Ruth 4 - MUMA MALER 2015

Boaz okawo Ruth

¹ Boaz nodhi e dhoranga Bethlehem, mobet piny. Bang’e noneno jadhoodgi mane osewuoyo kuome cha ka kadho kanyo, mowachone niya, “Akoni, bar ibi ku, ibed piny ka.” Kane osebiro, mobet piny,

² Boaz noluongo jodong dala apar, mowachonogi niya, “Un beduru ka.”

³ Eka nowacho ni jal ma jadhoodgino niya, “Ing’eyo ni Naomi oseduogo koa Moab. Koro odwaro loko puoth Elimelek owadwa.

⁴ Omiyo naparo mondo anyisi wachno, kakwayi ni mondo ing’iewe e nyim joma obet ka, kendo e nyim jodongwa. Kiyie warogo, to ware. To ka ok idwar ware, to wachna mondo ang’e, nikech onge ng’at ma diware mak mana in, kata an.” Mi jadhoodgino nodwoke ni, “Abiro ware.”

⁵ Eka Boaz nowachone niya, “Chieng’ ming’iewoe puodhono kuom Naomi, to nyaka ikaw Ruth nyar Moab bende, ma chi jal ma notho mondo ichung wi ng’at mothono kuom mwandune.”

⁶ Jadhoodgino nodwoke niya, “Ka kamano, to ok anyal ware, nimar dipo kaketho mwanduna awuon. Ber mondo ikaw kara, iwar gino ma owinjore awar, nikech an ok anyal ware.”

⁷ E ndalo machon, jo-Israel ne nigi tim moro kuom wach waro gimoro kata loko gimoro. Ng’ato ne lonyo wuore, kendo miyo wadgi, mondo wachno obed gi teko. Mano e kaka jo-Israel ne miyo wach bedo gi teko e nyim joneno.

⁸ Omiyo ng’at cha nolonyo wuor, kawacho ni Boaz niya, “Ero, in ema mondo ing’iew puodhono.”

⁹ Eka Boaz nowacho ni jodongo kod ji duto niya, “Un e joneno kawuono, kang’iewo kuom Naomi gik moko duto mane mag Elimelek gi mag Kilion kod mag Malon.

¹⁰ Ruth nyar Moab, ma chi Malon bende akawo obed chiega, mondo achung wi jal mothono kuom mwandune, mondo kik nyinge lal kuom owetene, kata kuom dhoodgi.”

¹¹ Eka jodongo, kaachiel gi ji duto mane nie dhorangach, nowacho niya, “Wan joneno. Ruoth Nyasaye mondo oguedh dhako ma donjo e odino, obed machal gi Rahel kod Lea, mon ariyo ma nogero dhood Israel. Bende in mondo iyud duong’ e Efratha, kendo ibed gi pak mathoth e Bethlehem.

¹² Nyithindo ma Ruoth Nyasaye omiyi gi dhani mondo omi dhoodi obed machal gi dhood Perez, wuod Tamar chi Juda.”

¹³ Kamano Boaz nokawo Ruth, mobedo chiege, mi Ruoth Nyasaye noguedhe, momako ich, kendo nonywolo wuowi.

¹⁴ Bang’e mon nowacho ni Naomi niya, “Opak Ruoth Nyasaye tinende, ma ok oweyi nono. Koro in gi nyakwari. Nying nyathi mondo obed gi huma maduong’ e Israel.

¹⁵ Nobedni ng’ama duogo chunyi, kendo ka ng’ama riti e tiyoni, nikech chi wuodi moherino, kendo moloyoni yawuowi abiriyo, ema osenywolo nyathini.”

¹⁶ Naomi nokawo nyathi, moriwo e kore, kendo nobedo japite.

¹⁷ Mon wetene nochako nyathi nying ni Obed, kendo ne giwacho niya, “Osenywol ni Naomi nyathi.” En e wuon Jesse, ma wuon Daudi.

¹⁸ Magi e tienge mag Perez: Perez nonywolo Hezron,

¹⁹ to Hezron nonywolo Ram. Ram nonywolo Aminadab,

²⁰ to Aminadab nonywolo Nashon. Nashon nonywolo Salmon,

²¹ to Salmon nonywolo Boaz. Boaz nonywolo Obed,

²² to Obed nonywolo Jesse. To Jesse nonywolo Daudi.