Tich Joote 4 - MUMA MALER 2015

Oter Petro gi Johana e bura

¹ Kane pod Petro gi Johana wuoyo gi ji, jodolo gi jatend jorit Hekalu, kod jo-Sadukai nobiro irgi.

² Chunygi nokethore ahinya nikech joote ariyogo ne puonjo ji ni Yesu nosechier kuom joma otho, manyiso ni joma otho biro chier.

³ Kuom mano, ne gimakogi, mi giketogi e jela nyaka kinyne, nikech piny koro ne yuso.

⁴ To joma thoth kuom ji mane owinjo wach Petro gi Johana noyie, kendo kar romb joma chwo duto moyie koro ne dirom alufu abich.

⁵ Kinyne, jotend jo-Yahudi gi jodongo kod jopuonj Chik nochokore Jerusalem,

⁶ gi Anas jadolo maduong’ kod Kaiafa gi Johana gi Aleksander kod owete jadolo maduong’ duto.

⁷ Ne giketo Petro kod Johana ochung’ e nyimgi, mi gipenjogi niya, “Teko mane kata nying ng’a, ma nyoro utimogo gima kama?”

⁸ Eka Petro mane oyudo opong’ gi Roho Maler, nodwokogi niya, “Un jotend oganda kod jodongo winjuru!

⁹ Ka upenjowa wach kawuono kuom gima ber mane otim ni ng’ama tuo, kendo kaka ne ochange, to waduokou kama:

¹⁰ Un uduto, kaachiel gi jo-Israel, nyaka ung’e ni ng’atno ochung’ e nyimu ka kangima chuth, nikech teko mar nying Yesu Kristo ja-Nazareth, mane un uguro, to Nyasaye nochiero oa kuom joma otho!

¹¹ Yesu ema Muma wuoyo kuome ni, ‘Kidi mane un jogedo udagi ema koro osedoko kidi motegno moriwo kor ot.’

¹² En kende ema ji yudo warruok kuome, nimar onge ng’at moro machielo e piny ngima ma Nyasaye osechiwo nyinge ni ji mondo oyudie warruok.”

¹³ Kane jobura oneno chir ma Petro gi Johana nigo, to gin mana ji ajia ma ok osomo, ne giwuoro ahinya. Eka ne gifwenyo ni yande giwuotho gi Yesu.

¹⁴ To onge gima ne ginyalo wacho, nikech ne gineno jal mane osechangi, kochung’ kanyo gi Petro kod Johana.

¹⁵ Kuom mano ne giwacho ni Petro gi Johana mondo owuog oko e od bura, eka ne gichako pimo wach ka gipenjore ni,

¹⁶ “Ere gima wanyalo timo ni jogi, nikech jo-Jerusalem duto ong’eyo ni gisetimo hono maduong’ kendo ok wanyal kwer?

¹⁷ To nyaka wabwoggi kwakwerogi ni kik gichak giwuo gi ng’ato kendo e nying Yesu, mondo wachni kik landre kuom ji.”

¹⁸ Kamano ne giluongogi, mi gikwerogi ni kik gichak gipuonj ji kendo e nying Yesu.

¹⁹ To Petro gi Johana ne joduokogi niya, “Un ema nyaka ung’ad wach uwegi kata ka en gima kare winjou moloyo winjo Nyasaye,

²⁰ To wan ok wanyal weyo mak wawuoyo kuom gik ma wan wawegi waseneno kendo wasewinjo.”

²¹ Kane jobura owinjo kamano, ne gimedo siemogi matek moloyo, to ne giweyogi gidhi. Ne ok ginyal nwang’o kaka digikumgi, nikech ji duto ne pako Nyasaye kuom gima ne otimoreno.

²² Ng’at mane otim hono kuome mochangono ne jahigni piero ang’wen gi wiye.

Joma oyie okwayo Nyasaye mondo omigi chir

²³ Kane ogony, Petro kod Johana ne gidok ir owete mamoko, mi ginyisogi gima jodolo madongo kod jodongo osewacho.

²⁴ Bang’ winjo wachno, giduto ne gilemo kaachiel niya, “A Ruoth, in ema nichweyo polo gi piny kod nam kaachiel gi gik moko duto manie igi.

²⁵ Bende kuom teko mar Roho Maler, nimiyo jatichni Daudi ma kwarwa owacho ni, ‘Ere gimomiyo joma ok jo-Yahudi notimo mirima? Koso ang’o momiyo ne gichano timo gik manono?

²⁶ Ruodhi mag piny noikore, kendo jotelo nochokore kaachiel mondo opiem gi Ruoth Nyasaye kod Mesia mare.’

²⁷ “Chutho, Herode gi Pontio Pilato nochokore Jerusalem kod ogendini mamoko kaachiel gi jo-Israel, ka gipiem gi Yesu Jatichni Maler mane iyiero obedo Mesia.

²⁸ Ne gichokore mondo gitim mana gima ne iseiko chon gi tekoni kod dwaroni.

²⁹ To koro Ruoth, yie iwinj siem ma gisiemowago, mondo imi jotichni oland wachni gi chir duto.

³⁰ Rie badi mondo ichang ji, kendo imi ranyisi gi honni otimre e nying Yesu Jatichni Maler.”

³¹ Kane gisetieko lemo, ot mane oyudo gichokoree noyiengni, kendo Roho Maler nopong’ogi giduto, mi gichako lando Wach Nyasaye gi chir.

Joma oyie obet gi chuny achiel

³² Joma oyie duto ne nigi paro achiel kod chuny achiel. Onge ng’ato kuomgi mane nyalo wacho ni gima en-go en mare owuon, to ne giriwo gik moko duto mane gin-go kaachiel.

³³ Joote nomedo lando wach gi teko maduong’ ka nyiso ji ni Ruoth Yesu osechier, kendo giduto ne giyudo gueth mogundho.

³⁴ Onge ng’ato kuomgi mane ochando gimoro, nikech ji duto mane ni gi puothe kata udi, ne lokogi, kendo kelo pesa ma gilokogi gichiwo ni joote.

³⁵ Pesago ne ipogo ni ng’ato ka ng’ato kaka dwarone chalo.

³⁶ Kamano bende e kaka ja-Lawi moro moa Saipras ma nyinge Josef, mane joote ochako bende ni Barnaba, (Tiende ni jal majiwo ji,)

³⁷ noloko puothe moro, mi okelo pesa ochiwo ni joote.