Ngeche 17 - MUMA MALER 2015

¹ Ber bang’o kuon gi kue, moloyo chamo chiemo mathoth e ot ma dhaw ng’enyie.

² Misumba mariek nyalo bedo gi loch kuom wuod dala ma kuodo wich, mi pogne mwandu kaachiel gi yawuot dalano mamoko.

³ Dhahabu gi fedha itemo gi mach. Chuny dhano to Ruoth Nyasaye ema temoo.

⁴ Joma timbegi mono ohero winjo weche maricho. Jomriambo bende kuoth ema mitnigi.

⁵ Ng’at ma chayo jachan yanyo mana Nyasaye mane ochueye, kendo ng’at mabedo mamor ka masira omako wadgi noyud kum.

⁶ Jodongo mor gi nyikwagi, mana kaka yawuowi mor gi wuonegi.

⁷ Ng’at mogen ok riambi, mana kaka ng’at mofuwo ok nyal wacho gima kelo konyruok.

⁸ Ng’at mohero chiwo asoya paro ni asoya tiyo ka bilo, omiyo gik moko motimo dhi nyime maber.

⁹ Ka idwaro ni mondo ji oheri, to ng’wonnigi ka gitimoni marach. Ka pile ilwero ng’ato kuom gimoro marach mosetimo, to osiep ema iketho.

¹⁰ Kikwero ng’at mariek dichiel kende, to opuonjore maber, moloyo ng’at mofuwo migoyo ndalo mia achiel, eka winj gimoro.

¹¹ Ng’at ma timbene richo ohero miero, omiyo Nyasaye biro orone jaote makwiny.

¹² Ber romo gi ondiek madhako mosema nyithinde, moloyo romo gi ng’at mofuwo matimo gik mofuwo.

¹³ Kitimo marach ni ng’at mosetimoni maber, to masira ok norum e odi.

¹⁴ Chakruok mar miero chalo gi pi mochako chuer, omiyo nyaka geng’e ka pok omwomo.

¹⁵ Kumo ng’at maonge ketho, kata weyo jaricho aweya, gin gik ma Ruoth Nyasaye mon-go.

¹⁶ Ng’at mofuwo ketho pesa kuom puonjruok kayiem, nikech oonge gi obwongo mowinjogo gimoro.

¹⁷ En adier ni osiepni nyalo heri kinde duto, to owadu ema konyi e chandruok.

¹⁸ Ng’at maonge gi paro kende ema nyalo singore ni dichul gop wadgi.

¹⁹ Ng’ama ohero miero en jaricho, kendo ng’at makawore, kelo chandruok ni en owuon.

²⁰ Ng’at ma paro mana richo, donjo e chandruok, kendo ng’at ma wacho miriambo yudo mana masira.

²¹ Wuon wuowi mofuwo yudo kuyo. Adier, oonge gi mor.

²² Chuny mamor kelo ngima maber, to chuny mool kelo tuo.

²³ Jong’ad bura maricho chamo asoya ling’ling’ mondo oketh bura.

²⁴ Ng’at mariek keto chunye pile mondo odwar rieko. Ng’at mofuwo to jahubagabaga.

²⁵ Wuowi mofuwo miyo wuon mare chuny lit, kendo kelo ni min mare kuyo.

²⁶ Ok en gima ber kumo ng’at maonge ketho, kata goyo ng’at makare.

²⁷ Ng’at mariek ok wach weche mang’eny, kendo ng’at man gi paro matut ok yie mondo iye owang’.

²⁸ Ka ng’at mofuwo oling’ to ikwane ka ng’ama riek. Adier, ka ok owuo to ji paro ni en gi ng’eyo.