Ngeche 7 - MUMA MALER 2015

Yore maricho mag dhako ma jamganga

¹ Wuoda, par gik ma awachoni, kendo kan-gi e chunyi.

² Tim kaka anyisi, eka inibed mangima. Rit chikena, mana kaka dirit tong wang’i.

³ Rwakgi ka tere e lith lweti, kendo ndikgi e chunyi mondo ipargi pile.

⁴ Kwan rieko ka gima en nyameru, kendo kwan ng’eyo tiend wach mana kaka ikwano osiepni mihero.

⁵ Ginimi itang’ ni mond jomoko nono. Adier, inibed mabor gi mon ma jomganga mawacho weche kisera.

⁶ Chieng’ moro kane ang’icho gie dirisa mar oda,

⁷ ne aneno yawuowi moko mapok otegno, to e kindgi ne nitie wuowi moro ma onge gi rieko kata matin.

⁸ Ne oyudo owuotho e wang’yo mokadho but od dhako moro ma jachode,

⁹ e sa mar odhiambo ka piny dwaro yuso.

¹⁰ Eka ne opo ka oromo gi dhakono korwakore malich ka dwaro mondo oyud dichwo.

¹¹ Ne en dhako ma wang’e tek, kendo maonge wichkuot. Pile ne owuotho e gweng’,

¹² korito chwo kamoro amora ma doyudgie, e wang’yore kata e chirni.

¹³ Omiyo ka ne oneno wuowino, ne okwake mi onyodhe, korango tong wang’e tir. Nowachone niya.

¹⁴ “Nende atimo sap misango kawuono gi chiayo, omiyo an gi ring’o mang’eny.

¹⁵ Kuom mano, aa biro mondo amanyi, to hawi maber, eri, ayudi!

¹⁶ Asepedho kitandana gi suke mokikokiko moa Misri,

¹⁷ kendo asekiroe poda mang’ue mamit.

¹⁸ Omiyo wadhi mondo wayud mor nyaka piny ru, wabiro winjo maber ka wakwakore,

¹⁹ nimar chwora onge, odhi wuoth kuma bor.

²⁰ Osedhi gi pesa mang’eny, kendo ok obi duogo nyaka bang jumbe ariyo.”

²¹ Kamano dhakono ne oywayo wuowino gi wach mamit, mi odhi kode.

²² Chutho, ne odhi kode mana ka rwath mitero kar yeng’o, kata ka mwanda machikore

²³ ka kia ni ochomo asere ma biro hobo adundone, kata ka winyo mochiko obadho motegne, to en owuon ok ong’eyo ni ngimane ni e tho!

²⁴ Koro in wuoda, chik iti mondo iwinj gima awachoni.

²⁵ Kik iyie dhako makamano lombi, bende kik iwuoth awuotha ka idware,

²⁶ nimar oseketho ngima ji mang’eny, kendo osemiyo ji mathoth mokadho akwana otho.

²⁷ Temie kidhi e ode ane, mak dichom mana yo madhi e piny joma otho! Adier, en e yo maridore katero ji e tho.