Ngeche 29 - MUMA MALER 2015

¹ Ng’at ma wiye medo bedo matek, kata ka osekwere, nopo mana ka otur ma ok chomre.

² Ka joma kare nigi loch, to ji duto mor, to ka joricho e jotelo to ji ng’ur ang’ura.

³ Ng’at mohero rieko miyo wuon mare mor. Ng’at ma jachode to ketho mwandune aketha.

⁴ Ka ruoth orito pinye gi adiera, to piny dhi maber, to ka obembo ji gi osuru mathoth, to oketho piny.

⁵ Ng’at ma pero wadgi chiko obadho mana ni en owuon.

⁶ Jaricho rwako wino e ng’ute mana nikech kethone. Joma kare to dhi maber kendo bedo mamor.

⁷ Ng’at makare winjo ywak jochan. Ng’at marach to ok dwe gik makamago.

⁸ Joma ok dew jowadgi nyalo kelo miero e gweng’. Joma riek to temo kweyo mirimb ji.

⁹ Ka ng’at mariek yalo gi ng’at mofuwo, to oketho kindene kayiem. Ng’at mofuwo biro nyiere anyiera, kagoyo koko kendo yanye.

¹⁰ Joma ohero chuero remo mon gi ng’at ma jaratiro. Joma kare to okawo ngimane ka gimoro.

¹¹ Ng’at mofuwo, iye wang’ piyo, kendo mwomore amwoma. Ng’at mariek to geng’o mirimbe kendo hore mos.

¹² Ruoth ma ohero chiko ite ni weche mihango, bedo mana gi jotich ma jomriambo.

¹³ Jachan gi ng’at mathire nigi gimoro achiel machalre; en ni Ruoth Nyasaye ema ne omiyogi ngima giduto.

¹⁴ Ruoth mang’ado ni joricho bura kare ema lochne nogurre mosiko.

¹⁵ Ka ichwado nyathi, kendo ikwere, eka ikonye bedo mariek. Nyathi mowe aweya to kelo ni min mare wichkuot.

¹⁶ Ka joricho ema nigi loch to timbe manono medore ameda. Joma kare to nogonigi agoya siboi ka gipodho.

¹⁷ Puonj wuodi tim maber eka okonyi kendo omiyi mor.

¹⁸ Oganda ma wach Nyasaye ok fwenyrene en oganda molal. Ng’at morito chik Nyasaye to en jahawi.

¹⁹ Ok inyal rieyo misumba mana gi dhogi kende, nimar obiro winji awinja, to ok odewi.

²⁰ Konyo ng’at mofuwo yot moloyo konyo ng’at mamwomore gi wach.

²¹ Kimiyo misumba gik moko duto modwaro, chakre tinne, to chieng’ moro en ema nokaw gigi duto.

²² Ng’at ma iye jawang’ piyo, pile kelo miero kod masira.

²³ Sunga ema miyo ji podho. Joma muol to yudo luor.

²⁴ Ng’at moyie kawo gik ma jakuo okwalo hinyore kende owuon, nikech ong’eyo ni okuong’ ng’at ma ok hul gima rach moseneno, to kata kamano pod ok onyal hulo, nimar ong’eyo bende ni kohulo to dikume.

²⁵ En gima rach luoro gima ji paro kuomi, to ber geno mana kuom Ruoth Nyasaye.

²⁶ Kata obedo ni pile ji mang’eny londhore mondo ruoth okonygi, to chutho Ruoth Nyasaye kende ema ng’ado bura gi adiera.

²⁷ Joma kare mon gi joricho, to joricho bende mon gi joma kare.