Kwan 3 - MUMA MALER 2015

Kar romb jo-Lawi gi tijegi

¹ Magi ne e nyikwa Harun gi Musa e kinde mane Ruoth Nyasaye wuoyoe gi Musa e got Sinai:

² Yawuot Harun ne Nadab, wuowi maduong’, gi Abihu gi Eleazer kod Ithamar.

³ Mago e nying yawuot Harun mane obiro, moketi e tij dolo.

⁴ To Nadab gi Abihu notho e nyim Ruoth Nyasaye, nikech ne giwang’o ubani ma ok ni kare e nyim Ruoth Nyasaye e thim Sinai. Ne githo ka pok ginywolo nyithindo, omiyo Eleazer gi Ithamar ne jokawo tij dolo ka wuon gi pod ngima.

⁵ Ruoth Nyasaye nowacho ni Musa niya,

⁶ “Kel jo-Lawi machiegni, kendo iketgi giti ni Harun.

⁷ Nyaka gitine, kendo giti ni oganda duto e nyim Hemb Romo ka gitiyo tich lemo e Kama Ler.

⁸ Ginibed ka girito gik moko duto mitiyogo e Hemb Romo, kendo giniti tich lemo e Kama Ler ni jo-Israel.

⁹ Iniket jo-Lawi e teko Harun gi yawuote, mondo gibed joma ochiwne kuom oganda jo-Israel.

¹⁰ Harun gi yawuote ema inimi tich dolo, to ng’at ma ok jadolo motiyo tich dolo nyaka negi.”

¹¹ Ruoth Nyasaye nowacho ni Musa niya,

¹² “Aseyiero jo-Lawi kuom jo-Israel kar nyithindo makayo duto ma mond Israel onywolo. Kuom mano, jo-Lawi gin joga,

¹³ nimar nyithindo duto makayo gin maga. Chieng’ mane anego nyithindo duto makayo e piny Misri ne awalo nyithind Israel makayo duto obed maga, bed ni gin mag dhano kata mag le. Gin maga. An e Ruoth Nyasaye.”

¹⁴ Ruoth Nyasaye ne ochako owacho ni Musa e thim Sinai niya,

¹⁵ “Ndik nying jo-Lawi machwo duto chakre ja-due achiel kadhi nyime, kichanogi e dhoutgi kaluwore gi kweregi.”

¹⁶ Omiyo Musa nondiko nyinggi kaka Ruoth Nyasaye nochike,

¹⁷ kendo nying yawuot Lawi e magi: Gershon gi Kohath, kod Merari.

¹⁸ Joka Gershon e dhoutgi gin Libna gi Shimei.

¹⁹ Joka Kohath e dhoutgi gin Amram gi Izhar gi Hebron kod Uziel.

²⁰ Joka Merari e dhoutgi gin Mali kod Mushi. Mago e dhout Lawi kaluwore gi kweregi.

²¹ E dhood Gershon ne nitie joka Libni kod joka Shimei. Mago ne dhout Gershon,

²² kendo kar romb jogi machwo mane okwan chakre ja-due achiel kadhi nyime ne alufu abiriyo gi mia abich.

²³ Dhout Gershon ne oket yo podho chieng’ e tok Hema Maler.

²⁴ Jatendgi ne Eliasaf wuod Lael.

²⁵ To kuom tich Hemb Romo, joka Gershon ne omi tich rito Hema Maler, kaachiel gi gik miumego, kod pasia mar dhood Hemb Romo,

²⁶ gi pasia mag laru gi mag rangach midonjogo e laru mar e aluora mar Hema Maler gi aluora mar kendo-mar-misango, kod gik moko duto mitiyogo kanyo.

²⁷ E dhood Kohath, ne nitie joka Amram gi joka Izhar gi joka Hebron kod joka Uziel.

²⁸ Mago ne dhout Kohath, kendo kar romb jogi machwo ma nokwan, chakre ja-due achiel ka dhi nyime ne alufu aboro gi mia achiel. Gin ema ne gin jorit Kama Ler.

²⁹ Dhoutgi noket yo milambo e bath Hema Maler.

³⁰ Jatendgi ne en Elizafan wuod Uziel,

³¹ kendo ne omigi tich rito Sandug Muma gi mesa gi rachung taya gi kende mag misango gi gik moko duto mitiyogo e lemo, kod pasia gi gige duto.

³² Jaduong’ jotend jo-Lawi duto ne Eleazer wuod Harun jadolo. En ema nokete jatelo mar rito Hema Maler.

³³ E dhood Merari ne nitie joka Mali gi joka Mushi. Mago ne e dhout Merari,

³⁴ kendo kar romb jogi machwo mane okwan, chakre ja-due achiel kadhi nyime, ne alufu auchiel gi mia ariyo.

³⁵ Jatendgi ne Zuriel wuod Abihail, kendo noketgi yo nyandwat mar Hema Maler.

³⁶ Joka Merari ne omi tich rito frembe gi rariw gi sirni gi rachungi mag Hema Maler, kaachiel gi gige duto kod gik moko duto mitiyogo kanyono,

³⁷ gi sirni molworo laro, kod rachungigi gi loyegi kod tondegi.

³⁸ To mogik, Musa gi Harun kod joka Harun noket e nyim Hema Maler yo wuok chieng’ mar Hemb Romo. Gin ema ne omigi tich rito Kama Ler ni jo-Israel, to ng’ato ang’ata ma ok jadolo mane nyalo sudo machiegni nyaka ne negi.

³⁹ Kar romb jo-Lawi machwo mane Musa ondiko nyinggi e dhoutgi kaka ne Ruoth Nyasaye ochiko ne alufu piero ariyo, chakre ja-due achiel kadhi nyime.

Nyasaye okawo jo-Lawi kar jo-Israel machwo makayo

⁴⁰ Ruoth Nyasaye nowacho ni Musa niya, “Ndik nying jo-Israel machwo makayo duto chakre ja-due achiel kadhi nyime, kendo ikwan kar rombgi.

⁴¹ An e Ruoth Nyasaye. Unuwalna jo-Lawi kar jo-Israel machwo makayo. Kamano bende unuwalna jamb jo-Lawi kar jamni makayo mag jo-Israel.”

⁴² Musa nondiko nying jo-Isarel machwo makayo duto, chakre ja-due achiel kadhi nyime, kaka Ruoth Nyasaye nochike.

⁴³ Kar rombgi ne alufu piero ariyo gariyo gi mia ariyo gi piero abiriyo gadek.

⁴⁴ Ruoth Nyasaye nochako owacho ni Musa niya,

⁴⁵ “Kaw jo-Lawi kar jo-Israel machwo makayo duto, kendo kaw jamb jo-Lawi kar jambgi. Jo-Lawi nyaka bed joga. An e Ruoth Nyasaye.

⁴⁶ To jo-Israel machwo makayo ng’eny moloyo jo-Lawi gi ji mia ariyo kod piero abiriyo gadek,

⁴⁷ omiyo nyaka uwar joma odong’go gi shekel abich abich, kipimo gi shekel mitiyogo e tich Nyasaye. (Shekel achiel romre gi gera piero ariyo.)

⁴⁸ Pesa mowargigo unuchiw ni Harun gi yawuote.”

⁴⁹ Ka ne gisetieko waro joma kayo mane odong’, Musa nokawo pesa mowargigo.

⁵⁰ Kar romb pesago ne shekel mag fedha alufu achiel gi mia adek kod piero achiel gabich kopim gi rapim mitiyogo e tich Nyasaye.

⁵¹ Nochiwo pesago ni Harun gi yawuote kaka ne Ruoth Nyasaye owachone. Kamano notimo gima ne Ruoth Nyasaye ochike.