Luka 24 - MUMA MALER 2015

Chier mar Yesu

¹ Gokinyi mang’ich, chieng’ Jumapil, mon-go nodhi e liel, koting’o gik mang’ue ng’ar mane giseloso.

² Ne giyudo kidi mane odin-go dho bur koseng’iel,

³ to kane gidonjo to ne ok ginwang’o ringre Ruoth Yesu.

⁴ Kane pod gichung’ kanyo, ka gihum nono kuom wachno, ne gipo ka ji ariyo morwako lewni mang’ang’ni ochung’ butgi.

⁵ Mon-go nobwok ahinya, mosiko mana ka okulo wigi piny. To jogo nopenjogi niya, “Marang’o umanyo ng’at mangima e kind joma otho?

⁶ Osechier! Oonge ka. Paruru gima ne owachonu kane pod en Galili, ni

⁷ ‘Wuod Dhano nyaka ket e lwet joricho, mi gur e msalaba, to chieng’ mar adek enochier.’ ”

⁸ Mon-go noparo wachno,

⁹ kendo kane gidok gia e liel, ne ginyiso joote apar gachiel kod ji mamoko duto wechego.

¹⁰ Mon-go ne Maria nyar Magdala, gi Joana, gi Maria min Jakobo, kod mon moko mane ni kodgi. Gin ema ne gitero wechego duto ni joote.

¹¹ To joote nokawo wechegigo koyuma, mi odagi yiego. [

¹² Petro to noa malo, moringo odhi e liel, kendo kane okulore morango liel, ne ok oneno gimoro mak mana lewni kende. Eka ne odok Jerusalem, kowuoro gima otimore.]

Yesu ofwenyore ni jopuonjre ariyo kadhi Emau

¹³ Chieng’ onogo, jopuonjre ariyo ne dhi e dala moro miluongo ni Emau, ma en kama dirom wuodh seche ariyo, kia Jerusalem.

¹⁴ Ne giwuoyo kuom gik mane otimore,

¹⁵ to kane oyudo giwuoyo kamano, Yesu owuon nobiro mosudo butgi, kendo ne giwuotho kaachiel.

¹⁶ To ne ok ginyal ng’eye.

¹⁷ Nopenjogi niya, “Wach ang’o muwacho kendu kuwuothoni?” Eka ne gichung’, ka gimieno wang’gi.

¹⁸ To achiel kuomgi ma nyinge Kleopa nodwoke, kapenje niya, “In kendi e wendo Jerusalem ma ok ong’eyo gik mosetimore kuno e ndalogi koso?”

¹⁹ Nopenjogi ni, “En ang’o mosetimore?” Eka ne gidwoke ni, “Yesu ja-Nazareth ne janabi ma wechene gi timbene ne nigi teko e nyim Nyasaye kod ji duto.

²⁰ To jodolowa madongo kod jodongo nondhoge mondo ong’adne buch tho, mi nogure e msalaba.

²¹ To wan ne wageno ni en ema dores Israel! Bende koro en ndalo adek nyaka gigo timre.

²² To mon moko manie kanyakla marwa nende obwogowa gi wach. Nende gimondo e liel,

²³ to ne ok ginwang’o ringre Yesu. To kane giduogo, ne ginyisowa ni malaika moko ne ofwenyorenigi, monyisogi ni ongima.

²⁴ Eka jowa moko nodhi e liel, monwang’o mana kaka ne mon-go onyisowa. Yesu owuon to ne ok gineno.”

²⁵ Kane gisetieko wuoyo kamano, Yesu nowachonigi niya, “Yaye un joma ofuwo! Mano kaka ung’ulni kuom yie gik moko duto mane jonabi owacho!

²⁶ Donge ne owinjore ni nyaka Mesia ne masichegi kapok oyudo duong’ne maler koso?”

²⁷ Bang’ mano, Yesu nonyisogi weche mane jonabi duto ondiko.

²⁸ Ne gichopo machiegni gi dala mane gidhiye, to Yesu ne nenore ni pod dwaro dhi nyime.

²⁹ To ne gigeng’e, ka giwachone ni, “Yie wadhi kodi ka, nimar sa koro oniang’, kendo piny chiegni yuso.” Kuom mano, nodhi kodgi.

³⁰ Kane oyudo obet piny kodgi mondo gichiem, nokawo makati, moguedho, kendo ong’ingo, momiyogi.

³¹ Eka wang’gi noyepo, mi ging’eye, to ne gipo ka olal nono e wang’gi!

³² Bang’e ne giwacho e kindgi giwegi niya, “Donge ne chunywa mor, kowuoyo kodwa e yo, kendo konyisowa tiend weche mondiki e Muma?”

³³ Gikanyono ne gia malo, mi gidok Jerusalem. Ne giyudo joote apar gachiel, kochokore gi joma ne gin-go,

³⁴ kawacho niya, “Ruoth osechier adier, kendo osefwenyore ni Simon!”

³⁵ Eka jopuonjre ariyogo bende nohulo gima ne osetimore e yo, kendo kaka ne ging’eyo Ruoth kong’ingo makati.

Yesu ofwenyore ni jootene

³⁶ Kane pod giwacho wechego ne gipo ka Ruoth owuon ochung’ e diergi, kawachonigi ni, “Okueuru!”

³⁷ To ne gibwok, kendo ne gidoko maluor ngang’, ka giparo ni gineno jachien.

³⁸ Nopenjogi niya, “Ang’o momiyo chunyu parore? Koso marang’o uriwo gi kiawa?

³⁹ Neuru luetena gi tiendena, mondo ung’e ni en mana an! Mulauru, mondo une, nikech jachien onge gi ringruok kaka uneno an-goni!”

⁴⁰ Kane osewacho kamano, nonyisogi luetene gi tiendene.

⁴¹ To ne pod ok ginyal yie, nikech pod ne giwuoro kendo gimor, omiyo nopenjogi niya, “Bende un gi chiemo kaeri?”

⁴² Ne gimiye rech motedi,

⁴³ mi okawo, kendo ochamo mana e nyimgi kanyo.

⁴⁴ Nowacho nigi niya, “Magi e gik mane awachonu kapod an kodu, kane anyisou ni gik moko duto mondik kuoma e Chik Musa gi Kitepe Jonabi kod Zaburi nyaka timre.”

⁴⁵ Eka nomiyogi rieko mar winjo tiend weche mondiki e Muma,

⁴⁶ kendo nowachonigi niya, “Ondiki e Muma ni Mesia nyaka sandi, mi chier kuom joma otho chieng’ mar adek,

⁴⁷ mondo wach loko chuny olandi ni ogendini duto, chakre Jerusalem, mondo owenigi richogi e nyinge.

⁴⁸ Un muneno wechegi ema nyaka unyis ji mamoko.

⁴⁹ To bende ng’euru ni abiro oronu mich mane Wuora osingore ni nomiu, to beduru abeda Jerusalem nyaka chop uyud teko moa malo.”

Oter Yesu e polo

⁵⁰ Eka nogologi Jerusalem, moterogi machiegni gi Bethania, mi noting’o lwete moguedhogi.

⁵¹ To kane oyudo oguedhogi kamano, ne opogore kodgi, kendo noting’e malo odhi e polo.

⁵² Ne gilame, to bang’e ne gidok Jerusalem ka gimor ahinya,

⁵³ kendo ne gisiko e Hekalu pile ka gidendo Nyasaye.