Mariko 4 - MUMA MALER 2015

Ngech jachuoyo

¹ Yesu nochako puonjo ji kendo e dho nam Galili. Oganda mane ochokore molwore ne duong’ ahinya, omiyo nodonjo e yie mobetie. Yieno ne nie pi, ka ji to ochung’ gi oko e dho pi.

² Nopuonjogi weche mang’eny gi ngeche, kendo kane opuonjogi kamano, nowacho niya,

³ “Winjuru! Ng’at moro ne odhi chuoyo,

⁴ kendo kane oyudo ochuoyo, kodhi moko nolwar e wang’yo, mi winy obiro mochamo.

⁵ To kodhi moko nolwar kama otimo lwanda ma lowo operoree, mi ne gitwi piyo, nikech lowo ne ok tut.

⁶ Bang’e chieng’ nowuok, mowang’o cham mapod tindogo, kendo kaka tiendegi ne ok nyal donjo matut, ne gitwo piyopiyo.

⁷ Kodhi moko to ne olwar e kind kudho, kendo kudhogo nodongo mothung’ogi, mi ok ginyak.

⁸ To kodhi moko nolwar e lowo maber, omiyo ne gitwi, mi gidongo, kendo ginyak. Moko nonyago kodhi piero adek, to moko piero auchiel, kendo moko mia achiel.”

⁹ Eka Yesu notieko, ka wacho niya, “Ng’at man gi it mar winjo, to mondo owinji!”

Gimomiyo Yesu puonjo gi ngeche

¹⁰ Kane Yesu odong’ kende, jopuonjrene apar gariyo kod jomoko mane oyudo ochokore kanyo, nopenje mondo onyisgi tiend ngechego.

¹¹ Nodwokogi niya, “Un osemiu wach mopondo mar Loch Nyasaye, to joma moko ipuonjo weche duto mana gi ngeche, kaka muma wacho niya,

¹² ‘Kata da ging’ichi manadi, to ok ginyal ng’eyo, kendo kata da giwinji manadi, to wach ok nyal donjonigi, nimar dipo ka giloko chunygi, mi owenigi richogi’.”

Tiend ngech jachuoyo

¹³ Eka Yesu nopenjogi niya, “Ok uwinj tiend ngeroni adier? Ka kamano, to koro ere kaka duwinj tiend ngero moro amora?

¹⁴ Gima jachuoyo chuoyo en Wach Nyasaye.

¹⁵ To kodhi molwar e wang’yo e joma ochwo wachno e chunygi, kendo ka gisewinje to Satan biro, kendo gole oko kuomgi.

¹⁶ To kodhi mochwo e lowo motimo lwanda e joma winjo wachno, mi yie kode piyopiyo gi mor,

¹⁷ to ok omok e chunygi. Omiyo ok gidag aming’a, kendo ka chandruok kata sand moro obiro nikech wachno, to gipodho piyopiyo nono.

¹⁸ To jomoko bende chalo gi kodhi mochwo e kind kudho. Gin joma winjo wachno,

¹⁹ to paro mag piny kod ber mag mwandu, gi gombo mar gik moko, donjo e chunygi, kendo thung’o wachno, mi wachno ok nyag gimoro.

²⁰ Jomoko to chalo gi kodhi mochwo e lowo maber. Giwinjo wach, mi giyiego, kendo ginyak maber, mana ka kodhi, ma moko nyak piero adek, to moko piero auchiel, kendo moko mia achiel.”

Ngech taya

²¹ Eka Yesu nomedo wacho niya, “Bende ng’ato nyalo moko taya, to aye umo gi atonga, kata keto e bwo kitanda? Donge okete mana e wi rachungi taya?

²² Gimoro amora mopandi nyaka ng’ere achien, kendo gimoro amora moum nyaka elre.

²³ Ng’at man gi it mar winjo, to mondo owinji.”

²⁴ Bende nowachonigi niya, “Chikuru itu maber ni gima iwachonu. Rapim ma upimoe ema un bende nopimnue, to bende nomednu moloyo,

²⁵ nimar ng’at man-go ema nomedi to ng’at maongego, noma kata mana matin ma en-go!”

Ngech cham madongo kende

²⁶ Yesu nodhi nyime kawachonigi niya, “Loch Nyasaye chalo gi ng’at mochwoyo kodhi e puothe.

²⁷ Onindo gotieno, kendo ochiew gokinyi, to e kindego duto kodhigo twi kendo dongo adonga, ka ento okia kaka mano timore.

²⁸ Lowo ema miyo cham dongo. Mokwongo cham twi kaka lum, eka omino, to bang’e omoyo.

²⁹ Ka cham osechiek, to ng’atno kawo pand keyo mak odeko, kendo okeyogo, nikech kinde mar keyo osechopo.”

Ngech koth karadali

³⁰ Bende nopenjo niya, “Ere gima dwapimgo Loch Nyasaye? Koso ngero mane ma dwanyisgo kaka ochal?

³¹ Ochal gi koth karadali, ma en kodhi matinie moloyo. Ka ng’ato okawe, mopidhe,

³² to odongo kendo odoko yath maduong’ie moloyo yien duto. Bedene yarore madongo, kendo winy nyalo biro, mi yue e tipone.”

³³ Yesu nopuonjo ji wachne gi ngeche mang’eny makamago mane ginyalo winjo.

³⁴ Ne opuonjogi mana gi ngeche, to bang’e kane odong’ gi jopuonjrene kende, to onyisogi tiend weche duto.

Yesu okueyo ahiti

³⁵ Chieng’no godhiambo, Yesu nowacho ni jopuonjrene niya, “Wang’aduru nam, mondo wadhi loka cha.”

³⁶ Kamano ne giweyo ji kanyo, mi jopuonjrene nodonjo e yie mane oyudo entie, mi ne gidhi kode. Yiedhi moko bende ne ni kodgi.

³⁷ Bang’e ahiti mang’ongo notugore, kendo apaka ne goyo yie ma koro pi ne chiegni pong’e.

³⁸ Yesu noyudo nindo kapier yie, koteno wiye gi raten. Eka jopuonjrene ne jochiewe, kawachone niya, “Japuonj, watho, to ok idew?”

³⁹ Yesu noa malo, mokwero yamo, kendo owacho ni nam ni, “Ling’! Pie!” Gikanyono yamo noweyo kudho, mi nam okue.

⁴⁰ Bang’ mano, Yesu nopenjo jopuonjrene niya, “Ang’o momiyo uluor? Koso pod ok uyie?”

⁴¹ To ne giluor ahinya, mi gipenjore niya, “Ma en ng’ama nadi, ma kata mana yamo gi apaka bende winje awinjani!”