Ngeche 5 - MUMA MALER 2015

Siem misiemogo jochode

¹ Wuoda, chik iti, mondo iwinj rieko kod paro ma an go.

² Eka ining’e kaka onego iritri, kendo wecheni nonyis ni in gi rieko.

³ Chi ng’ato nono nyalo wacho weche mamit ka mor kich, kendo dhoge nyalo bedo mayom ka mo,

⁴ to achien enochalni kwiri mager kata ka ligangla mabith!

⁵ Obiro teri e Piny Joma Otho, nimar owuotho mana e yo maridore kochomo tho!

⁶ Ok omok e yo madhi e ngima, to obagni abaga koni gi koni, kendo mano ok obadhe.

⁷ Koro in wuoda, chik iti, kendo wiyi kik wil gi gima awachoni.

⁸ Bed mabor gi dhako ma kamano, kendo kik isud kata machiegni gi dhoode.

⁹ To kapo ni itimo kamano, to jomoko nono ema biro yudo duong’ ma in go, kendo initho e lwet jomahundu ka pod itin.

¹⁰ Adier, jomoko nono dikaw mwanduni, kendo gik moko duto misechoko dibed mag ng’at machielo

¹¹ Inichur, kinindo e kitandani mithoe,’ ka dendi chamore rumo.

¹² Bang’e iniwach niya, “Ang’o mane omona puonjora rieko? Koso ere gima nomiyo adagi, ni ng’ato ok nyisa gima atimo marach?

¹³ Ne ok achiko ita ka jopuonjna wuoyo, kendo ne ok adewogi,

¹⁴ Omiyo koro asepo ka ayudo wichkuot e lela!”

¹⁵ Kik ibed jamganga ni chiegi iwuon, to en kende ema mondo ihere.

¹⁶ Onge ohala miyudo kuom nyithindo minywolo oko,

¹⁷ nimar nyithindo ok onego obed mag jomoko nono, to in ema onego gitini.

¹⁸ Kuom mano, bed mamor gi chiegi. Ee, yud ilo kuom nyako mane ikendo ka pod in wuowi.

¹⁹ Ojaber kendo olong’o mana ka nyakech. Ber ma obergono mondo omiyi mor, kendo herane mondo oketi diere.

²⁰ Wuoda, ere gima omiyo onego iher dhako moro nono? Koso ang’o momiyo chi ng’ato nono dilombi?

²¹ Ruoth Nyasaye neno gik moko duto mitimo, kendo orangi kamoro amora midhiye.

²² Richo mag ng’ama timbene mono gin obadho momake matek.

²³ Koro otho nikech ok onyal ritore owuon, kendo fupe ema tere e liel.