Ngeche 20 - MUMA MALER 2015

¹ Kong’o miyo ng’ato bedo jakoko maonge gi rieko. Emomiyo mer en mana fuwo.

² Ka ruoth okecho, to nyaka iluore, mana kaka iluoro sibuor karuto, nikech kimedo wang’o iye, to ichalo mana gi ng’ama dere.

³ Joma onge gi rieko ohero kelo dhaw. To ng’ama ok dwar miero to ji miyo luor.

⁴ Jasamuoyo ma ok pur puothe e kinde mowinjore ok nyal yudo cham e ndalo keyo.

⁵ Paro mae chuny ng’ato chalo gi pi manie soko matut, to ng’at machielo man gi rieko nyalo tuomogi oko.

⁶ Ji mang’eny wuorore kendgi ni gin joma ogen, to temie ane ka diyud kata mana achiel ma inyalo geno!

⁷ Nyithindo ma wuon-gi jaadiera, kendo timo gik makare gin johawi.

⁸ Ruoth mobet e kom duong’ne kang’ado bura piedho weche maricho duto gi wang’e.

⁹ Ere ng’ama nyalo wacho ni parone long’o, kendo ni richone duto osepuodhi?

¹⁰ Ruoth Nyasaye mon gi rapim ma ok ni kare.

¹¹ Timbe nyathi ema nyiso kite, omiyo inyalo ng’eyo ka kite ber kata rach.

¹² Ruoth Nyasaye osemiyowa wang’ mondo wanen-go, kendo osemiyowa it mondo wawinjgo wach.

¹³ Ka ihero riyo mana kinindo, to nyaka ibed modhier, to ka itiyo matek, to ibedo gi chiemo mogundho.

¹⁴ Pile jang’iewo ywagore ni nengo gimoro tek. Koseng’iewo, to osungore ni ong’iewo gino gi nengo mayot.

¹⁵ Ka iwuoyo gi rieko, to in gi mwandu moloyo dhahabu kata kite ma nengogi tek.

¹⁶ Ng’at mochung’ ni ng’ato nono e gowi onego omak mwandune kar gowino.

¹⁷ Chiemo moyud e yor miganga nenore ni mit mokadho, to achien omuodore mana ka kuoyo.

¹⁸ Kiyie mondo ji ong’adni rieko to in idhi nyime maber, omiyo kik ibuk lweny ka pok iikori maber.

¹⁹ Ng’at ma jafuong’ wach ok kan weche maling’ling’, omiyo bed mabor gi ng’ama ok rit dhoge.

²⁰ Ka ng’ato okuong’o wuon kata min, to ngimane norum mana ka taya motho e mudho mandiwa.

²¹ Ka ng’ato choko mwandu e yo mayot, to e giko mwandugo ok nokonye ngang’.

²² Kik ichul kuor kuom gima rach ma ng’ato otimoni, to gen kuom Ruoth Nyasaye mondo olosni wachno.

²³ Ruoth Nyasaye mon gi joma tiyo gi rapim ma ok ni kare.

²⁴ Ka Ruoth Nyasaye ema telo ni ji, to koro ere kaka dhano adhana matho ding’e kuma dhiye?

²⁵ Ng’at ma kuong’ore ka rikni ni biro chiwo ni Nyasaye gimoro keto mana wino e ng’ute, nikech achien dipo ka oywago ang’e!

²⁶ Ruoth mariek fwenyo joketho, kendo okumogi ma ok okechogi.

²⁷ Ruoth Nyasaye menyo chuny dhano hie, kononogo parone maiye.

²⁸ Ruoth mang’won ma timne kare kendo ma jaadiera ema siko korito pinye.

²⁹ Sunga mar yawuowi en teko ma gin go, kendo duong’ mar jodongo en lwar mae wigi.

³⁰ Goch motegno miyo ng’ato weyo richo, kendo chwat malit chopo nyaka e chuny dhano.