Ngeche 25 - MUMA MALER 2015

Ngeche mamoko mag Solomon

¹ Magi e ngeche mamoko mag Solomon, mane jotich Hezekia ruodh Juda ondiko, kogolo kuonde mane ondikgie:

² Wamiyo Nyasaye duong’ kuom gik ma opando. Ruodhi to wamiyo duong’ kuom lero tiend weche.

³ Onge ng’ama ong’eyo chuny ruoth, nimar parone oyombowa mana kaka bor mar polo, kendo tut mar nam.

⁴ Ka ogol chilo kuom fedha, eka jatheth nyalo thedho gimoro maber gi fedhano.

⁵ Kamano bende kogol jong’ad rieko maricho e nyim ruoth, to lochne gurore motegno, nikech orito piny gi adiera.

⁶ Ka ichung’ e nyim ruoth, to kik iyiedhri mondo ong’eyi, kendo kik idhi ibed kama oyang ni jodongo,

⁷ nono to ogoli kanyo mondo iwe thuolo ni ng’ama duong’ moloyi! Emomiyo ber bedo kama rachrach, eka luongi mondo idhi ibed kama oyiedhi.

⁸ Kik irikni hulo ni ng’ato gimoro amora mineno, dipo ka wadu moro obiro mong’eng’i marach.

⁹ Ka in gi wach gi wadu, to los wachno kode ka un kendu to kik ihul weche maling’ling’ mag ng’ato,

¹⁰ nikech kowinjo to obiro kuodo wiyi marach, mi nyingi kethre nyaka chieng’.

¹¹ Wach mowachi maber e kinde mowinjore chalo gi gimoro maber, molos gi dhahabu, moket ei adita mochue gi fedha.

¹² Siem ma ng’at mariek siemogo ng’at ma chiko ite, ber moloyo tere mar dhahabu, kata tigo molos gi dhahabu.

¹³ Jaote malong’o duogo chuny joma oore, mana ka pi mang’ich ma nego riyo e ndalo keyo ka chieng’ kech.

¹⁴ Ji ma sungore ni biro chiwo gik moko, to bang’e ok chiw, chalo gi boche polo kod yamo ma ok kel koth.

¹⁵ Kihori mos gi weche mamuol to inyalo loko kata mana chuny ruoth matek manade. Lep mayom bende nyalo turo chogo.

¹⁶ Kinwang’o mor kich, to cham mana moromi, nikech ka ichamo mathoth, to dipo ka ing’ok.

¹⁷ Kamano bende kik ilim wadu pile pile, nikech dipo ka ojok kodi, mi ochayi.

¹⁸ Ng’at ma riambo kuom wadgi chalo mana gi arungu kata ligangla kata asere mabith.

¹⁹ Geno kuom ng’at ma mibadhi ka in e chandruok chalo gi muodo gimoro gi lak malit, kata wuotho gi tielo mowil,

²⁰ kata dong’ duk ka piny ng’ich. Wero wer ni ng’at ma chunye lit chalo mana gi rudho chumbi e adhola.

²¹ Ka jasiki odenyo, to miye chiemo, kendo ka riyo oloye, to miye pi omodhi,

²² nikech kitimo kamano to inege gi wich kuot, kendo Ruoth Nyasaye nomiyi pok.

²³ Fuong’o wach kelo miero, mana kaka yamo kelo koth.

²⁴ Ber dak e kiru, moloyo dak e ot maduong’ gi dhako maralep.

²⁵ Winjo wach maber moa kuma bor chalo gi modho pi mang’ich ka riyo oloyi.

²⁶ Ng’at makare ma ok kwer jaricho, ka temo chune timo gimoro, chalo mana gi aora moduwore, kata gi soko ma ok nyal modh pige.

²⁷ Kaka chamo mor kich mathoth ahinya ok ber, e kaka dwaro pak mang’eny bende rach.

²⁸ Ng’at ma ok nyal pieyo mirimbe, chal mana gi dala ma onge gi ohinga, ma monjo yot.