Kwan 24 - MUMA MALER 2015

¹ Koro kaka Balaam nong’eyo ni Ruoth Nyasaye dwaro ni mondo oguedh jo-Israel, ne ok odhi mondo otim tim ajuoke, kaka ne osetimo mokwongo, to nowichore mochomo thim,

² kendo kane ong’icho, noneno jo-Israel koguro kambigi kochanore e dhoutgi. Eka teko mar Nyasaye nobiro kuome,

³ mi ohulo kama: “Ma e wach madier mar Balaam wuod Beor, mana ng’at ma wang’e bith,

⁴ kendo ma winjo weche Nyasaye. En wach ma ng’at ma wang’e oyepo, kendo ma neno fwenyruok moa kuom Ng’at ma Nyalo Gik Moko Duto.

⁵ A joka Jakobo, mano kaka hembeu beyo! A jo-Israel, kar daku long’o!

⁶ Hembeu chalo gi yiend othidhe mopidhi e laini maboyo, kendo chalo gi puothe mae bath aora, kaka yien mabeyo ma Ruoth Nyasaye opidho, kendo kaka yiend sida mae dho pi.

⁷ Pi mae dapigeu biro bubni oko, kendo kothu nochal gi nembe madongo, mondo ruodhu obed maduong’ moloyo Agag, kendo lochne oyud duong’.

⁸ Nyasaye mane ogolou e piny Misri, tekone chalo gi teko jowi. Uchamo ringre ogendini ma wasiku bende urado chokegi, kendo uturo lembgi matindo tindo.

⁹ Uchalo gi sibuor madhako manindo piny, ma onge ng’ama hedhore chiewo. Joma guedhou mondo oyud gueth, to joma kuong’ou mondo oyud kuong’!”

Balaam okoro wach

¹⁰ Kane Balak owinjo wechego, nokecho ahinya gi Balaam, mi ne okeyo lwetene, kowacho ni Balaam niya, “Ne aluongi mondo ikuong’na wasika, to in koro iseguedhogi mana nyadidek!

¹¹ Omiyo wuogi, idhi thuru. Ne asingora ni damiyi duong’ mang’ongo, to koro Ruoth Nyasaye osemoni yudo duong’no.”

¹² To Balaam nodwoke niya, “Donge ne anyiso jooteni mane ioro ira

¹³ ni kata dibed ni Balak dwaro miya fedha kod dhahabu duto manie ode, to ok anyal chayo chik Ruoth Nyasaye, ka atimo dwarona awuon, bed ni en gima ber kata gima rach, to abiro wacho mana gima Ruoth Nyasaye onyisa.

¹⁴ Koro adok ir jowa, to kapok adhi, to nyaka anyisi gima jo-Israel biro timo ni jogi e ndalo mabiro.”

¹⁵ Kamano Balaam nohulo wach moa kuom Nyasaye kama: “Ma e wach madier mar Balaam wuod Beor, mana wach ng’at ma wang’e bith,

¹⁶ kendo mawinjo weche Nyasaye. En wach ng’at mong’eyo rieko mar Ng’ama Duong’ Moloyo, ng’at ma wang’e oyepo, kendo ma neno fwenyruok moa kuom Ng’ama Nyalo Gik Moko Duto.

¹⁷ Anene, to ok sani, kendo ang’iye, to ok machiegni. Sulue nobi koa kuom joka Jakobo, kendo ludh duong’ nowuog kuom jo-Israel. Obiro goyo oganda lweny mag jo-Moab, kendo nolo joma sungore.

¹⁸ Obiro loyo piny Edom e lweny, mi okaw kendo jo-Seir ma wasike nobed mage. Jo-Israel biro timo timbe chir.

¹⁹ Ee, joka Jakobo biro loyo wasikgi. Onge ng’at ma nodong’ Ar ka ngima.”

²⁰ Eka Balaam norango piny Amalek, mi ohulo kama: “Oganda mane okwongo betie ne jo-Amalek. To mogik ginirum chuth.”

²¹ Eka norango jo-Keni, mi owacho niya, “Yaye un jo-Kain, kata obedo ni kar daku otegno, kendo udak malo ewi gode,

²² to obiro wang’. Uparo ni unyalo dak e nyima kanyo nyaka karang’o?”

²³ Ne ochako ohulo kendo niya, “Yaye, mago jokanye machokore malogo?

²⁴ Gin mony moa Saipras. Gibiro ketho Asuria, kendo giniketh Eber, to kata gin bende gibiro rumo chuth.”

²⁵ Bang’ mano Balaam nowuok modok thurgi, to Balak bende nodhi.