Ngeche 9 - MUMA MALER 2015

Rieko kod fuwo

¹ Rieko osegero ode, kendo osetong’one yien abiriyo mondo obed sirni mage.

² Oseyang’o chiayo, kendo oseloso divai mamit, siwandha bende osegero.

³ Oseoro jotichne manyiri kuonde moting’ore e gweng’, mondo oluong ji, ka wacho niya,

⁴ “Biuru un joma onge gi rieko.” Ng’at ma ofuwo, bende rieko wachone niya,

⁵ “Bi mondo wachiem kodi, kendo imadh divai mamit ma aseloso.

⁶ Bed mabor gi joma onge gi rieko, eka inibed mangima. Kamano, luw mana yor rieko.”

⁷ Ka itemo rieyo ng’at ma jasunga, to in ema iyudo wichkuot, kendo ka ikwero ng’at marach, to in iwuon ema ihinyori.

⁸ Kuom mano, kik item rieyo ng’at ma jasunga, nikech mano biro miyo obet mamon kodi. To ka irieyo ng’at man gi rieko, to obedo osiepni.

⁹ Bende kipuonjo ng’at man gi rieko, to omedo bedo mariek. Chutho, kinyiso ng’at makare gimoro, to omedo mana puonjore.

¹⁰ Luoro Ruoth Nyasaye e chakruok mar rieko, nimar ka ing’eyo Ng’ama Ler, to in gi rieko adier.

¹¹ Rieko biro medo hiki.

¹² Adier, ka in gi rieko, to in ema iyudo ohala, to ka idage, to in ema ihinyori.

¹³ Fuwo chalo gi dhako ma jakoko momemore, kendo ma onge gi wichkuot.

¹⁴ Obet e dhoode, kama oting’ore e dala,

¹⁵ kendo oluongo ji makadho, kadhi e tijegi, kowachonigi niya,

¹⁶ “Biuru, un joma onge gi rieko.” Ng’ama ofuwo to owachone niya,

¹⁷ “Pi ma okwal ema mit modho, kendo chiemo moyudi e yor miganga nigi ndhadhu moloyo.”

¹⁸ Jogo to ok ong’eyo ni joma dhi ire, tho, kata ni joma osedonjo e ode osenyumore matut e Piny Joma Otho.