Nehemia 2 - MUMA MALER 2015

Nehemia odhi Jerusalem

¹ Ne en due mar Nisan, e higa mar piero ariyo mar loch ruoth Artaxerxes. Kaka gamo divai ne en tichna, ne akawo divai, mamiyo ruoth, to nakuyo kachung’ e nyime.

² Ruoth nopenja ni “Ang’o momiyo isin, to ok ituo? Nyaka bed ni chunyi chandore.” Kane awinjo kamano, luoro nomaka.

³ Nadwoko ruoth niya, “Ruoth mondo odag aming’a! Akuyo nikech dala moyikie kwerena odong’ nono, kendo dhorangeyene osewang’ gi mach.”

⁴ Ruoth nopenja ni, “Koro idwa ni atimni ang’o?” Nalamo Nyasach polo,

⁵ mi awacho ni ruoth niya, “Ka long’oni, kendo kiyie koda, to yie adhi Juda, nyaka dala moyikie kwerena, mondo achak agere kendo.”

⁶ Ruoth nopenja, ka mikache obet bute, niya, “Wuodhino biro kawi ndalo adi, to ibiro duogo karang’o?” Kuom mano nanyise kar ndalo madwaro, mi oyiena mondo adhi.

⁷ Eka nomedo kwayo ruoth niya, “Kiyi, to miya barupe mondo ater ni ruodhi mag piny man loka aora Yufrate, mondo giyiena akadh nyaka achop Juda.

⁸ To bende miya barua moro mondo adhigo ir Asaf, jarit yiend bunge magi, mondo omiya yien adhi alosgo dhorangeye kama ochiel motegno momanyore gi od ruoth, kendo alosgo ohinga mar dala, kod ot ma abiro dakie.” Ruoth nomiya gik moko duto mane akwaye, nikech Nyasacha ne ni koda.

⁹ Kane achopo kuom ruodhi mag piny man loka aora Yufrate, namiyogi barupe ruoth. Noyudo ka ruoth omiya jotend lweny kod joidh farese mondo okowa.

¹⁰ To kane Sanbalat ja-Horon kod Tobia ja-Amon ma misumba owinjo ni ng’ato osebiro mondo okel dongruok ni jo-Israel, ne gikecho ahinya.

Nehemia ojiwo jo-Yahudi mondo ochak oger ohinga mar Jerusalem

¹¹ Kane achopo Jerusalem nabedo kuno kuom ndalo adek.

¹² Bang’e nakawo jomoko manok, mawuokgo gotieno, to ne ok anyiso ng’ato gima Nyasacha noseketo e chunya mondo atim ni Jerusalem. Ne waonge gi kanyna, mak mana mano mane aidho.

¹³ Nawuok gotieno ka aluwo rangach miluongo ni Ranga Holo, mi achiko Soko mar Thuol, kod Ranga Owuoyo, ka anono kuonde mane ohinga mar Jerusalem omukorego, kaachiel gi dhorangeyene mane owang’ gi mach.

¹⁴ Bang’ mano nadhi e Ranga Soko, machopo e Yap Ruoth, to ne onge kama kanja nyalo kadhoe.

¹⁵ Ne amedo luwo holo gotieno, ka anono ohinga, eka naduogo e dala gi Ranga Holo mane owuokgo.

¹⁶ To jotelo ne ok ong’eyo kuma ne adhiye, kata gima natimo. Bende ne pok anyiso jo-Yahudi gi jodolo gi joka ruoth gi jotelo kod ji duto mane onego kony tich, gima adwaro timo.

¹⁷ To bang’e nawachonigi niya, “Uneno masira ma wantieni, ka Jerusalem odong’ gunda, kendo rangeyene owang’ gi mach. Koro biuru walos ohinga mar Jerusalem mondo wich kuot ma wan go orum.”

¹⁸ Bende nanyisogi kaka Nyasaye nosebet koda, kendo gima ne ruoth owachona mi ne gidwoka niya, “Wachakuru gedo!” Kamano ne gichako tich matek, modhi nyime maber.

¹⁹ To kane Sanbalat ja-Horon gi Tobia ja-Amon ma misumba, kod Geshem ja-Arabu owinjo wachno, ne ginyierowa kendo gicharowa, ka gipenjowa ni, “Ang’o mutimoni? Udwaro ng’anyo ni ruoth koso?”

²⁰ To nadwokogi niya, “Nyasach polo biro gwedhowa, kendo wan jotichne koro wachako gedo. To un uonge migawo kata teko kata mana rapar moro e Jerusalem.”