Kwan 30 - MUMA MALER 2015

Chike mag kuong’ruok gi singruok

¹ Musa nowacho ni jotend jo-Israel niya,

² “Ruoth Nyasaye ochiko kama: Ka ng’ato osingore ni Ruoth Nyasaye kata okuong’orene, to kik olokre. Gimoro amora mowacho gi dhoge, to nyaka otim.

³ “Ka nyaka matin ma pod nie odgi osingore ni Ruoth Nyasaye, kata okuong’orene,

⁴ kendo wuon mare owinjo singruokno kata kuong’ruokno, to ok owachone gimoro, kuong’ruokneno nyaka siki.

⁵ To ka wuon odagi wachno chieng’ mowinjeeno, to kuong’ruokgo duto ok nyal mako nyakono. Ruoth Nyasaye nowene nikech wuon mare osedagi.

⁶ “To ka nyako okendi kapod kuong’ruok omake, kata ka wach mane owacho piyopiyo ka ok oparo pod otweye,

⁷ to eka bang’e chwore owinjo to oling’ aling’a to kuong’ruokno nyaka siki.

⁸ To ka chwore odagi kuong’ruokno chieng’ mowinjoe wach mi oketho kuong’ruok, to kuong’ruokno ok nyal mako dhakono, to Ruoth Nyasaye nowene.

⁹ “Kuong’ruok moro amora ma chi liel kata dhako ma chwore oriembo okuong’orego nyaka siki.

¹⁰ To ka dhako okuong’ore kata otuere gi kuong’ruok,

¹¹ to eka bang’e chwore owinjo to oling’ aling’a mi ok odagi wachno, to kuong’ruokgo duto nyaka siki.

¹² To ka chwore odagi kuong’ruokgo ratiro kowinjogi, to onge gimoro amora mane chiege owacho ma nomake, bed ni en kuong’ruok kata singruok. Chwore osekethogi, omiyo Ruoth Nyasaye nowene.

¹³ “Chwor dhako nyalo guro kata ketho singruok kata kuong’ruok ma chiege dwaro sandorego.

¹⁴ To ka dichwo oling’ chieng’no kod kinyne, to mano nyiso ni oyie gi singruok kata kuong’ruok mane chiege otuerego. Ginisiki, nikech ka ne owinjogi, to noling’.

¹⁵ To kolokore mana achien, modagi kosewinjogi, to ketho mar chiege nobed mare, kendo nyaka ochul.”

¹⁶ Mago chike mane Ruoth Nyasaye omiyo Musa kuom dichwo gi dhako kendo kuom wuon nyako gi nyare matin ma pod ni e odgi.