Ngeche 4 - MUMA MALER 2015

Ohala miyudo kuom rieko

¹ Yawuota, winjuru gima awachonu. Chikuru itu eka unubed gi ng’eyo.

² Weche ma apuonjou beyo, omiyo makgiuru matek.

³ Kane pod an nyathi mayom ma miderma

⁴ to wuora ne puonja kanyisa niya, “Par gik ma anyisi, kendo kik wiyi wil kodgi. Bende tim kaka anyisi, eka inibed mangima.

⁵ Bed gi rieko kod paro matut, kendo kik icha gima anyisi.

⁶ Kik ijwang’ rieko, eka enoriti.

⁷ Gima berie moloyo minyalo timo en yudo rieko. Kata ka mwanduni duto orumo, to winjo tiend wach ema onego ibedgo.

⁸ Her rieko, eka enomiyi duong’, kendo padri kuome, mondo okelni luor.

⁹ En ema nobedni osimbo mar duong’.”

¹⁰ Wuoda, winj wachna, kendo par matut gima anyisi, eka inidag aming’a.

¹¹ Asepuonji rieko, kendo asenyisi yo makare monego iluw.

¹² Onge gima nomi ikier ka iwuotho gi rieko, bende kata ka iringo to ok nichwanyri.

¹³ Pile par gima isepuonjori, kendo rite maber nikech en e ngimani.

¹⁴ Kik idhi kuonde ma joricho dhiye, bende kik iluw timbegi mamono.

¹⁵ Kata mana paro timo richo kik ipar, to wichri, kendo idhi yori iwuon.

¹⁶ Joma timbegi mono ok nyal nindo kapok otimo gimoro marach. Adier, nindo ok tergi kapok gihinyo ng’ato!

¹⁷ Mahundu gi timbe mamono e chiembgi.

¹⁸ Wang’yo ma joma kare luwo, chalo chieng’ mapilore gokinyi, kendo medore ameda nyaka nyango tegno.

¹⁹ Yor joricho to olil mana ka muth otieno.

²⁰ Wuoda, chik iti mondo iwinj weche mawachoni.

²¹ Kik iwe gikadhni, to kan-gi e chunyi,

²² nikech ng’ama winjo tiendgi to gichango kendo gimiyo ngima.

²³ Chunyi e kama ngimani ochakoree, emomiyo rite ka mwanduni migenoe moloyo.

²⁴ Kik iwach gimoro ma ok adiera, bende bed mabor gi miriambo kod weche mag miganga.

²⁵ Rang mana nyimi tir, ka idimbori kendo ka in gi chir, kendo kik ikul wiyi ka gima wichkuot omaki.

²⁶ Rang maber yo ma onego iluw, eka gimoro amora mitimo biro bedo maber.

²⁷ Tang’ ni richo, kendo kik iwe yo makare, kibaro koracham kata korachwich.