Kwan 22 - MUMA MALER 2015

Balak oluongo Balaam

¹ Jo-Israel nodhi moguro kambi e piny Moab mamwalo, man yo wuokchieng’ mar aora Jordan, kama omanyore gi Jeriko.

² Balak wuod Zipor nowinjo gima ne jo-Israel otimo ni jo-Amor.

³ To jo-Moab bende kihondko malich nomako, nikech ne gineno ka jo-Israel ng’eny ahinya.

⁴ Omiyo ne giwacho ni jodong Midian niya, “Oganda maduong’ malichni biro nang’owa mana kaka dede nang’o lum.” Balak wuod Zipor, mane ruodh Moab e kindego,

⁵ nooro joote ir Balam wuod Beor mane oyudo ni Pethor but aora Yufrate e piny jo-Amav, kowachone niya, “Oganda maduong’ moa e piny Misri osebiro, mi opong’o piny, kendo othung’a marach.

⁶ Omiyo bi piyo mondo ikuong’gi nikech ging’eny ahinya mohewowa. Bang’e dipo ka aloyogi, mi ariembogi oko e pinywa, nikech ang’eyo ni joma igwedho to yudo gueth, to joma ikwong’o to yudo kuong’.”

⁷ Jodong Moab gi Midian ne jokawo gik michulo jokor, mi gidhi ir Balaam, kendo ginyise kaka Balak oorogi.

⁸ Balaam nowachonigi niya, “Ninduru ka otienoni, kendo abiro wachonu gima Ruoth Nyasaye onyisa kuom wachni.” Kuom mano jodong Moabgo nonindo ka Balaam.

⁹ Eka Nyasaye nofwenyore ni Balaam, mopenje niya, “Joma olimigo oa kanye?”

¹⁰ Balaam nodwoke niya, “Balak wuod Zipor ma ruodh Moab ema oseorogi ira, konyisa ni

¹¹ oganda maduong’ osea e piny Misri mopong’o piny. Omiyo odwaro ni mondo adhi akuong’negi, eka dipo ka oloyogi, mi oriembogi.”

¹² To Nyasaye nowacho ni Balaam niya, “Kik idhi kodgi, to bende kik ikuong’ jogo nikech gin joma oguedhi.”

¹³ Kuom mano, kane Balaam ochiew gokinyi, nonyiso jodongo mane Balak ooro niya, “Doguru thuru nimar Ruoth Nyasaye osekwera ni kik adhi kodu.”

¹⁴ Omiyo jodong Moabgo noa modok ir Balak, monyise ni Balaam osedagi biro kodgi.

¹⁵ Eka Balak nochako ooro jodongo moko mang’eny kendo madongo moloyo mane oseoro mokwongo.

¹⁶ Ne gibiro ir Balaam, mi giwachone niya, “Balaam wuod Zipor oorowa mondo wanyisi kama, ‘Kik gimoro moni biro ira,

¹⁷ nikech abiro miyi duong’ miwuoro, kendo anatimni gimoro amora miwacho. Omiyo nyaka ibi mondo ikuong’na jogi.’ ”

¹⁸ To Balaam nodwoko jodong Balak niya, “Kata ka bed ni Balak dwaro miya fedha gi dhahabu duto manie ode, to ok anyal chayo chik Ruoth Nyasaye ma Nyasacha e yo moro amora.

¹⁹ To kata kamano, ninduru ka gotienoni kaka ne jou mokwongo ka onindo mondo awinj ane gima nyien ma Ruoth Nyasaye nyalo nyisa kuom wachno.”

²⁰ Nyasaye nofwenyore ni Balaam gotieno, mowachone niya, “Ka jogo osebiro luongi, to dhi kodgi. To nyaka itim mana gima abiro wachoni.”

²¹ Omiyo kane Balaam ochiew gokinyi, nogawo kanje, modhi gi jodong Moab.

Malaika kod kanj Balaam

²² To kata kamano Ruoth Nyasaye nokecho nikech Balaam ne dhi, omiyo kane Balaam biro koidho kanje, ka en gi jotichne ariyo, malaika mar Ruoth Nyasaye nobiro mochung’ e nyime mondo ogeng’ne kik okadhi.

²³ Kane kanyna oneno malaika kochung’ e yo gi ligangla, nobaro moweyo yo, to Balaam nochwade mondo oduog e yo.

²⁴ Eka malaika mar Ruoth Nyasaye nodhi mochung’ kamoro ma yo dinygo e kind puothe mag mzabibu, kama ochiel gi ohinga koni gi koni.

²⁵ Kanyna noneno malaika kochung’ kanyo, mi norere e ohinga, kendo odiyo tiend Balaam e ohingano, mi Balaam nochako chwade.

²⁶ Bang’ mano, malaika mar Ruoth Nyasaye nosudo modhi ochung’ kamoro madiny ma ng’ato ok nyal baroe korachwich kata koracham.

²⁷ Kane kanyna oneno malaika kanyo, nonindo gi Balaam piny, mi mano nomiyo Balaam mirima, mochwade gi ludhe.

²⁸ Eka Ruoth Nyasaye nomiyo kanyna owuoyo, ka penjo Balaam niya, “Koro igoya didek, to ere gima aseketho?”

²⁹ Balaam nowachone niya, “Isebedo kichanda, kendo ka dabed ni an gi ligangla, to dikoro asenegi!”

³⁰ To kanyna nopenjo Balaam niya, “To donge an e kanji ma isebedo kiidho pile? Bende asetimonie gima kamano nyaka nene?” Balam nodwoke ni, “Ooyo.”

³¹ Eka Ruoth Nyasaye noyawo wang’ Balaam moneno malaika mar Ruoth Nyasaye kochung’ e yo gi ligangla. Nokulore, mopodho piny auma e nyim malaika.

³² Malaika nopenje niya, “Ere gima omiyo inyalo goyo kanji didek kamano? Ne abiro mondo ageng’ni, to ne ichoma mana tir,

³³ to ka kanji nende onena didek, mobaro oa e yo. To ka da bed ni ok obaro, to dikoro asenegi, mi aweye odhi.”

³⁴ Balaam nowacho ni malaika mar Ruoth Nyasaye niya, “Aseketho. Ne ok ang’eyo ni ichung’ e nyima e yo mondo igeng’na. To koro ka wuodhani ok berni, to ayie dok dala.”

³⁵ To malaika mar Ruoth Nyasaye nowachone niya, “Dhiyo adhiya gi jogo, to nyaka iwach mana gima abiro nyisi.” Omiyo Balaam nodhi adhiya gi jodong Balak.

Balaam gi Balak

³⁶ Kane Balak owinjo ni Balaam biro, nowuok modhi nyaka Ar e piny Moab but aora Arnon manie tong’ pinye, mondo oromne.

³⁷ Balak nopenjo Balaam niya, “Donge naoroni joote ndalo mang’eny mondo oluongi? Ang’o ma ne omoni biro? Koso ne iparo ni ok anyal miyi duong’?”

³⁸ Balaam nodwoke niya, “Eri asebiro, to koro ere teko ma an-go ma dawachgo gimoro amora? Wach moro amora ma Nyasaye omiya ema abiro wacho.”

³⁹ Kamano Balam ne jodhi gi Balak nyaka Kiriath-huzoth,

⁴⁰ mi Balak oyang’o dhok gi rombe ni Balaam kod jodongo mane ni kode.

Balaam oguedho jo-Israel

⁴¹ Kinyne gokinyi Balak nokawo Balaam motero ewi got miluongo ni Bamoth-baal, kuma ne onyalo nenogo oganda jo-Israel duto.