Ngeche 11 - MUMA MALER 2015

¹ Ruoth Nyasaye mon gi joma pimo gik moko gi rapim ma ok ni kare, to rapim makare ema omorgo.

² Josunga yudo wichkuot piyopiyo nono, omiyo ber bedo mamuol.

³ Tim makare ema telo ni joma beyo, to tim miganga tieko joma acheje.

⁴ Chieng’ bura, to mwandu ok nyal konyi. Tim makare to nyalo geng’oni tho!

⁵ Adier, tim makare miyo ng’ato dak maber. Ng’at ma timbene mono to tiekore mana kende owuon.

⁶ Tim makare reso ng’ama kare. Ng’at ma achach, to wuoche owuon ema rwako wino e ng’ute.

⁷ Ka jaricho otho, to genone duto tho kode, kendo geno ma ogenogo mwandune ok kony gimoro.

⁸ Ng’at makare resore e chandruok. Jaricho to nyumore e masira.

⁹ Weche joma ok dew Nyasaye ketho ji, to rieko joma kare ema resogi.

¹⁰ Dala bedo mamor ka joma kare dhi nyime maber, kendo mahu mar mor nitie ka joricho tho.

¹¹ Mier yudo gueth ka joma kare odakie. Weche joricho to ketho mier aketha.

¹² Ng’at maonge gi rieko ema jaro jowadgi. Ng’at mong’eyo gik moko to ling’ aling’a.

¹³ Ng’at ma jafuong’ wach ok hulne weche maling’ling’. Ng’at ma odimbore to kano wach e chunye.

¹⁴ Ka onge ng’at matelo ni ji gi rieko maber, to oganda dok mana chieng’. To ka nitie jong’ad rieko mathoth, to piny dhi nyime maber.

¹⁵ Ka ichung’ ni ng’at ma ok ing’eyo e gowi ma en-go, to nyaka iywag ang’e. Kuom mano, ber ka ibet mabor gi wach makamano.

¹⁶ Dhako malong’o yudo luor, to dhako ma kite rach yudo wichkuot. Ng’at ma jaluoro ok nyal yudo mwandu, to ng’at ma jachir nyaka bed jamoko.

¹⁷ Ng’at ma jang’wono kelo gueth ni en owuon. Ng’at makwiny to hinyore kende.

¹⁸ Ohala ma jaricho yudo ok konye, to ng’at makare yudoo pok man gi ohala.

¹⁹ Ng’at ma oketo chunye kuom tim makare nobed mangima, to ng’at mosiko ka timo richo notho.

²⁰ Ruoth Nyasaye mon gi joma timbegi obam, to ohero joma timo timbe makare.

²¹ Bed king’eyo ni joricho noyud kum. Joma kare to notony.

²² Dhako ma jaber to onge gi rieko, chalo mana gi tere mar dhahabu morwak e um nguruwe.

²³ Joma kare dwaro mana gik makelo gueth. Geno mar joricho to ok kony gimoro.

²⁴ Ng’ato nyalo bet ni pogo ni ji gige gi chuny maler, to pod mwandune medore ameda! Ng’at machielo to nyalo bedo ni kungo malich, to pod omedo mana bedo modhier.

²⁵ Bed mang’won, eka idhi nyime maber. Kony jowadu, eka gin bende gikonyi.

²⁶ Ji kuong’o ng’at ma kungo chambe, ka ritogo nengo maber, to giguedho ng’at magolo mage oko mondo ong’iew.

²⁷ Ng’at madwaro mana gik makare, nyaka winj maber, to ka ng’ato dwaro mana ketho, to richone nyaka dog e wiye owuon.

²⁸ Joma kare nodhi nyime maber, mana ka oboke maloth ndalo chwiri, to jogo ma ogeno kuom mwandugi nolwar mana ka oboke malwar ndalo oro.

²⁹ Ng’at ma miyo joodgi chandruok ok noyud gimoro kata matin, kendo pile ng’at mofuwo bedo misumba ng’at mariek.

³⁰ Tim makare kelo ngima maber. Timbe mahundu to kelo mana tho!

³¹ Ka ng’at maber yudo pokne e piny ka, to ong’ere ni jaricho noyud kum mak orem.