Ngeche 2 - MUMA MALER 2015

Pok miyudo kuom rieko

¹ Wuoda, mak weche ma apuonji, kendo kan-gi e chunyi.

² Chik iti ni weche man gi rieko, kendo tem matek mondo iwinj tiendgi.

³ Adier, dwar rieko, kendo many ng’eyo.

⁴ Dware matek, mana ka gima idwaro fedha, kata ka gima idwaro mwandu moro mopandi.

⁵ Ka itimo kamano, to ining’e tiend luoro Ruoth Nyasaye, kendo iniyud rieko ming’eyogo Nyasaye,

⁶ nimar Ruoth Nyasaye ema chiwo rieko, kendo en ema opuonjo ng’eyo.

⁷ Okonyo joma kare ma jo-adiera, kendo oritogi.

⁸ En okumba mar joma timo ni jowadgi maber, kendo orito jogo ma opadore kuome.

⁹ Ka iwinjo wachna, to ining’e gima ber makare kendo mowinjore. Pile inibed king’eyo gima onego itim.

¹⁰ Inibed gi rieko, kendo ng’eyo ma in go nokelni mor.

¹¹ Rieko kod paro matut noriti,

¹² kendo ginitelni mondo kik itim gimoro marach. Ginimi ibed mabor gi joma wacho weche makelo miero.

¹³ Gin joma oseweyo yo makare, to luwo mana yor mudho.

¹⁴ Timo richo gi gik mamono ema gihero,

¹⁵ kendo gin joma yoregi ogajore ogajore.

¹⁶ Rieko noresi kuom dhako ma jamganga, ma temo ywayi gi weche mamit.

¹⁷ En dhako ma ok oluoro chwore, kendo ma ok dew kuong’ruok mane okuong’orego e nyim Nyasaye.

¹⁸ Kapo ni idhi e ode, to iwuotho mana e yo maridore kochiko tho. Chutho, dhiyo kuno, en mana dhi e Piny Joma Otho!

¹⁹ Ng’ato ang’ata molimo dhakono to ok chak duog kendo. Adier, ok ochak oduog e wang’yor ngima!

²⁰ Kuom mano, nyaka iluw yo ma ng’at maber luwo.

²¹ Joma kare kendo modimbore ema nosik e pinywani.

²² To Nyasaye noriemb joricho e piny, kendo nopudh joma timbegi mono gi lop tiendgi, mana ka buya mipudho e lowo.