Ngeche 8 - MUMA MALER 2015

Wer mipakogo rieko

¹ Winjuru kaka rieko luongo! Adier, odwaro ni ji mondo owinj dwonde.

² Ochung’ ewi gode man e bath yo, kendo e akek yore.

³ Bende ochung’ but rangach, kama ochomo yo dala,

⁴ kowacho niya, “Aluongou un ji duto. Chutho, aluongo ng’ato ka ng’ato manie piny.

⁵ Un joma pod yom, winjuru kaka onego udok motegno. Un joma ofuwo, winjuru kaka onego uyud rieko

⁶ Chikuru itu nikech adwaro nyisou weche mabeyo moloyo. Weche duto ma awachonu ni kare.

⁷ Gin adier, nimar amon gi miriambo.

⁸ Chutho, gik moko duto ma awacho long’o, kendo onge miriambo kata miganga moro.

⁹ Ng’at man gi rieko to winjogi maler. Ee, ng’at mawinjo tiend wach, to ong’eyogi maber.

¹⁰ Yieruru mana puonjna kar yiero fedha, kendo yieruru mana rieko moloyo yiero dhahabu maler.

¹¹ Nimar rieko ber moloyo kata mana kite ma nengogi tek onge gimoro amora maber ma dipimego.

¹² An e rieko, kendo an ema amiyo ji ng’eyo, bende anyiso ji winjo tiend weche, kendo apuonjogi ng’ado bura kare.

¹³ Luoro Ruoth Nyasaye en bedo mamon gi richo. An amon gi sunga kod wang’teko, kaachiel gi timbe mamono kod weche mag miriambo.

¹⁴ Achano gik moko, kendo atimogi. Bende an gi rieko, kendo ategno.

¹⁵ Akonyo ruodhi rito pinjegi, kendo akonyogi loso chike mabeyo.

¹⁶ Adier, an ema akonyo ruodhi kod jotelo rito piny.

¹⁷ Ahero joma ohera, kendo ng’ato nag’ata madwara to yuda.

¹⁸ An e wuon mwandu kod duong’. Chutho, mwandu mogundho kod gueth ni e lweta.

¹⁹ Gima iyudo kuom ber moloyo dhahabiu maler, kendo oloyo kata mana fedha malerie moloyo.

²⁰ An atimo timbe makare, kendo ang’ado bura kare,

²¹ kachiwo mwandu ni joma ohera, kendo apong’o utgi gi gik mogundho.

²² An rieko, ema ne Ruoth Nyasaye okuongo chueya, kapok oloso gimoro amora mane ochueyo chon.

²³ Adier, ne okwongo chueya chon ahinya, kapok piny ochakore.

²⁴ Ne onywola kapok ochue nembe, kendo kane pod onge sokni,

²⁵ kata kane pok ochue gode madongo, bende ka gode matindo ne pok oket kuonde ma gintie.

²⁶ Adier, Nyasaye nonywola kapok ochueyo piny kata puothe kata mana lowo.

²⁷ Noyudo antie kane oloso polo, kendo kane oketo kuonde ma nam ogikie.

²⁸ Adier, ne antie kane oyaro boche e kor polo, kendo kane oyawo sokni mag nam,

²⁹ mi ogolo chik ni pi, mondo kik kadh kama oketo. Bende ne antie kane oketo mise mar piny.

³⁰ Ne abet bute ka jatich molony, ka oyudo morne duto kuoma. Ne atugo e nyime pile,

³¹ ka ahero piny mosechueyo, kendo amor gi ji modakie.

³² Koro un yawuota, winjuru gima awacho, nikech joma timo kaka anyisogi gin johawi.

³³ Chikuru itu ni gik ma apuonjou, mondo ubed gi rieko, kendo kik uwe olalnu.

³⁴ Ng’at ma owinjo wachna, kendo ma osiko e dhoranga dalana, ka oketo wang’e e dhooda, en jahawi,

³⁵ nimar ng’at ma oyuda, to oyudo ngima, kendo Ruoth Nyasaye nobed mamor kode.

³⁶ To ng’at ma ok oyuda, hinyore owuon. Chutho, ng’at ma mon koda, ohero mana tho!”