Mika 5 - MUMA MALER 2015

¹ Un jo-Jerusalem, ng’oluru dendu manyiso ni un gi kibaji, nimar wasikwa olworowa, kendo gigoyo lemb jatend Israel gi luth.

Loch jawar moa Bethlehem

² Bethlehem Efratha, in e dala matinie moloyo miech Juda duto. To kuomi ema jatend Israel biro wuokie, ma anywolane nitie nyaka nene.

³ Kuom mano, Ruoth Nyasaye biro weyo joge e lwet wasikgi nyaka dhako ma muoch kayo nywol wuode. Bang’e jowete wuowino modong’ mak otho e tuech, noduogi mi chak riwre gi jowetegi.

⁴ To wuowino nobi, mi nobed jatend joge, koritogi gi teko kod duong’ moa kuom Ruoth Nyasaye. Joge nodag maber, nikech ji duto manie piny noyie lochne,

⁵ mi enobed ng’at makelo kue. Ka jo-Asuria omonjo pinywa, mi omwomo miechwa mochiel motegno, to wanaor jotendwa marateke moloyo, mondo oked kodgi,

⁶ mi giniketh piny Asuria gi lweny. Ginireswa ka jo-Asuria monjo pinywa.

⁷ Jo-Israel modong’ mak otho nochal ni ogendini mang’eny ka koth ma Ruoth Nyasaye okelo ni cham, nikech dhano ok nyal kelo koth, to Nyasaye ema kele.

⁸ Ee, jo-Israel motony nobed e kind ogendini mana ka sibuor ma dwaro le e bungu, kata madwaro rombe e lek. Ka odonjo kuom rombe to opodho kuomgi kendo okidhogi matindo tindo ma onge ng’ama resogi.

⁹ Jo-Israel biro loyo wasikgi mi tiek pep.

¹⁰ Ruoth Nyasaye wachonu un jo-Israel niya, “E kindeno ananeg fareseu kendo naketh gecheu mag lweny.

¹¹ Anaketh miechu, mi amuk kuondeu duto mochiel motegno mag siro lweny.

¹² Abiro ketho timbe ajuoke duto, kendo ok nuchak ubed gi jokor wach kata achiel.

¹³ Abiro ketho nyiseche manono gi sirni milamo, kendo ok unuchak ulam gik ma uloso uwegi.

¹⁴ Abiro muko sirni milamo e pinyu, mi aketh miechu,

¹⁵ to bende abiro chulo kuor gi mirimba mager ni ogendini ma ok oseluora.”