Ngeche 16 - MUMA MALER 2015

Ngima dhano kod timne

¹ Chuny dhano nyalo chano gik modwaro timo, to mago duto nie lwet Ruoth Nyasaye.

² Ng’ato nyalo paro ni gik moko duto motimo ni kare, to Ruoth Nyasaye ema pimo paro mar dhano.

³ Ket gik moko duto mitimo e lwet Ruoth Nyasaye, eka itimgi maber.

⁴ Gik moko duto ma Ruoth Nyasaye osechweyo nigi gikogi, kendo giko joricho en mana tho.

⁵ Ruoth Nyasaye mon gi ng’ato ang’ata ma jasunga. Ng’at makamano to ok notony ngang’ mak oyudo kum.

⁶ Bed gi luor kod adiera, eka Ruoth Nyasaye noweni richoni.

⁷ Ka Ruoth Nyasaye mor gi ng’ato kod timne, to ng’atno nyalo miyo koda ka wasike lokre osiepene.

⁸ Gima tin miyudo e yor adiera, ber moloyo gik mang’eny miyudo e yor miganga.

⁹ Dhano loso chenone owuon, to Ruoth Nyasaye ema telone eka otimgi.

¹⁰ Ruoth golo chik gi teko mar Nyasaye, omiyo wechene duto ni kare.

¹¹ Ruoth Nyasaye dwaro ni rapim duto obed makare, kendo ni ohala duto oloki e yo makare.

¹² Ruodhi ok nyal yie timbe maricho, nikech adiera ema miyo loch gurore motegno.

¹³ Ruoth ka ruoth dwaro mana adiera, omiyo gihero joma bidho wach.

¹⁴ Pile ng’at mariek dwaro ni mondo ruoth obed mamor, nimar kokecho, to mirimbe nyalo kelo ni ng’ato tho.

¹⁵ Mor ma ruoth nigo e pat wang’e kelo ngima, mana kaka boche polo kelo koth e ndalo chwiri.

¹⁶ Mano kaka yudo rieko gi ng’eyo, ber, moloyo yudo fedha gi dhahabu.

¹⁷ Yo ma joma beyo luwo bor gi richo, omiyo rang kama iluwo mondo ires ngimani.

¹⁸ Sunga kelo masira, kendo ng’ayi miyo ng’ato chwanyore.

¹⁹ Ber bedo gi jochan kibolori, moloyo bedo gi josunga, kipogo kodgi gik moyaki.

²⁰ Ng’at machiko ite ni gima ipuonje dhi nyime maber. Kuom mano, ket genoni kuom Ruoth Nyasaye mondo ibed mamor.

²¹ Ng’at man gi paroo iluongo ni ng’ama riek, kendo wechene mamit gin mana puonj.

²² Rieko en soko mar ngima ni jooma ni kode, to fup joma ofuwo kelonigi mana chwat.

²³ Ng’at mariek paro matut ka pok owacho gimoro. Kuom mano, weche mawuok e dhoge gin mana puonj.

²⁴ Weche mamuol chalo mana gi mor kich, ma mit kichamo, kendo kelo del maber.

²⁵ Yo ma ng’ato paro ni ber nyalo mana tere e tho.

²⁶ Kech makayo jatich miyo otiyo matek mondo oyud chiemo.

²⁷ Ng’at ma chunye rach ohero mana ero miero, kendo wechene chalo mach mager!

²⁸ Joricho kelo dhaw kuonde duto, kendo jokuoth thuwo osiepe.

²⁹ Ng’at ma jamahundu wuondo osiepene, kendo oterogi e masira.

³⁰ Tang’ ni ng’ama buonjo kodi, ka simi gi wang’e, nimar nyaka bed ni ochano timo gimoro marach.

³¹ Lwar en osimbo mar duong’, kendo joma kare ema yude.

³² Herruok ber moloyo doko ratego. Ng’at moritore owuon yudo duong’ moloyo ng’ama kawo dala maduong’.

³³ Ji goyo ombulu mondo ong’e gima onego gitim, to Nyasaye owuon ema ong’eyo gima timore.