Kwan 28 - MUMA MALER 2015

Misengni mitimo pile

¹ Ruoth Nyasaye nowacho ni Musa niya,

² Chik jo-Israel mondo ochiw gik mitimonago misengni miwang’o mondo obed chiemba madum tik mamit e kinde moketi.

³ “Bende nyisgi ni misengni miwang’o ni Ruoth Nyasaye e magi: Odiechieng’ kodiechieng’ nyaka chiw nyiimbe ariyo maonge songa ma hikgi achiel achiel, mondo otimgo misango miwang’o pep.

⁴ Nyaim achiel unutimgo misango gokinyi, to machielo unutimgo misango godhiambo mar ang’ich welo.

⁵ Misango mar cham michiwo kodgi to nobed mogo moromo kilo adek moruw gi mo maber moromo lita ariyo.

⁶ (Mano e misango mitimo miwang’o mitimo pile mondo odum mamit ni Ruoth Nyasaye, mane ochak tim e got Sinai.)

⁷ To misango miolo piny mitimego nobed divai moromo lita ariyo kuom im ka im. Nyaka uol divai makechno ei Kama Ler ka misango ni Ruoth Nyasaye.

⁸ Nyaim machielo mutimogo misango godhiambo mar ang’ich welo nyaka chiw gi misango mar cham kod miolo piny maromre gi mago michiwo gokinyi. En misango miwang’o mondo odum tik mamit ni Ruoth Nyasaye.

Misengni mitimo chieng’ sabato, kendo mitimo due ka due

⁹ “Chieng’ sabato to nyaka uchiw nyiimbe ariyo maonge songa ma hikgi achiel achiel mondo otimgo misango. Nyaka chiwe gi misango miolo piny, mitimego kaka chik dwaro.

¹⁰ Misango miwang’o pep mitimo chieng’ sabato ka sabatono nyaka utim kumedo ewi misango miwang’o pep mitimo pile, kod misango miolo piny mitimego.

¹¹ “To chieng’ due achiel mar due ka due nyaka uchiw nyiruedhi ariyo gi im achiel kod nyiimbe abiriyo ma hikgi achiel achiel mondo otimgo misango miwang’o pep. Jamnigo duto nyaka bed maonge songa.

¹² Misango mar cham michiwo gi nyarwath ka nyarwath nobed mogo moromo kilo apar moruw gi mo, to michiwo gi im nobed moromo kilo abiriyo,

¹³ kendo michiwo gi nyaim ka nyaim, kilo adek. Mano en misango miwang’o pep mondo odum tik mamit ni Ruoth Nyasaye.

¹⁴ Misango miolo piny mitimo gi nyarwath ka nyarwath nobed divai moromo lita ang’wen, to michiwo gi im nobed lita ariyo, kendo michiwo gi nyaim ka nyaim, lita achiel. Mano en misango miwang’o pep ma nyaka tim due ka due e higa ngima.

¹⁵ Bende nyaka uchiw nywok mondo otimnigo Ruoth Nyasaye misango mar golo richo. Mano nyaka utim kumedo ewi misango miolo piny michiwego.

Misengni mitimo e sewni moketi

¹⁶ “Nyaka utim Pasaka mar Ruoth Nyasaye due apar gang’wen mar due mokwongo,

¹⁷ to due apar gabich unutim sawo, kendo nyaka ucham mana makati ma ok ketie thowi kuom ndalo abiriyo.

¹⁸ Chieng’ mokwongo to nyaka ubed gi chokruok mar lemo, kendo ok unuti tijeu mapile chieng’no.

¹⁹ Nyaka uchiw nyiruedhi ariyo gi im achiel kod nyiimbe abiriyo ma hikgi achiel achiel mondo otimgo misango miwang’o pep, madum tik mamit ni Ruoth Nyasaye. Jamnigo duto nyaka bed maonge songa.

²⁰ Misango mar cham michiwo gi nyarwath ka nyarwath nobed mogo moromo kilo apar moruw gi mo,

²¹ to michiwo gi im nobed kilo abiriyo, to michiwo gi nyaim ka nyaim, kilo adek.

²² Bende nyaka uchiw nywok mondo otimgo misango mar golo richo, upwodhrugo.

²³ Mago duto nyaka uchiw kumedo ewi misango miwang’o pep mitimo gokinyi pile.

²⁴ Unutim misengnigo pile nyaka chieng’ mar abiriyo. En misango mitimo mondo obed chiemo madum tik mamit ni Ruoth Nyasaye. Nyaka uchiwe kumedo ewi misango miwang’o pep mitimo pile, kod misango miolo piny michiwego.

²⁵ Chieng’ mar abiriyo bende nyaka ubed gi chokruok maler, kendo ok unuti tijeu mapile.

²⁶ “Chieng’ muchiwoe chamb gwel, ka ukelo ni Ruoth Nyasaye chiwo mar cham manyien e Sap Jumbe, to nyaka ubed gi chokruok maler, kendo ok nuti tijeu mapile.

²⁷ Unuchiw nyiruedhi ariyo gi im achiel kod nyiimbe abiriyo ma hikgi achiel achiel mondo otimgo misango miwang’o pep madum mamit ni Ruoth Nyasaye.

²⁸ Misango mar cham michiwo gi nyarwath ka nyarwath nobed mogo moromo kilo apar moruw gi mo, to michiwo gi im nobed kilo abiriyo,

²⁹ kendo michiwo gi nyaim ka nyaim, kilo adek.

³⁰ Bende nyaka uchiw nywok mondo otimgo misango mar golo richo, upwodhrugo.

³¹ Jamnigo duto nyaka bed maonge songa, kendo misengnigo duto nyaka utim kumedo ewi misengni miwang’o pep mitimo pile, kaachiel gi misango miolo piny michiwogigo.