Ngeche 10 - MUMA MALER 2015

Joma kare gi joma richo

¹ Ngeche moko mag Solomon: Wuowi mariek miyo wuon mare bedo mamor, to wuowi mofuwo miyo min mare chuny lit.

² Mwandu muyudo e yo marach ok kony gimoro. Tim makare to reso ji e tho.

³ Ruoth Nyasaye ok we kech neg ng’at makare. Jaricho to otuono gik modwaro.

⁴ Bedo jasamwoyo miyo ng’ato bedo jachan. Tich matek to kelo mwandu.

⁵ Ng’at ma kayo cham ka osechiek en ng’at mariek, to ng’at ma nindo aninda ndalo keyo kelo wichkuot.

⁶ Ng’at makare yudo gueth. Weche jaricho to pando masira.

⁷ Ji nopak nying ng’at makare kosetho. Jaricho to wich wil go.

⁸ Joma riek luwo puonj makare, to joma wechegi ofuwo biro rumo.

⁹ Timbe makare kelo ni ng’ato kue, to ng’at ma timbene obam, chieng’ moro nomaki.

¹⁰ Ng’at ma pando adiera, kelo chandruok, to ng’at ma kwero gimoro e lela, kelo kue.

¹¹ Weche ng’at makare, gin soko mar ngima, to weche jaricho, pando masira e igi.

¹² Sigu kelo miero, hera to umo ketho duto.

¹³ Joma riek pile wacho weche mariek. Joma ofuwo to onego ochwadi.

¹⁴ Joma riek, yudo rieko duto ma ginyalo nwang’o. Ng’at mofuwo kawuoyo, to chandruok ema chiegni.

¹⁵ Mwandu mar jamoko en ohinga ma ogeng’orego. Ng’at modhier to chan ema nego.

¹⁶ Tich matek ema kelo ngima ni ng’at makare. To timbe jaricho kelone mana masira.

¹⁷ Ng’at moyie weche mirieyego nobed mangima, to ng’at motamore kethone obayo yo.

¹⁸ Ng’at mapando sigu manie chunye en jamriambo, kendo jafuong’ wach en ng’at mofuwo.

¹⁹ Ka iwuoyo mang’eny to ichiegni gi richo. Ng’at mariek to ling’ aling’a.

²⁰ Weche ng’at makare chalo gi fedha maler. Paro mag jaricho to onge tich.

²¹ Weche ng’at makare konyo ji mang’eny. Joma ofuwo to tho nikech gionge gi rieko.

²² Gueth moa kuom Ruoth Nyasaye ema kelo ni ng’ato mwandu, kendo mwandu makamano ok kel parruok.

²³ Timbe maricho ema ng’at mofuwo ohero, to rieko ema miyo ng’at mariek mor.

²⁴ Gima jaricho oluoro ema timorene. Ng’at makare to yudo mana gima odwaro.

²⁵ Kalausi tero joricho kuma bor. Joma kare to ogurore motegno nyaka chieng’.

²⁶ Kik iwe jasamwoyo timni gimoro, nikech obiro chaloni ka kedhno marewo dhok, kendo ka iro malungo wang’.

²⁷ Luor Ruoth Nyasaye, eka idag aming’a. Joricho to tho ka ndalogi podi.

²⁸ Geno mar joma kare kelo ngima. Joricho to ok gen gimoro.

²⁹ Ruoth Nyasaye rito joma onge ketho, to otieko joma timo richo.

³⁰ Pile joma kare ok nyal yiengni. Joricho to ok nodag e piny.

³¹ Joma kare wacho weche mariek Lep mawacho weche maricho to ibiro ng’ado oko.

³² Ng’at makare ong’eyo gima onego owachi e sa mowinjore. Joricho to pile wacho gik machwanyo ji.