Mika 3 - MUMA MALER 2015

Okwed jotend Israel

¹ Un jotend Israel winjuru! Donge en tichu, ng’ado bura makare?.

² To kata kamaano, umon gi gima ber, kendo uhero mana gima rach! Usando joga malit mana ka ondiek makidho rombo kendo yuyo ring’o oko kuom choke,

³ kata ka ng’ato maturo chok chiayo, kendo kango ring’o mondo otedi, ocham!

⁴ Kinde biro ma unuywagie ni Ruoth Nyasaye, to ok nodwoku, kata mana winjo lemou ok nowinji, nikech timbe maricho musetimo.

⁵ Ruoth Nyasaye wacho niya, “Jonabi wuondo joga ka nyiso joma miyogi gik moko ni gibiro yudo kue, to joma ok migi gimoro, to gibwogo ni gibiro kelonigi lweny.

⁶ Kuom mano ok ginichak giyud fweny moro gotieno, kendo ok ginichak gibed gi teko mar koro wach. Ler ma gineno nolokre mudho, kendo wang’chieng’ biro podhonigi.

⁷ Joma koro wach wigi biro kuot, nikech Nyasaye ok dwokgi.”

⁸ To an, Roho mar Ruoth Nyasaye opong’a, momiya teko gi rieko kod chir mar nyiso jo-Israel richogi.

⁹ Winjuru, un jo-Israel mochayo timbe makare, kendo ma loko adiera bedo miriambo.

¹⁰ Ugero Jerusalem, dala Nyasaye, gi remo kendo e yo mamono.

¹¹ Jodong dala ng’ado bura maber mana ni joma miyogi asoya; jodolo bende lero tiend chik ni joma miyogi gimoro, kendo jonabi hulo gik ma gikoro mana ka omigi pesa. To eka pod gineno ni Ruoth Nyasaye biro konyogi! Giwacho niya, “Donge Ruoth Nyasaye ni kodwa? Omiyo onge masira moro mabiro makowa.”

¹² Gik mutimo ma kamagogo biro miyo ipuro Sayun ka puodho, mi Jerusalem lokre gunda, kendo god Hekalu lokre bungu.