Kwan 9 - MUMA MALER 2015

Rito Sap Pasaka

¹ E due mokwongo mar higa mar ariyo kane jo-Israel osewuok e piny Misri, Ruoth Nyasaye nowacho ni Musa e thim Sinai niya,

² “Jo-Israel nyaka tim Sap Pasaka e kinde moketne.

³ Unutime godhiambo chieng due apar gang’wen mar dueni, kendo unutime pile e kinde moketneno, ka uluwo chikene duto.”

⁴ Kuom mano Musa nochiko jo-Israel mondo otim Pasaka,

⁵ kendo ne gitime godhiamb chieng’ due apar gang’wen mar due mokwongo, e thim Sinai, ka giluwo chike mane Ruoth Nyasaye omiyo Musa.

⁶ To noyudo jomoko odoko mogak, nikech ne gisemulo ng’at motho, omiyo ne ok ginyal timo Pasaka chieng’ moketi. Kuom mano ne gidhi ir Musa gi Harun chieng’ onogo,

⁷ mi giwacho niya, “Wagak, nikech wasemulo ng’at motho. To koro mano dimonwa kelo ni Ruoth Nyasaye chiwowa chieng’ moketi, kaachiel gi jo-Israel mamoko koso?”

⁸ Musa nodwokogi niya, “Rituru mondi nyaka chop ang’e gima Ruoth Nyasaye biro wacho kuomu.”

⁹ Ruoth Nyasaye nowacho ni Musa ni mondo onyis jo-Isarel niya,

¹⁰ “Ka ng’ato kuomu, kata kuom nyikwau, odoko mogak kuom mulo ng’at motho, kata ka en e wuoth kuma bor, to nyaka pod enotim atima ni Ruoth Nyasaye Sap Pasaka,

¹¹ kar timogo e due mokwongo, to ng’at ma kamano notime e due mar ariyo, due apar gang’wen, godhiambo. Chiayo mitimogo Pasakano nyaka cham gi makati ma ok ketie thowi, kod alot makech.

¹² Kik lembe moro dong’ nyaka okinyi, kendo kik tur choke kata achiel. Pasaka nyaka tim mana kaka chik dwaro.

¹³ Ka nga’to odagi timo pasaka, to ok ogak, kata ok odhi e wuoth kuma bor, to nyaka ng’ad kare oko kuom ogandagi, nikech ok osekelo ni Ruoth Nyasaye chiwo e kinde moketi. Ng’at ma kamano noyud kum kuom kethone.

¹⁴ “Ka japiny moro odak kuomu, to en bende nyaka otim ni Ruoth Nyasaye Sap Pasaka, koluwo chike moketi duto. Chik achielno omako jadak gi ja-Israel machalre.”

Bor Polo ewi Hema Maler

¹⁵ Chieng’ mane giguroe Hema Maler, ma en Hemb Rapar, bor polo ne oime, to godhiambo ler machal gi mach nothinyore e wiye, mosiko kanyo nyaka okinyi.

¹⁶ Kamano bor polo noime godiechieng’, to gotieno ne nitie ler machal gi mach.

¹⁷ E kinde akinda mane bor polo oa ewi Hema Maler, jo-Israel ne pudho hembegi kendo ne gichak gigurogi kamoro amora ma bor polo ochung’ie.

¹⁸ Ne gichako wuoth mana ka Ruoth Nyasaye ochikogi, kendo ne giguro hembegi mana ka Ruoth Nyasaye ochikogi, mi gibed kanyo kuom kinde duto mane bor polo ni ewi Hema Maler.

¹⁹ Kane bor polo obet aming’a ewi Hema Maler, to jo-Israel nosiko ka lemo alema e nyim Ruoth Nyasaye, kendo ne ok gidhi nyime gi wuoth.

²⁰ Kamano bende kane bor polo obet ewi Hema Maler mana kuom ndalo manok, to ne giguro hembegi kendo gimukogi mana kaka Ruoth Nyasaye ochikogi.

²¹ Bende ne nitie kinde moko mane bor polo bet ewi Hema Maler chakre odhiambo nyaka okinyi kende, to oa gokinyino, kendo jo-Israel dhi nyime gi wuoth. Kane bor polo oa ewi Hema Maler, to ne gichako mana wuoth, bed ni en otieno kata odiechieng’.

²² Kata bed ni ne obet ewi Hema Maler kuom ndalo achiel kata ndalo ariyo, kata kuom due kata higa, kata bed ni obudho marom nadi, to jo-Israel ne bet mana e kambi to ne gichako wuoth mana ka oa ewi Hema Maler.

²³ Ne giguro hembegi kendo gipudho mana ka Ruoth Nyasaye ochikogi. Kamano ne gilamo Ruoth Nyasaye kaluwore gi chik mane Ruoth Nyasaye omiyo Musa.