Kwan 32 - MUMA MALER 2015

Jo-Reuben gi jo-Gad kod nus jo-Manase omi piny man yo wuok chieng’ mar aora Jordan

¹ Jo-Reuben kod jo-Gad ne nigi jamni mang’eny, kendo kane gineno ka piny Jazer kod piny Gilead nigi lege mabeyo,

² ne gibiro ir Musa gi Eleazar jadolo kod jodong oganda, mi giwacho nigi niya,

³ “Piny moting’o Ataroth gi Dibon gi Jazer gi Nimra gi Heshbon gi Eleale gi Sebam gi Nebo kod Beon

⁴ ma Ruoth Nyasaye osekawo ka jo-Israel neno, en piny man gi lek maber mar jamni, kendo ung’eyo ni wan jopith jamni.

⁵ Kuom mano ka uyie kodwa, to miwauru pinyno obed marwa. Kik wang’ad aora Jordan.”

⁶ To Musa nopenjo jo-Gad kod jo-Reubengo niya, “Udwaro ni mondo joweteu odhi oked e lweny ka un to udong’ ka?

⁷ Ere gimomiyo unyoso chuny jo-Israel mondo kik ng’ad loka, odhi e piny ma Ruoth Nyasaye osemiyogi?

⁸ Mano e gima ne wuoneu otimo kane aorogi ka wan Kadesh-barnea mondo gidhi gicheng piny Kanaan.

⁹ Ne gidhi mi gichengo pinyno nyaka holo mar Eshkol, to kane gidwogo ne ginyoso chuny jo-Israel ni ok ginyal dhi kawo piny mane Ruoth Nyasaye osemiyogi.

¹⁰ Mirima mager nomako Ruoth Nyasaye chieng’no, mi okuong’ore niya,

¹¹ ‘Jo-Israel osedagi luwa gi chunygi duto, omiyo onge kata ng’ato achiel ma jahigni piero ariyo kata mokadho kanyo mane owuok Misri, ma none piny mane asingora ni Ibrahim gi Isaka kod Jakobo.

¹² Kaleb wuod Jefune ja-Kenizi, kod Joshua wuod Nun kende ema nodonj e pinyno, nikech giseluwo Ruoth Nyasaye gi chunygi duto.’

¹³ Ruoth Nyasaye nokecho gi jo-Israel mi ne omiyo gidigni e thim kuom higni piero ang’wen-gi, nyaka tieng’ mane oketho e nyimeno otho duto.

¹⁴ Koro kendo uluwo mana timbe wuoneu! Un joma timbegi richo, ma pod biro mana medo mirimb Ruoth Nyasaye kuom jo-Israel,

¹⁵ nimar ka udagi luwe, to obiro jwang’o oganda jo-Israel duto e thim, kendo un ema ubiro miyo girum.”

¹⁶ Bang’ kinde matin ne gidwogo ir Musa, mi giwacho niya, “Wadwaro gero abilni ni jambwa ka, kod mier mondo mondwa gi nyithindwa odagie.

¹⁷ Bang’e wanyalo dhi e lweny mondo waked ka watelo ni jo-Israel, nyaka chop gikaw piny ma gidhi dakie. To e kinde ma pod wadhi kedo, mondwa gi nyithindwa nyalo dak e mier mochiel motegno gi ohinga ma jopinyni ok nyal monjogie.

¹⁸ Ok wanaduogi ka pok ja-Israel ka ja-Israel oyudo lowo mopogne.

¹⁹ Wan ok wadwar mondo opognwa piny kodgi loka machielo mar aora Jordan, nikech osepognwa lopwa yo wuokchieng’ mar Jordan lokani.”

²⁰ Musa nodwokogi niya, “Ka unyalo rito singruok musesingorugoni, mi uyie kedo e nyim Ruoth Nyasaye,

²¹ kendo jou duto ma jolweny ong’ado aora Jordan e nyim Ruoth Nyasaye, mi gibet kuno nyaka chop Ruoth Nyasaye riemb wasike,

²² mokawo pinyno, to un udwog ka, kendo unubed maonge ketho e nyim Ruoth Nyasaye kendo e nyim jo-Israel, mi pinyni nobed maru e nyim Ruloth Nyasaye.

²³ To ng’euru ni ka ok utimo kamano, to unubed joketho e nyim Ruoth Nyasaye, kendo richou nokelnu kum.

²⁴ Kuom mano, geruru mier ni mondu kod nyithindu, kendo uger abilni ni jambu, to nyaka utim mana kaka usesingoru!”

²⁵ Jo-Gad gi jo-Reuben nodwoko Musa niya, “Jaduong’ wan jogi omiyo wabiro timo kaka ichikowa.

²⁶ Nyithindwa gi mondwa kod jambwa duto biro dong’ e miech Gilead ka,

²⁷ to jowa duto ma jolweny biro ng’ado aora mondo odhi oked e nyim Ruoth Nyasaye kaka isechiko.”

²⁸ Kuom mano, Musa nochiko Eleazar jadolo gi Joshua wuod Nun kod jodong dhout Israel niya,

²⁹ “Ka jo-Gad gi jo-Reuben duto ma jolweny ong’ado aora Jordan kodu mondo oked e nyim Ruoth Nyasaye, mi ukawo pinyno, to nyaka upognigi piny Gilead.

³⁰ To ka ok ging’ado aora mi gidhi e lweny kodu, to upognigi lowo e piny Kanaan.”

³¹ Jo-Gad gi jo-Reuben nodwoko niya, “Jaduong’, wabiro timo mana kaka Ruoth Nyasaye osechikowa.

³² Waduto mwaromo dhi e kedo wabiro ng’ado loka cha e nyim Ruoth Nyasaye, to lopwa nobed mana loka Jordan koni.”

³³ Omiyo Musa nomiyo jo-Gad gi jo-Reuben kod nus jo-Manase wuod Josef piny Sihon ruodh jo-Amor, gi piny Og ruodh Bashan duto, kaachiel gi miechgi kod gwenge mokiewo kodgi.

³⁴ Jo-Gad nogero Dibon gi Ataroth gi Aroer,

³⁵ gi Atroth-safan gi Jazar gi Jogbeha

³⁶ gi Bethnimra kod Bethharan, duto mier mochiel motegno gi ohinga, kendo ogerie abilni mag jamni.

³⁷ Jo-Reuben to nogero Heshbon gi Eleale gi Kiriathaim

³⁸ gi Nebo gi Baal-meon, (mane nyinge oloki) kod Sibma. Mago e nying mane gichako mier mane gigerogo.

³⁹ Joka Makir wuod Manase to nomonjo piny Gilead, mokawo, kendo ne giriembo jo-Amor mane oyudo odakie.

⁴⁰ Eka Musa nomiyo joka Makir wuod Manase piny Gilead, mi gidak kuno.

⁴¹ Jair nyakwar Manase, to nomonjo miech Ham, mi okawo, kendo ochako ni Havoth-jair, (tiende ni, miech Jair.)

⁴² Noba to nomonjo Kenath gi mier matindo mokiewo kode, mi ne ochake ni Noba, nyinge owuon.