Ngeche 23 - MUMA MALER 2015

¹ Ka ibet piny mondo ichiem gi ruoth, to par malong’o ni ng’at ma ichiemogi en ng’a!

² Ka in jawuoro to dimbri!

³ Kik iwe miluma hewi gi chiembe mamit, nimar nyalo bet ni odwaro mana ng’eyogo kiti.

⁴ Kik iwe tich bari ndasi ni eka iyud mwandu mang’eny,

⁵ to bed mariek nimar pesani nyalo lal ka diemo wang’, mana ka gima en gi buombene ma ohuyogo ka ongo.

⁶ Kik ichiem gi ng’at ma jamgundia, kata kik iwe miluma hewi gi chiembe mamit.

⁷ Onyalo wachoni ni mondo ichiem kode, to ng’e malong’o ni owuondi awuonda. Ochalo yier momoko e dwondi,

⁸ mamiyo ing’ogo gik ma isechamo, mi wecheni mamit lal nono.

⁹ Kik item wuoyo gi ng’at mofuwo, nikech obiro mana chayo riekoni.

¹⁰ Kik iketh kiew machon, kata kik ima nyithi kiye lopgi,

¹¹ nikech Ruoth Nyasaye man gi teko e jaritgi, kendo ema chwakogi.

¹² Ket chunyi kuom puonjruok, kendo chik iti ni weche mag rieko.

¹³ Kik iwe nyathi mak ikumo, nimar chwat ok nyal nege!

¹⁴ Chutho mano biro rese mana e tho.

¹⁵ Wuoda, ka inyalo bedo mariek, to dabed mamor.

¹⁶ Adier, anabed mamor ahinya ka awinjo ka iwacho weche makare.

¹⁷ Kik nyiego maki gi gik ma joricho nigo, to luor mana Ruoth Nyasaye ndalo duto.

¹⁸ Ka itimo kamano to inidhi maber, kendo inidag aming’a.

¹⁹ Wuoda, winja mondo ibed mariek, kendo ket chunyi kuom tim maber.

²⁰ Kik ibed e kanyakla mar jokong’o gi jowuoro,

²¹ nikech gikogi en mana dhier. Ka tichni en mana chiemo gi nindo, to nyaka iwuoth duk!

²² Winj wuoru, nikech en ema onywoli, kendo kik icha meru, kata bed ni oseti.

²³ Adiera gi rieko gi puonjruok kod paro maber ema nyaka iyudi, kata dabed ni ing’iewogi gi nengo matek. Kik iwe ng’ato kawgi kata dabed ni omiyi ang’o.

²⁴ Wuon ng’at makare en jahawi, nikech wuowi mariek miyo wuon bedo mamor.

²⁵ Kuom mano bed ng’at mamiyo wuon gi min mane onywole mor.

²⁶ Wuoda, chik iti maber mondo ngimana obedni ranyisi.

²⁷ Dhako ma jachode en bur matut, kendo dhako materore en soko ma dhoge diny.

²⁸ Gibuto ni ji ka jomecho, kendo gimiyo ji mathoth donjo e richo.

^29-30 Ng’at madeko oko ka kong’o, kendo mamadho kong’o mayoreyore donjo e dhaw kendo yudo masira. Ohinyore kayiem nono; wang’e bende kwar. Bang’e to oywago ang’e.

³¹ Kuom mano kik irwo kong’o mochiek kendo matar, kineno ka bwoyo yienyo e dho agwata,

³² nikech kinyne gokinyi niwinj dendi ka rach mana ka gima thuol man gi kwiri marach ema okayi.

³³ Inine gik mayoreyore ka ringo e wang’i, kendo iniwach gik manono.

³⁴ Iniukni mana ka ng’at man e yie ma apaka tago e chuny nam.

³⁵ Bang’e iniwach niya, “Nyaka bed ni ng’ato osechwada, to ok anyal paro gima osetimorena. Nyaka bed ni osegoya, to kata kamano ne ok awinjo kigoya. Ere kaka anyalo chung’ mondo adog ameth kendo?”