Ruth 3 - MUMA MALER 2015

Ruth gi Boaz e kar dino

¹ Bang’e Naomi nowacho ni Ruth niya, “Nyara, onego ayudni kar dak, mondo ibed maber.

² Ing’eyo ni Boaz mane ibet kitiyo but jotichne manyiri cha, en watwa. Awinjo ni ang’ nopiedh shairi gotienoni kar dinone.

³ Omiyo lwokri, kendo iwirri gi mo. Rwak lepi mabeyo, ilor idhi kuno. To kik iwe ong’eyi, ka pok ochiemo kendo ometho.

⁴ Kodhi nindo, to ng’i kama onindoe. Bang’e idonj kanyo, iel gir um gi yo ka tiende, kendo inind kanyono. Obiro wachoni gima onego itim.”

⁵ Ruth nodwoke ni, “Duto miwachona, abiro timo.”

⁶ Ruth nodhi kar dino motimo duto mane wuon odgi owachone.

⁷ Kane Boaz osechiemo kendo ometho morome, nodhi monindo but pidh cham. Eka Ruth nolidho, moelo gir um gi yo ka tiende, kendo onindo kanyo.

⁸ Odiewuor tir, gimoro nobwogo Boaz, mochiew. To ka nolokore, nopo konwang’o dhako moro konindo yo ka tiende!

⁹ Nopenje ni, “In ng’a?” Ruth nodwoke ni, “An Ruth, jatichni ma nyako. Yar gir um mondo iuma, nikech in e ng’at monego tera.”

¹⁰ Boaz nowachone niya, “Ruoth Nyasaye oguedhi, nyara! Gima itimo kawuononi nyiso long’o maber moloyo ma nitimo ni wuon odu, nikech ok iseluwo bang’ wuowi moro ma jachan kata ma japith.

¹¹ Koro nyara, kik iluor. Abiro timoni duto miwacho, nikech jodalawa duto ong’eyo ni in nyako makare.

¹² Adier an jadhoodu mahie, to nitie wadu moro mahie moloya.

¹³ Bed ka gotienoni, to kiny gokinyi, ka jalo nyalo timoni gima jadhoodu mahie onego tim, to ber, mondo otim kamano. To ka ok oyie timo kamano, to akuong’ora gi nying Ruoth Nyasaye, ni abiro timoni kamano. Koro nindi nyaka okinyi.”

¹⁴ Omiyo Ruth nonindo ka tiende nyaka huyuhuyu piny, to noa malo ka pod ng’ato ok nyal ng’eyo wadgi. Boaz nowachone niya, “Kik ng’ere ni dhako moro nende obiro kar nindo ka.”

¹⁵ Eka nomedo wachone niya, “Kel lawi mar abola, iyar.” Mi noyare, kendo Boaz noolone shairi ma dirom migerni auchiel, moyieye. Eka Ruth nodok dala.

¹⁶ Kane oduogo, wuon odgi nopenje niya, “Wach odhi nadi, nyara?” Ruth nonyise duto mane jagono otimone,

¹⁷ kendo nowachone niya, “Magi e migerni auchiel mag shairi momiya, nikech nowachona ni kik aduog ir wuon odwa gi lweta nono.”

¹⁸ Naomi nowachone niya, “Bed mos nyara nyaka ing’e gima biro wuok e wachni, nikech ng’atno ok bi ling’ mak oloso wachni kawuono.”