Ngeche 21 - MUMA MALER 2015

¹ Ruoth Nyasaye ema nyiso ruoth gik monego otim, mana kaka ochiko aora kuma onego molie.

² Ng’ato nyalo paro ni gik moko duto motimo ni kare, to Ruoth Nyasaye ema ong’eyo parone duto.

³ Ruoth Nyasaye ohero mondo itim gik makare kendo mowinjore moloyo timone misengni.

⁴ Wang’teko kod sunga ema otelo ni joma timbegi mono, to mano en richo.

⁵ Ng’at matiyo matek, kendo ma chano gik moko mos noyud gik mathoth, to ng’at marikni ok noyud gimoro.

⁶ Mwandu moyudi e yor miganga lal piyopiyo nono, to bende gitero ji e tho.

⁷ Tim mahundu en obadho ma joricho mokoe, nikech gidagi timo gik makare.

⁸ Joketho wuotho e yo mogondore ogondore. Joma onge ketho to wuotho mana e yo moriere tir.

⁹ Ber dak e kiru, moloyo dak e ot maduong’ gi dhako maralep.

¹⁰ Riyo mar timo richo ohingo joma timbegi mono, kendo ok gikech ng’ato.

¹¹ Ka ng’at ma wang’e tek oyudo kum, to eka koda ka ng’at ma onge paro puonjore. Ng’at mariek to mako gik mipuonje.

¹² Nyasaye Makare nono miech joricho, kendo otieko jorichogo.

¹³ Ka ng’ato odino ite ni ywak joma odhier, to en bende ywakne ok nowinji.

¹⁴ Mich mochiw ling’ling’ ni ng’at mokecho, kueyo mirimbe.

¹⁵ Ka adiera nitie to joma kare bedo mamor. Joma timbegi mono to lal nono.

¹⁶ Ng’at moweyo yor rieko ochiko mana piny joma otho.

¹⁷ Ng’at mohero raha, nyaka bed jachan. Adier, ng’at mohero kong’o gi chiemo mabeyo ok nyal bedo gi mwandu.

¹⁸ Chandruok ma joricho dwaro ni joma kare dok mana e wigi giwegi.

¹⁹ Ber dak e thim oko, moloyo dak gi dhako maralep makwiny.

²⁰ Gik mabeyo opong’o dala ng’ama riek kendo odhi maber. Joma ofuwo to ketho mwandugi aketha piyopiyo.

²¹ Bed mang’won kendo ma jaadiera, mondo idag aming’a, eka ji nomiyi luor, kendo notimni maber.

²² Jatend lweny man gi rieko nyalo kawo dala ma jolweny mager orito, mi oketh ohinga mane jolwenygo paro ni ogeng’ogi.

²³ Ka ok idwar ni iyud chandruok, to rit lewi.

²⁴ Jasunga e nying mowinjore gi ng’ama kawore ma wang’e tek, kendo ma ok dew ji.

²⁵ Ng’at ma jasamwoyo ma ok ohero tich negore mana kende owuon.

²⁶ Parone osiko mana kuom gik ma ogombo ni mondo obedgo. Ng’at makare to bade lach, kendo pogo gige gi ng’wono.

²⁷ Ruoth Nyasaye mon gi misango ma joricho timone, to moloyo kotimne misangono gi paro marach.

²⁸ Janeno ma wacho miriambo biro lal nono, to ng’at mawacho adiera, nowe nyikwayo bang’e.

²⁹ Ng’at makare ong’eyo gima otimo. Jaricho to wuondore awuonda.

³⁰ Rieko gi ng’eyo kod paro matut, Ruoth Nyasaye ok kwan ka gimoro.

³¹ Inyalo gawo farese mondo obed moikore ni lweny, to Ruoth Nyasaye ema miyo ilocho.