Ngeche 12 - MUMA MALER 2015

¹ Ng’at ma ohero rieko bedo mamor ka onyise gima rach ma osetimo, to ng’at motamore ni kik rieye chalo mana le.

² Ruoth Nyasaye mor gi joma kare, to okwedo joma chano timo richo.

³ Richo ok nyal miyo ng’ato chuny motegno. Ng’at makare to ogurore motegno.

⁴ Dhako malong’o miyo chwore mor, to dhako ma kuodo wich chalo ni chwore mana gi tuo mar nyamuoda.

⁵ Joma kare pile timo ni jowadgi maber. Joricho to wuondo jowadgi awuonda.

⁶ Weche joricho oting’o mana tho lilo. Weche joma kare to reso joma nie chandruok.

⁷ Joricho tho gi wigi. Joma kare to weyoo nyikwagi bang’gi.

⁸ Ng’at mariek yudo pak. Ng’at maonge rieko to inyiero anyiera.

⁹ Ber bedo dhano adhana matiyo mana ni mondo oyud chiembe, moloyo timruok ng’ama duong’ maonge chiemo.

¹⁰ Ng’at maber rito jambe gi ng’wono. Ng’at marach to sando jambe asanda.

¹¹ Ng’at mapuro matek, nyaka yud chiemo mang’eny. To ng’at maketho sechene gi timbe manono en ng’at mofuwo.

¹² Joricho dwaro mana timo timbe mamono. Joma kare to timo gik makelo ohala.

¹³ Weche jaricho mako mana en owuon. Ng’at modimbore to tony atonya e chandruok.

¹⁴ Pok ma ng’ato yudo romre gi weche mowacho kendo gi gik motimo.

¹⁵ Pile ng’at mofuwo paro ni en kare. Joma riek to chiko itgi ni puonj.

¹⁶ Ng’at mofuwo nyiso mirimbe piyopiyo. Ng’at mariek to mwonyo ayany.

¹⁷ Adiera kelo bura makare. Miriambo to kelo mana buch amwor.

¹⁸ Weche mimwomruokgo chuoyo chuny mana ka ligangla. Weche mawuok e dho ng’ama kare to kelo ngima.

¹⁹ Adier ok tow nyaka chieng’. Miriambo to ok deki.

²⁰ Joma ochano timbe mamono wuondore kendgi giwegi, to joma timbegi long’o yudo mor.

²¹ Ng’at makare ok gimoro marach yudi. Joricho to chandruok kende ema gineno.

²² Ruoth Nyasaye mon gi jomriambo, to omor gi joma wacho adiera.

²³ Ng’at mariek ok hul riekone. Ng’at mofuwo to nyiso mana fupe.

²⁴ Tich matek miyo ng’ato bedo gi duong’. Samuoyo to miyo ng’ato bedo mana misumba.

²⁵ Parruok miyo chuny ng’ato bedo mool, to weche mabeyo miyo chunye duogo.

²⁶ Ng’at makare nyiso osiepene yo. Joma richo to miyo ji rwenyo arwenya.

²⁷ Jasamwoyo ok nyal yudo gima odwaro, to ng’at matiyo matek yudo mwandu.

²⁸ Tim makare e yo mochiko ngima. Fuwo to em mana yo madhi e tho!