Ngeche 26 - MUMA MALER 2015

¹ Pako ng’at mofuwo ok owinjore, mana kaka pe kod koth ok owinjore e ndalo keyo.

² Kuong’ ma onge gima omiyo ok nyal mako ng’ato. Gikadho akadha ka winy mahuyo e kor polo to ok pi.

³ Kaka faras owinjore gi chwat, kendo kaka dho kanyna owinjore gi tueyo, e kaka ng’at mofuwo bende owinjore gi goch!

⁴ Ka idwoko ng’at mofuwo e yo mofuwo, to inyalo doko mofuwo ka en,

⁵ to ka ok idwoke kaka owinjore, to onyalo paro ni oriek.

⁶ Kioro ng’at mofuwo to ing’ado mana tiendeni iwuon, nikech obiro keloni masira.

⁷ Ngero ma ng’at mofuwo ogoyo wengni mana ka tiend rang’ol.

⁸ Kipako ng’at mofuwo, to ichalo mana gi ng’at motueyo kidi e orujre.

⁹ Ngero ma ng’at mofuwo goyo chalo mana gi kudho mochwowo lwet ng’at momer.

¹⁰ Ng’at ma ndiko ng’ato ang’ata moyudo chalo gi ng’at matho diro aserni adira, ka hinyogo ji duto.

¹¹ Ng’at mofuwo ma nwoyo gima ofuwo ma osetimo chalo gi guok modok nang’o ng’okne.

¹² Ber bedo ng’at mofuwo mogik moloyo bedo ng’at maparo ni riek, to chutho ok riek.

¹³ Ng’at ma jasamwoyo wacho ni sibuor ni oko, omiyo ok owuogi.

¹⁴ Jasamuoyo lokore aloka e kitanda, mana kaka dhoot malworore e pata.

¹⁵ Ji moko nyap ahinya, ma ok nyal kata mana nyamo chiembgi.

¹⁶ Ng’at ma jasamwoyo paro e chunye ni oriek moloyo ji abiriyo mariek.

¹⁷ Kidonjo e wach ma ok mari, to ichalo mana gi ng’at mamako guok gi ite.

¹⁸ Ng’at ma wuondo wadgi, to eka wacho ni ongere angera

¹⁹ chalo gi janeko ma tho diro aserni gi tong’ adira.

²⁰ Ka yien onge, to mach tho. Kamano bende, ka jakuoth onge, to miero orumo.

²¹ Kaka mirni miyo mach ng’ang’ni, kendo kaka yien miyo mach liel, e kaka kwinyo bende ero miero.

²² Mano kaka weche kuoth mit! Gidonjonwa mana kaka chiemo mamit ridore e iwa.

²³ Weche mamit mawuok e chuny marach chalo gi agulu mochue marachrach, to owir gi range mang’ang’ni.

²⁴ Jasigu nyalo wuoyo kodi mamit gi dhoge, to chutho chunye maiye wuondi awuonda.

²⁵ Kata obedo ni wechenego mit kamano, to kik iyie kode, nikech chunye sigu opong’o.

²⁶ Onyalo wuondore ni oonge gi sigu, to kata kamano gik maricho motimo biro nenore e lela.

²⁷ Ka ng’ato okunyo ni wadgi bur, to en ema onyumore e burno. Kata ka ong’ielo kidi mondo ohinygo wadgi, to en ema kidino ng’ielore kuome.

²⁸ Lep mawacho miriambo, mon gi adiera, kendo dhok ma pero ji kelo masira.