Ngeche 18 - MUMA MALER 2015

¹ Ng’at ma kendeke dwaro mana gige owuon. Ok onyal yie gik ma ji duto oyiego.

² Ng’at mofuwo ok dew kata ka owinjo gimoro, kata ka ok owinjo. Riekone kende ema odwaro nyiso.

³ Richo kelo wichkuot, kendo ka nyingi okethore, to achaya ema iyudo.

⁴ Weche dhano gin soko mar rieko. Gitut ka nam, kendo giliw ka aora mamol.

⁵ Ok en gima kare chwako jaketho, kata ketho buch ng’ama kare.

⁶ Weche ng’at mofuwo kelo dhaw, omiyo owinjore gi goch.

⁷ Ka ng’at mofuwo wuoyo, to otiekore kende. Wechene owuon ema make.

⁸ Mano kaka weche kuoth mit manade! Gidonjonwa mana kaka chiemo mamit ridore e iwa.

⁹ Jasamwoyo rach mana ka ng’at ma ketho gik moko.

¹⁰ Nying Ruoth Nyasaye chal gi dala mochiel motegno, ma ng’at makare nyalo ringo resoree.

¹¹ Jamoko paro ni mwandune en ohinga mogeng’orego.

¹² Ng’at mamuol ema yudo duong’. Jasunga to luwo yo mochiko kethruok.

¹³ Chik iti kapok idwoko penjo. Ka ok itimo kamano to ibedo mofuwo, kendo ikelo wichkuot.

¹⁴ Chuny man gi chir ema konyo ng’ato ka tuo. To ka chuny ng’ato ool to konye tek.

¹⁵ Joma weche donjonigi dwaro mondo opuonjre, kendo gichiko itgi mondo kik wach moro kadhnigi.

¹⁶ Lwedo mabup ema yawo dhoot, kendo nyalo miyo ine kata mana ng’ama duong’.

¹⁷ Ng’at ma okuongo yalo ema iparo ni wacho adier, to eka bang’e ng’at ma giyalogo chako ng’eng’e.

¹⁸ Ka joma rateke ng’ang’ore e od bura, to ombulu ema nyalo thegogi.

¹⁹ Kikonyo owadu, to enoriti mana ka dala mochiel motegno, to ka idhaw kode to enolorni dhoot.

²⁰ Weche duto mawuok e dho ng’ato duogo e wiye owuon.

²¹ Weche ma ng’ato wacho nyalo kelo ngima, to bende ginyalo kelo tho. Kuom mano, rit dhogi maber mondo wecheni okonyi.

²² Ng’at mokendo dhako oyudo gima ber. En gi hap Ruoth Nyasaye.

²³ Jachan kawuoyo to ywagore. Jamoko to wuoyo mana gi gero.

²⁴ Osiepe moko beyo mana kuom mbekni manono. Osiep maber to nyalo geni moloyo kata mana owadu monywoligo.