Mika 7 - MUMA MALER 2015

Timbe maricho mag jo-Israel

¹ A yaye! Koro achalo ng’ama kech kayo, mobiro pono olemo, to oyudo ka yath odong’ nono, ma onge olemo minyalo cham kata mana ng’owo mamitna manyak atamalo.

² Ji moluoro Nyasaye oserumo e piny Israel, kendo onge kata ng’at achiel makare modong’. Ji duto kichore ni chuero remo, kendo ng’ato ka ng’ato chiko mana ni wadgi obadho.

³ Gitimo timbe maricho gi chunygi duto. Jodongo kwayo gik moko mondo omigi, kendo jong’ad bura chamo asoya, bende jotelo golo chik mana kaka gin ema gihero.

⁴ Kuom mano, kata mana timbegi mabeyo kendo modimbore obam, kendo chalo mana gi bunge motimo kuthe. To koro chieng’ ma Nyasaye kumogie osechopo, mana kaka jonabi mage ne osiemogi ni enotim. Omiyo koro kihondko omakogi.

⁵ Kik iyie gi weche wadu, kendo kik igen kuom osiepeni, to bende nyaka itang’ ni weche miwacho kata mana ni chiegi.

⁶ E ndalogi yawuowi jaro wuonegi, nyiri bende kwedo minegi, kendo mond yawuowi kwedo weg utegi. Kamano wasik ng’ato gin mana joodgi.

Ruoth Nyasaye okelo ler gi warruok

⁷ An to abiro manyo Ruoth Nyasaye. Abiro rito Nyasaye jawarna, kendo Nyasacha biro winjo wachna.

⁸ Yaye wasika, kik ogona siboi, nikech kata obedo ni asepodho, to abiro chung’ kendo. Kata obedo ni adak e mudho, to Ruoth Nyasaye nobedna ler.

⁹ Aseketho e nyim Ruoth Nyasaye omiyo ayie mirimbe nyaka ochwaka, mi ong’adna bura maber, kendo ogola oko e ler, mi ane ni otimo gima kare kaka nosingore.

¹⁰ Bang’e wasika mane penja ni, ‘Ere Nyasachi nogono?’ None gima osetimore, mi wigi nokuodi. Eka ananegi ka oselogi, kendo onyon-gi piny ka chuodho ma e wang’ yo.

¹¹ E ndalo gogo, un jo-Jerusalem unuchak uger ohingau, kendo unuyar tong’ pinyu,

¹² mi jou noduog iru koa kuonde duto. Ginia Asuria yo wuok chieng’, kod Misri, yo milambo, kendo ginia e dho nembe gi gode duto.

¹³ To piny nokethre, mi lokre thim, nikech timbe maricho mag joma odakie.

Ruoth Nyasaye okecho jo-Israel

¹⁴ A Ruoth Nyasaye, rit jogi miseyiero, kaka jakwath kawo luth, kendo kwayogo jambe. Gidak mana kendgi e thim, ka piny momew olworogi koni gi koni. To we mondo gikwa e lege mag Bashan gi mag Gilead, kaka ne gitimo chon.

¹⁵ Timnwa honni kaka nitimo e kinde mane iwuokie Misri.

¹⁶ Ogendini one honnigo, mondo luoro omakgi, kata obedo ni gitek kamano. Giniling’ thi, kendo ok giniwinj gimoro.

¹⁷ Gininang’ lowo mana ka thuol, kendo giniwuog kuonde ma gipondoe mana ka gik malak piny. Giniduog ir Ruoth Nyasachwa ka giluor kendo ka gitetni.

¹⁸ A Ruoth Nyasaye, onge Nyasaye moro maromo kodi. Iweyo ni jogi iwuon modong’ richogi, kendo ok ikechi nyaka chieng’, to iherowa gi hera mosiko.

¹⁹ Inichak ikechwa kendo, mi inyon richowa e tiendi, kendo inyumgi e bwo nam.

²⁰ Initim gima kare, kendo iniher jo-Israel ma nyikwa Ibrahim gi hera mosiko, mana kakane isingori ni kwerewa chon.