Tim jo-Lawi 1 - MUMA MALER 2015

Misengni miwang’o pep

¹ Ruoth Nyasaye noluongo Musa mowuoyo kode gi e Hemb Romo ma Nyasaye romoe gi joge, kowachone niya:

² Nyis jo-Israel ni ka ng’ato kuomgi chiwo chiayo mondo otimna misango, to chiayono nyalo bet dhiang’ kata diel kata rombo.

³ Ka ng’ato chiwo dhiang’ mondo otimgo misango miwang’o pep, to nyaka obed rwath maonge songa. Enochiwe e dhoranga Hemb Romo e nyim Ruoth Nyasaye mondo Ruoth Nyasaye oyie kode.

⁴ Nyaka oket lwete ewi chiayono, mi Ruoth Nyasaye noyie gi misangono mondo obed gima opwodhnego richone.

⁵ Eka noneg rwadhno e nyim Ruoth Nyasaye, kendo jodolo ma joka Harun nokaw remo, kendo nokir e bethe duto mag kendo-mar-misango manie dho Hemb Romo.

⁶ Bang’ mano noyang’ chiayono, kendo nopoge lemo lemo.

⁷ Joka Harun jadolo nomok mach e kendo-mar-misango, kotimogo misango, mi giniketie yien.

⁸ Ginichan lemogo kod wich gi bor e yien moket e majno.

⁹ Jambich gi tielo to nyaka lwok gi pi, eka jadolo nowang’gi kaachiel gi lemo duto e kendo-mar-misango, kotimogo misango miwang’o pep, mondo odum mamit ni Ruoth Nyasaye.

¹⁰ Ka ng’ato ochiwo rombo kata diel mondo otimgo misango miwang’o pep, to nyaka obed im kata nyuok maonge songa.

¹¹ Nyaka onege e nyim Ruoth Nyasaye e bath kendo-mar-misango koma ochomo yo nyandwat, kendo jodolo ma joka Harun nyaka kir remo e bethe duto mag kendo-mar-misango.

¹² Eka ng’atno nopog ring’o lemo lemo, mi jadolo nocham lemogo kaachiel gi wich kod bor kuom yien moketi e mach manie kendo-mar-misango.

¹³ Jambich gi tielo to nyaka lwok gi pi, eka jadolo nochiwgi kaachiel gi lemo duto e kendo-mar-misango mondo otimgo misango miwang’o pep ma tikne dum mamit ni Ruoth Nyasaye.

¹⁴ Ka ng’ato chiwo winyo mondo otimgo ni Ruoth Nyasaye misango miwang’o pep, to nyaka ochiw mana akuch odugla kata nyathi akuru.

¹⁵ Jadolo nokel chiwono e kendo-mar-misango kendo nochod wiye, eka owang’e e kendo mar-misango, to rembe nyaka bi mi chuer e kor kendo-mar-misango.

¹⁶ Nyaka ogol oswakone kaachiel gi gik manie iye, mi owit e bath kendo-mar-misango koma ochomo yo wuok chieng’, kama ipukoe buru.

¹⁷ Nyaka obambe ma ok ogolo buombene oko, eka owang’e ewi yien moket e mach manie kendo-mar-misango. En misango miwang’o pep, madum mamit ni Ruoth Nyasaye.