Kwan 5 - MUMA MALER 2015

Ogol joma ogak e kambi

¹ Ruoth Nyasaye nowacho ni Musa niya,

² “Chik jo-Israel ni joma nigi tuo dhoho, kata man gi nyach machuer, kata mogak nikech omulo gimoro motho, mondo ogol e kambi.

³ Nyaka uketgi gidag oko mar kambi, bed ni gin chwo kata mon, mondo kik gidwany kambeu, kuonde ma adake kodu.”

⁴ Omiyo jo-Israel nogolo joma nigi tuoche ma kamago e kambi, mana kaka Ruoth Nyasaye nonyiso Musa.

Chik mar chudo kuom ketho

⁵ Ruoth Nyasaye nochako owacho ni Musa

⁶ mondo onyis jo-Isarel kama: “Ka ng’ato otimo marach ni wadgi, mi oketho e nyim Ruoth Nyasaye, bed ni en dichwo kata dhako, to mano omiyo obedo jaketho, kendo en gi gowi ma nyaka ochul.

⁷ Nyaka ohul ketho mosetimono, kendo nyaka ochul ng’at mokethoneno gima oromo gi kethono, komedoe achiel kuom abich.

⁸ Ka ng’atno osetho, to oonge gi jaodgi mahie ma dichul kuom kethono, to chudono kaachiel gi im ma jadolo pwodhogo jakethono nobed mar Ruoth Nyasaye, kendo nodong’ ni jadolo.

⁹ “Mich moyiedhi duto ma jo-Israel kelo nobed mag jadolo.

¹⁰ Enokaw mich moyiedhi duto, bende gimoro amora momiye nobed mare.”

Chik mar tieko chich

¹¹ Ruoth Nyasaye nochako owacho ni Musa

¹² ni mondo onyis jo-Israel niya, “Nyalo bet ni chi ng’ato oketho,

¹³ koterore gi ng’ato, ka chwore kia. Kodwanyore kamano ling’ling’, ma onge janeno kata kaonge ng’ama ojuke,

¹⁴ to bang’e gimoro otimore momiyo chwore ochich kode,

¹⁵ to nyaka chwore tere ir jadolo, bed ni dhakono osedwanyore adier, kata chwore chich mana kode kayiem. Chwore nyaka kel mogo mayom moromo kilo abiriyo kaka chik dwaro, to kik oolie mo, bende kik oketie ubani, nimar en misango mar cham mitiekogo chich, tiende ni misango mifwenyogo adiera.

¹⁶ Jadolo nokel dhakono e nyim Ruoth Nyasaye,

¹⁷ eka notwom pi maler gi tawo, kendo nojuk lop dier ot mar Hema Maler, mi noruw gi pigno.

¹⁸ Kosekelo dhakono e nyim Ruoth Nyasaye, to nogony yie wiye, eka noket misango mar cham mifwenyogo adiera e lwete. En misango mar cham mitiekogo chich. To jadolo noting pi mar muma mafwenyo adiera e lwete owuon.

¹⁹ Bang’ mano nomi dhakono kuong’re, kowachone niya, ‘Ka ng’ato ok oseterore kodi, kendo ok iseketho kidwanyori, to in chi chwori, to pi mar muma mafwenyo adierani kik hinyi.

²⁰ To ka en adier ni iseketho kidwanyori, mi ng’ato oterore kodi, to in chi chwori,

²¹ to Ruoth Nyasaye mondo omi iyi okirre, kata omi ibuog nyathi ka kindeni mar nywol pok ochopo, kibedogo ranyisi ni jou kuom wach kuong’ruok.

²² Pigni mondo odonj e iyi, kendo omi iyi okirre, kata omi ibuog nyathi ka kindeni mar nywol pok ochopo.’ Ka jadolo osemiyo dhakono okuong’ore kamano, to dhakono nodwok ni, ‘Obed kamano.’

²³ “Eka jadolo nondik weche mag kuong’go e kalatas, to nolwokgi gi pi mar muma mafwenyo adiera.

²⁴ Bang’e nomi dhakono pigno omodhi mi donj e iye.

²⁵ Jadolo nokaw misango mar cham mitiekogo chich e lwet dhakono, mi nochiwe e nyim Ruoth Nyasaye ka mich moyiedhi. Bang’ mano nokel mogono e kendo mar misango,

²⁶ mi nojuk sanja, kendo nowang’ ka rapar e kendo-mar-misango, eka nochak omi dhakono modh pigcha.

²⁷ Ka en adieri ni osedwanyore, koterore, to en chi chwore, to ka jadolo osemiye pigno omodho, to iye nokirre, kata nobuogi ka kindene mar nywol pok ochopo, kendo nyinge nobed mokwong’ e nyim jogi.

²⁸ To ka dhakono ok osedwanyore kendo adier oler, to ok noyud hinyruok, to nonywol anywola maber.

²⁹ “Mano e chik mar weche mag chich, ma ka chi ng’ato oketho, mi odwanyore,

³⁰ kata ka chwore ochich achicha kode, to nyaka okele e nyim Ruoth Nyasaye, mi jadolo timne kaka chikno dwaro.

³¹ Dichwo nobed maonge ketho, to chiege nyaka yud kum kuom kethone.”