Ngeche 1 - MUMA MALER 2015

Ber mar Nyasaye

¹ Magi e ngeche mag Solomon wuod Daudi, ruodh Israel,

² ma biro konyi ng’eyo rieko kod puonj maber, kendo winjo tiend weche matut.

³ Ginyalo puonji dak gi rieko, kendo bedo jaadiera e yo makare kendo mowinjore.

⁴ Bende ginyalo miyo joma ok ong’eyo weche mang’eny bed mariek, kendo gipuonjo joma tindo ng’eyo weche mopogore opogore.

⁵ Ngechegi nyalo kata mana medo ng’eyo mar joma riek, kendo menyo yo ni joma nigi winjo,

⁶ mondo ong’e tiend ngeche kod weche matek ma joma riek wach.

Rieko ming’ado ni joma tindo

⁷ Luoro Ruoth Nyasaye e chakruok mar rieko. Joma ofuwo to chayo rieko, kendo ok dwar puonjore.

⁸ Wuoda, chik iti ni gik ma wuoru puonji, kendo kik idagi gik ma meru wachoni,

⁹ nimar puonjgi biro loso kiti maber, mana kaka kondo kata thiwni miyo ng’ato nenore maber.

¹⁰ Wuoda, ka joricho temi, to kik iyienigi.

¹¹ Ginyalo wacho niya, “Bi mondo wabut ni ng’ato, wanegi, kendo wamonj joma onge ketho kayiem nono,

¹² mondo wamwonygi ngili ka bur liel. Kata obedo ni gionge ketho kamano, to wabiro negogi, mi gidhi e Piny Joma Otho.

¹³ Bang’e wakaw mwandu mogundho, mi wapong’ miechwa gi gik mwayako.

¹⁴ Omiyo wadhi kodi, kendo wabiro pogo gik moko duto ma wakwalo.”

¹⁵ Koro in wuoda, kata ka giwachoni kamano, to kik idhi kodgi, bende bed mabor gi timbegi.

¹⁶ Gireto piyopiyo ka gidwaro timo richo, kendo girikni ni chuero remo!

¹⁷ Kata ka ichiko obadho ka winy neno, to pod gimokoe amoka.

¹⁸ Kamano e kaka joricho chiko obadho ni gin giwegi kendo gin ema gimokoe.

¹⁹ Pile mecho hinyo ng’ama jamecho. Chutho, mano e gima timore ni jakuo.

Rieko luongo ji

²⁰ Winjuru kaka rieko goyo koko matek e wang’yore kendo e chirni.

²¹ Bende oluongo matek e dhoranga dala, kod kuonde duto ma ji chokoree.

²² Owacho niya, “Koro un joma ofuwogi, udwaro chalo kama nyaka karang’o? Koso nyaka karang’o ma ubiro tugoe gi rieko? Un ok unyal puonjoru ngang’?

²³ Chikuru itu ka akwerou gimoro. Abiro ng’adonu rieko, kendo abiro puonjou wechena,

²⁴ Asebedo ka aluongou ni mondo ubi, to ok usewinja ngang’, bende ok usedewa!

²⁵ Usedagi rieko duto maseng’adonu, kendo ok useyie mondo anyisu gimoro mutimo marach.

²⁶ Omiyo ka uyudo chandruok, to ananyieru anyiera.

²⁷ Ee, anajaru ajara ka masira obiro kuomu ka koth maduong’, mokelonu thagruok gi rem malit.

²⁸ E kinde ma un e thagruok kamano, unuluonga to ok anaduoku, bende unumanya kuonde duto, to ok unuyuda kamoro amora!

²⁹ Pile ne ok udwar rieko, kendo ne utamoru luoro Ruoth Nyasaye.

³⁰ Ne udagi winjo wachna, bende ne ok udewo puonjna kata ka akwerou gimoro.

³¹ Kuom mano, unuyud gima owinjore kodu, kendo timbeu uwegi noromu!

³² Ji ma ok ong’eyo gik moko tho mana nikech gidagi rieko, kendo joma ofuwo rumo nikech ok gidew gik moko.

³³ To ng’ato ang’ata mowinjo wachna nodag gi kue ka onge gima oluoro.”