Kwan 2 - MUMA MALER 2015

Cheno mar dhout jo-Israel e kambegi

¹ Ruoth Nyasaye nowacho ni Musa gi Harun kama:

² Jo-Israel nyaka buor ka ng’ato ka ng’ato ni e bwo bandech jatendgi kendo e bwo bandech dhoodgi. Ginigur hembegi molworo Hemb Romo, kendo momanyore kode.

³ Koro magi e dhoudi ma nogur hembegi yo wuok chieng, e nyim Hemb Romo: Jo-Juda nobed e bwo bandech kambigi, kochan e ogendgi mag lweny. Jatendgi en Nashon wuod Aminadab.

⁴ Ogandane mar lweny romo ji alufu piero abiriyo gang’wen gi mia auchiel.

⁵ Jo-Isakar ema nogur hembegi machiegni gi jo-Juda. Jatendgi en Nethaneel wuod Zuar.

⁶ Ogandane romo ji alufu piero abich gang’wen gi mia ang’wen.

⁷ Butgi jo-Zebulun ema nobedie. Jatendgi en Eliab wuod Helon.

⁸ Ogandane mar lweny romo ji alufu piero abich gabiriyo gi mia ang’wen.

⁹ Kamano ji duto manie kambi mar jo-Juda, kochan e ogendgi, romo alufu mia achiel gi piero aboro gauchiel gi mia ang’wen. Ka oganda jo-Israel duto chako wuoth, to gin ema gikwongo.

¹⁰ Magi e dhoudi ma nobed yo milambo: Jo-Reuben nobed e bwo bandech kambigi kochan e ogendgi mag lweny. Jatendgi en Elizur wuod Shedeur.

¹¹ Ogandane mar lweny romo ji alufu piero ang’wen gauchiel gi mia abich.

¹² Jo-Simeon ema nobed butgi.

¹³ Jatend jo-Simeon gogo nobed Shelumiel wuod Zurishadai. Ogandane mar lweny romo ji alufu piero abich gochiko gi mia adek.

¹⁴ Bang’e to jo-Gad ema nobedie. Jatendgi en Eliasaf wuod Reuel.

¹⁵ Ogandane mar lweny romo ji alufu piero ang’wen gabich gi mia auchiel gi piero abich.

¹⁶ Kamano ji duto manie oganda jo-Reuben, kochan e ogendgi mag lweny, romo alufu mia achiel gi piero abich gachiel kod mia ang’wen gi piero abich. Gin ema giniwuog mar ariyo.

¹⁷ Bang’gi to Hemb Romo ema nowuogi, ka kambi jo-Lawi osiko kargi e dier kambe mamoko. Ka giwuotho, to ginichanre mana kaka kambegi ochanore, ka ng’ato ka ng’ato ni e bwo bandeche.

¹⁸ Dhoudi ma nobed yo podho chieng’ e magi: Jo-Efraim nobed e bwo bandechgi, kochan e ogendgi mag lweny. Jatendgi en Elshama wuod Amihud.

¹⁹ Ogandane mar lweny romo ji alufu piero ang’wen gi mia abich.

²⁰ Jo-Manase ema nobed butgi. Jatend jo-Manase en Gamaliel wuod Pedazur.

²¹ Ogandane mar lweny romo ji alufu piero adek gariyo gi mia ariyo.

²² Bang’ jogo jo-Benjamin ema nobedie. Jatendgi en Abidan wuod Gideoni.

²³ Ogandane mar lweny romo ji alufu piero adek gabich gi mia ang’wen.

²⁴ Kamano ji duto manie kambi jo-Efraim, kochan e ogendgi mag lweny romo ji alufu mia achiel gaboro gi mia achiel. Gin ema giniwuog mar adek.

²⁵ Dhoudi ma nobed yo nyandwat e magi: Jo-Dan nobed e bwo bandech kambigi, kochan e ogendgi mag lweny, jatendgi en Ahiezel wuod Amishadai.

²⁶ Ogandagi romo ji alufu piero auchiel gariyo gi mia abiriyo.

²⁷ Jo-Ashur ema nobed butgi. Jatendgi en Pagiel wuod Okram.

²⁸ Ogandane mar lweny romo ji alufu piero ang’wen gachiel gi mia abich.

²⁹ Jo-Naftali ema nobed but dhoodno. Jatendgi en Ahira wuod Enan.

³⁰ Ogandane romo ji alufu piero abich gadek gi mia ang’wen.

³¹ Kamano ji duto manie kambi jo-Dan romo alufu mia achiel gi piero abich gariyo gi mia auchiel. Gin ema giniwuog achien e bwo bandechegi, kochan-gi e ogendgi mag lweny.

³² Mago e jo-Israel mane okwan kaluwore gi dhoutgi. Kar romb ji duto e kambi, kochan e ogendgi mag lweny romo ji alufu mia auchiel gi adek, gi mia abich gi piero abich.

³³ Kane ikwano jo-Isarel, to jo-Lawi ne ok okwan, nikech kamano e kaka Ruoth Nyasaye nochiko Musa.

³⁴ Jo-Israel notimo mana kaka Ruoth Nyasaye nochiko Musa. Ne gibworo e bwo bandechegi, kendo ne giwuotho e bwo bandechegigo, ka ng’ato ka ng’ato nigi joodgi e dhoodgi mana kaka nonyisgi.