Ngeche 31 - MUMA MALER 2015

Weche mag Lemuel

¹ Magi e weche matut mane min ruoth Lemuel opuonje:

² “En ang’o, yaye wuoda? Ere gima dawachi? In ema Nyasaye nomiyai bang’ winjo lemo mane akuong’oranego.

³ Kik iketh tekri kuom mon, kata kik iwit mwanduni duto kuomgi, nikech giseketho ruodhi mang’eny.

⁴ Yaye, wuoda Lemuel, chik iti ni gima awacho. Ruodhi ok onego omadh kong’o, kendo ok onego gigomb madho gik mamero ji,

⁵ nimar ka gimetho to wigi wil gi chik, kendo giketho buch joma odhier machandore.

⁶ Joma tho, kendo joma chunygi lit ema mondo imi kong’o,

⁷ eka wigi owil gi chan kod chuny lit ma gin-go.

⁸ Kik iwe mak ichwako joma odhier ma ok nyal konyore kendgi.

⁹ Ee, nyaka iwuo mondo ong’adnigi bura kare.”

Dhako malong’o

¹⁰ Dhako malong’o ber moloyo kite ma nengogi tek. Mano kaka yudo dhako ma kamano tek!

¹¹ Chwore oketo geno mare kuome, omiyo chworeno ok nyal bedo jachan.

¹² E ngimane duto otimo ni chwore mana gik mabeyo kende.

¹³ Otiyo matek, koloso lewni mabeyo gi yie rombe kod tworo.

¹⁴ Kaka yiedhi a kuonde maboyo ka kelo gik moko, e kaka dhakono bende kelo chiemo moago oko.

¹⁵ Omondo chiew mondo olos ni joode chiemo, kendo onyis jotichne manyiri gik ma onego gitim.

¹⁶ Ka odwaro ng’iewo puodho, to orango puodhono maber, eka ong’iewe gi pesane owuon, bang’e opidhoe mzabibu.

¹⁷ Otimo kinda, kendo otiyo tijene duto gi teko, mathoth.

¹⁸ Oneno ni gik moloso kelone ohala, omiyo omoko taya, kendo otiyogo koda ka seche mag otieno.

¹⁹ Ochueyo yie rombo kendo olosogo law owuon.

²⁰ Ong’won ni joma odhier, kendo okonyo joma chandore.

²¹ Ok odew kata ka koyo ng’ich, nikech joode nigi lewni maliet ma girwako.

²² Ochueyo lewni mipedho e kitendni.

²³ Chwore en jabura mong’ere, kendo en achiel kuom jodong piny.

²⁴ Dhakono bende loso lewni gi misibe mondo johala ong’iew.

²⁵ Oratego kendo ji ogene, bende ndalo mabiro ok goye kibaji.

²⁶ Ka owuoyo to owuoyo gi rieko, kendo opuonjo ji gi muolo.

²⁷ Pile odich korango gik ma joode ochando.

²⁸ Nyithinde goyone erokamano. Chwore bende pake, ka wacho niya,

²⁹ “Mon mang’eny beyo, to in ema iloyogi duto.”

³⁰ Ber mar wang’ wuondo ji. Adier, chia bende rumo, to dhako ma oluoro Ruoth Nyasaye ema yudo pak.

³¹ Miye pak moromo gi gik ma otimo, kendo ji duto mondo omiye luor.