Nehemia 4 - MUMA MALER 2015

Jogedo orito wasigu

¹ Kane Sanbalat owinjo ni wagero ohinga mar Jerusalem, mirima nomake ahinya, kendo nojaro jo-Yahudi,

² kopenjo jowetene kod jolweny mane ni Samaria niya, “Jo-Yahudi mayomyomgi dwaro timo ang’o ka? Giparo ni digilos kanyo kendo? Bende diginyal timo misango kendo tieko tich godiechieng’ achiel? Koso giparo ni ginyalo golo kite kuom pidhe ohinga mowang’go, mi gichak gigedgo?”

³ Tobia ja Amon, mane oyudo ochung’ bute, bende nowacho niya, “We gigedi. To kata mana bwe koidho ohingano, to nyaka oruombre piny!”

⁴ “A Nyasachwa, winjie kaka gijarowa. Dwok ayanygi e wigi giwegi, kendo itergi e piny mabor ka joma otue ma ji jaro.

⁵ Kik iwenigi richogi, kendo kik wiyi wil gi kethogi, nikech gisechayo jogedo e lela.”

⁶ Ne wamedo mana gero ohinga mi olworo, kendo borne modhi malo nochopo e kore nimar ji ne nigi chuny mar tich.

⁷ To kane Sanbalat kod Tobia, kaachiel gi jo-Arabu gi jo-Amor kod jo-Ashdod owinjo ni tij gero ohinga mar Jerusalem odhi nyime maber, kendo ni kuonde momukore bende osedin, mirima nomakogi ahinya,

⁸ mi ne gichokore giduto mondo gibi gimonj Jerusalem, kendo gimi ji kihondko.

⁹ Kuom mano ne walamo Nyasachwa, kendo ne waketo askeche ma jorit odiechieng’ gotieno mondo ogeng’gi.

¹⁰ To jo-Juda nowacho niya, “Pidhe mag kuonde momukore ng’eny, to teko joma goologi osedok chien, omiyo ok wanyal medo gero ohinga.”

¹¹ Wasikwa bende nowacho niya, “Wabiro monjogi, mwaneggi, kapok giwinjo kata neno gimoro, mi tich biro chung’.”

¹² Kane jo-Yahudi modak machiegni gi wasikwa obiro irwa, ne giwachonwa jading’eny ni wasikwago biro wuok kuonde duto ma gidakie mondo omonjwa.

¹³ Kane awinjo wachno, nachano ji e dhoutgi, maketo kuonde mane ni thuolo e kor ohinga, ka giting’o ligangla gi tong’ kod atung’.

¹⁴ Eka narango piny kaka chalo, manyiso ruoth kod jotelo gi ji duto niya, “Kik uluorgi, to paruru Ruoth Nyasaye maduong’ kendo malich, kendo uked ni oweteu gi yawuotu gi nyiu gi mondu kod miechu.”

¹⁵ Kane wasikwa owinjo ni wasefwenyo gima gichano timo, kendo ni Nyasaye oseketho parogi, ne giweyowa, mi waduto ne wadhi nyime gi gedo.

¹⁶ Chakre chieng’no, nus mar joga nodhi nyime gi gedo, to nus modong’ noting’o tong’ gi okumba gi atung’, ka girwakore gi akor mag lweny. Jotelo to nokwayo jo-Juda

¹⁷ mane gedo. Joma ne golo pidhe mag kuonde momukorego ne tiyo gi lwedo achiel, to lwedo machielo gimakogo gilweny.

¹⁸ Jogedo bende notiyo ka nigi liganglagi. Ja go tung’ to nochung’ buta.

¹⁹ Naloso gi joka ruoth kod jotelo gi ji duto, ka awacho niya, “Tich duong kendo omamore, omiyo wakelore wakelore kwagedo.

²⁰ Kuom mano, kamoro amora muwinjo ka tung’ ywakie, to yworwauru kanyo, kendo Nyasachwa biro kedonwa.”

²¹ Kamano ne wadhi nyime gi tich, chakre ru piny,, nyaka yuso piny, ka nus ji oting’o tong’.

²² E kindego nawacho ni ji bende niya, “Ng’ato ka ng’ato mondo onind Jerusalem, kaachiel gi jatichne, mondo gibednwa joma ritowa gotieno, kendo joma tiyo godiechieng’.”

²³ Kuom mano, an gi owetena gi joga kod askeche ma rita, ne ok walonyo lepwa, kendo seche duto ne wamako gilwenjwa e lwetwa ma korachwich.