Obadia 1 - MUMA MALER 2015

Jo-Edom obolore

¹ Magi e weche mane Ruoth Nyasaye owacho ni Obadia e fweny kuom jo-Edom. Ruoth Nyasaye oseoro jaotene ir ogendini, kowacho niya, “Biuru mondo wadhi waked gi jo-Edom.” Kendo wasewinjo wachne.

² Ruoth Nyasaye owacho ni jo-Edom niya, “Abiro miyo udoko matinie moloyo e kind ogendini duto, mi ji duto biro jarou.

³ Sunga ma un-go osewuondou! Udak e mbita mar lwanda motegno, kendo dalau ni ewi gode malo. Mano emomiyo uwacho kendu uwegi niya, ‘Ere ng’ama didwokwa piny?’

⁴ To kata bed ni ugero dalau midimidi malo ka od ongo, mi uchal mana gi joma odak e kind sulwe kamano, to abiro dwokou piny.” Ruoth Nuasaye omedo wacho niya,

⁵ “Ka jokuo obiro gotieno to gikawo mana gik ma gidwaro, kendo ka ji pono mzabibu to pile giweyo moko. Un to wasiku oseyweyou oko gi yuech!

⁶ Yaye, joka Esau! Giseyudo mwanduu, kata mana mago mupando, mi giyako.

⁷ Ogendini mane uriworugo osewuondou, mi giseriembou ua e pinyu. Joma ne ubetgo gi kue koro oseloyou, kendo osiepeu mane uchiemogo osechikonu obadho, ka giwacho kuomu niya, ‘Riekogi cha duto koro olal kanye?’ ”

⁸ Ruoth Nyasaye owacho niya, “Chieng’ ma nakum piny Edom, anatiek jogi mariek, mi onge rieko ma nodong’ e piny gode mag Esau.

⁹ Jolweny mag Teman biro bwok, mi noneggi, maonge kata achiel modong’ e piny gode mag Esau.

¹⁰ Notieku kendo nochau nyaka chieng’ nikech ne unego oweteu ma joka Jakobo muyakogi.

¹¹ Chieng’ mane wasikgi moa e pinje mamoko omuko dhorangeyegi, ne uchung’ achung’a. Ne uricho mana ka wasigu mane oyako mwandu Jerusalem, mi opogo e kindgi giwegi gi ombulu.

¹² “Ne ok onego ubed mamor gi masira mane oweteu ma jo-Juda oyudo, bende ne ok onego unyiergi chieng’ rumbgi. Ne ok onego usungru kuneno ka gin e chandruok.

¹³ Chieng’ mane masira omako joga, ne ok onego udonj e dalagi mondo unyiergi ka gin e thagruok, kendo uyak mwandugi.

¹⁴ Ne ok onego uchung’ e akek yo mondo ugeng’ ni joma dwaro tony, kendo chieng’ mane gin e chandruok, ne ok onego uketgi e lwet wasikgi.

¹⁵ “Chieng’ ma an Ruoth Nyasaye abiro ng’adoe bura ni ogendini chiegni. Yaye, jo-Edom! Gik ma usetimo ema notimnu, kendo timbeu maricho nodong’ mana e wiu uwegi.

¹⁶ Joga oseyudo kum malit ewi goda maler, omiyo ogendini duto molworo joga biro yudo kum malit moloyo. Ibiro kumogi sidang’, mi gilal nono!

Jo-Israel olocho

¹⁷ “To jomoko modak e got Sayun biroo tony kuno, mi kanyono nobed kama ler, kendo joka Jakobo nokaw piny ma margi giwegi.

¹⁸ Joka Jakobo gi joka Josef nochal mach, mi ginitiek joka Esau manaa kaka mach wang’o tiang’ mi tieki. Onge nyakwar Esau moro ma nodong’ kangima. An Ruoth Nyasaye ema asewacho kamano.”

¹⁹ Jo-Israel modak yo milambo nokaw piny gode mag Esau, kendo joma odak e tiend gode mag Juda biro kawo piny jo-Filistia. Jo-Israel nokaw piny Efraim gi Samaria, to jo-Benjamin nokaw piny Gilead.

²⁰ Jo-Israel mamalo mane odar, mi oter e tuech, ma koro ni Sefarad, biro kawo mich piny man yo milambo.

²¹ Jo-Israel biro dhi e got Sayun mondo oresi, mi god Esau nobed e bwo lochgi. To Ruoth Nyasaye ema nobed ruoth.