Mariko 16 - MUMA MALER 2015

Chier mar Yesu

¹ Kane chieng’ Sabato oserumo, Maria nyar Magdala gi Salome kod Maria min Jakobo ne jong’iewo mo mang’ue ng’ar mondo gidhi giwirgo ringre Yesu.

² Ne gichopo kar liel gokinyi mang’ich, chieng’ Jumapil, ka chieng’ wuok.

³ To kane pod gin e yo gidhi, ne gipenjore niya, “Ng’ano ma ang’ nong’ielnwa kidi molorgo dho liel?”

⁴ To kane giting’o wang’gi, ne gineno ka kidino oseng’iel dire, kata obedo ni ne en kidi maduong’ ahinya kamano.

⁵ Kuom mano, ne gidonjo e bur, mi ginwang’o wuowi moro morwako kandhu marachar kobet e bath bur korachwich, mi gibwok ahinya.

⁶ To wuowino nowachonigi ni, “Kik ubwogi. Ang’eyo ni udwaro Yesu ja-Nazareth manyocha ogur e msalaba. To osechier, oonge ka. Neuru! Kaeri e kama nyocha giketee.

⁷ Koro dhiuru unyis jopuonjrene, kaachiel gi Petro, niya, ‘Otelo nyimu odhi Galili, kendo ubiro nene kuno kaka nowachonu.’ ”

⁸ Kamano mon-go nowuok oko, moringo oa kar liel, nikech kibaji malich nomakogi. To ne ok giwachone ng’ato gimoro amora, nikech ne giluor. [

Yesu ofwenyore ni Maria nyar Magdala

⁹ Kane Yesu osechier gokinyi mang’ich chieng’ Jumapil, nofwenyore ni Maria nyar Magdala, mane osegolone jochiende abiriyo.

¹⁰ Dhakono nodhi mohulo wachno ni joma yande wuotho gi Yesu, mane oyudo okuyo kendo ywak.

¹¹ To kane giwinjo kowacho ni Yesu ngima, kendo ni osenene, ne ok giyie wachne.

Yesu ofwenyore ni jopuonjrene ariyo

¹² Bang’e Yesu nofwenyore ni jopuonjrene ariyo e kido machielo, kane oyudo gidok thurgi.

¹³ Ne giduogo mi ginyiso jopuonjre mamoko wachno, to ne ok giyie kodgi.

Yesu ofwenyore ni jopuonjre apar gachiel

¹⁴ Bang’e mogik, Yesu nofwenyore ni jopuonjrene apar gachiel kane oyudo gichiemo. Noseyogi nikech ne gisedagi yie, kendo nikech chunygi ne tek, ma ok ginyal yie wach joma ne onene kosechier.

¹⁵ Eka nowachonigi niya, “Dhiuru e piny duto, uland Wach Maber ni ji duto.

¹⁶ Ng’ama oyie kendo obatisi, nokwo, to ng’ama ok oyie, bura nolo.

¹⁷ Ranyisi ma joma oyie nobedgo e magi: Ginigol jochiende e nyinga, kendo ginidhum gi dhok mawendo,

¹⁸ bende ka gimako thuonde, kata kapo ni gimadho kwiri moro marach, to ok ginihinyre ngang’! Giniket lwetgi kuom joma tuo, mi changi.”

Oter Yesu e polo

¹⁹ Kane Ruoth Yesu osewuoyo kodgi kamano, ne otere e polo, mi obet e bat korachwich mar Nyasaye.

²⁰ Bang’ mano, jopuonjrene nodhi molando Wach Maber kuonde duto, ka Ruoth tiyo kodgi, kendo siro wachno gi ranyisi.]