed chik mochwere kuom tienge duto, kamoro amora mudakie, ni kik ucham bor kata remo.