Nahum 1 - MUMA MALER 2015

Mirimb Ruoth Nyasaye mochulogo kuor

¹ Ma e fweny mane Nyasaye omiyo Nahum ja-Elkosh kuom dala mar Nineve.

² Ruoth Nyasaye en Nyasaye ma janyiego kendo ma jachul kuor gi mirimbe mager. Okano mirima e chunye mondo ochulgo ni wasike kuor.

³ Iye ok wang’ piyo, to en gi teko mathoth. Chutho ok onyal weyo joricho mak okumo. En gi yore moluwo ei kalausi kendo ei ahiti, bende boche polo e buru monyono.

⁴ Kogolo chik, to nembe gi aore duono, mi lokre lowo motwo. Lege mabeyo mag Bashan gi Karmel two, kendo bunge mang’ich man Lebanon wang’.

⁵ Gode madongo gi matindo tetni e nyime, kendo leny nono. Piny duto kod joma odakie bende tungni.

⁶ En ng’a manyalo chomo mirimb Ruoth Nyasaye tir? Koso ere ng’ama nyalo siro gero ma en-go? Mirimbe o oko mana ka aora mar mach, kendo lwendni barore abara e nyime.

⁷ Ruoth Nyasaye ber. En e kar konyruok mar adier ni joma dwaro mondo okonygi ka gin e thagruok, bende ong’eyo ji duto mogeno kuome,

⁸ kendo oresogi e ohula ma raywoyi. Joma opiem kode to otieko chuth, kendo oriembogi koterogi e mudho.

⁹ Un jo-Asuria ere gima omiyo upiem gi Ruoth Nyasaye? Obiro tiekou en owuon! Joma mon kode ok nohedhre piem kode kendo!

¹⁰ Giduto giniwang’ pep mana ka kudho mochoki, kata ka tiang’ motwo.

¹¹ Ng’at machach ni kuomu machano gik maricho kuom Ruoth Nyasaye,

¹² To Ruoth Nyasaye wacho niya, “Kata obedo ni wasigu ng’eny kendo rateke, to ibiro negogi, mi girum chuth. To un jo-Juda, kata obedo ni asandou, to ok anachak asandu kendo.

¹³ Koro abiro chodo nyororo motueugo, mi agolu e tich misumba.

¹⁴ Ruodh Asuria to awachone kama: ‘Asegolo chik mondo nyingi orum chuth! Yawuoti ok nobed ruodhi kari, kendo abiro ketho nyisecheni manie hekalu mari, mi ananegi nikech in gima nono!’ ”

Wach maber owinji ni Nineve oselo

¹⁵ Neyeuru kaka jaote ringo kalor e gode kakelo wach maber mar kue. Owacho niya, “A yaye, un jo-Juda, timuru sewni mau, kendo chiwuru ni Ruoth Nyasaye gik mane usekuong’oru ni unuchiw, nimar joma richo ok nochak olou kendo, nikech osetiekgi chuth.”