Ngeche 13 - MUMA MALER 2015

¹ Wuowi mariek winjo puonj wuon mare. Ng’at ma wang’e tek to ok yie kethone.

² Joma kare nomi pok maromre gi gik ma giwacho. Jomriambo to gombo mana miero.

³ Ng’at marito dhoge reso ngimane, to ng’at ma rodho wach arodha tiekore kende owuon.

⁴ Ng’at ma jasamwoyo nyalo dwaro gimoro ahinya, to ok onyal yudo. Jakinda to yudo gik moko duto ma odwaro.

⁵ Ng’at makare mon gi miriambo. Jaricho to wechene kuodo wich, kendo ojogo ji.

⁶ Tim makare rito ng’at modimbore. Timbe maricho to tieko joricho.

⁷ Ji moko kawore ka jomwandu, to chutho gionge gi gimoro. Ji moko to wuondore ni jochan, to adier, gin gi mwandu mathoth!

⁸ Jamwandu nyaka warre gi mwandune, ka obwoge, momake. Jachan to onge gima bwogo.

⁹ Joma kare chalo ler mang’angni. Joricho chalo ler madwaro tho.

¹⁰ Sunga ok kel gimoro, to okelo mana miero, omiyo ber mondo ng’ato odwar rieko kuom ji.

¹¹ Mwandu moyudi e yo mayot lal piyopiyo, to mwandu mitiyone matek medore ameda.

¹² Ka gima igeno ok otimore, to chunyi ol, to ka gima igeno otimore, to chunyi duogo.

¹³ Kitamori winjo puonj, to idwaro mana chandruok, to kiwinjo gima iwachoni, to iyudo pok maber.

¹⁴ Puonj mar ng’at mariek en soko mar ngima, ma reso ng’ato e tho.

¹⁵ Rieko mabith kelo luor. Ndhogruok to kelo masira.

¹⁶ Ng’at mariek, paro matut ka pok otimo gimoro. Ng’at mofuwo to nyiso mana fupe.

¹⁷ Jaote ma kite rach kelo chandruok. Ng’at modimbore to kelo kue.

¹⁸ Ng’at madagi ni kik rieye bedo mana jachan, kendo yudo wichkuot, to ng’at machiko ite ka ikwero, yudo duong.

¹⁹ En gima ber manade yudo gima idwaro! Joma ofuwo otamore weyo richo.

²⁰ Kibedo e kanyakla mar joma riek, eka ibedo mariek, to kimako osiep gi joma ofuwo to ihinyori.

²¹ Chandruok luwo joricho kuonde duto. Joma kare to yudo gik mabeyo.

²² Ng’at makare bedo gi mwandu moweyo ni nyithinde. Mwandu joricho to nodog ni joma kare.

²³ Puothe jochan dinyag cham mathoth moromogi, ka da bed ni adiera ni e piny!

²⁴ Ka ok ichwad wuodi to kara ok ihere, ka ihere adier to nyaka ikume.

²⁵ Joma kare nigi chiemo moromogi. Joricho to denyo ndalo duto.