Kwan 17 - MUMA MALER 2015

Ludh Harun

¹ Ruoth Nyasaye nowacho ni Musa niya,

² “Nyis jo-Israel mondo jotend dhoot ka dhoot omiyi luth achiel achiel, duto ludhe apar gariyo, ma moro ka moro ondikie nying jatelo ka jatelo.

³ Kuom ludh dhood Lawi to mondo indikie nying Harun, nimar luth ka luth nyaka bed mar jatelo ka jatelo.

⁴ Eka iketgi duto e Hema e nyim Sandug Rapar, kama aromoe kodu,

⁵ kendo ng’at ma ludhe oloth e ng’at ma ayiero. Mano e kaka abiro tieko ng’ur ma jo-Israel ng’urnigo.”

⁶ Kuom mano, Musa nowuoyo gi jo-Israel mi jatend dhoot ka dhoot nomiye luth, duto ludhe apar gariyo, koriwore gi mar Harun.

⁷ Musa noketogi e nyim Ruoth Nyasaye ei Hemb Rapar.

⁸ Kinyne ka ne odonjo e Hema, noyudo ka ludh Harun, ma ludh dhood Lawi, ema oloth. Adier, noloth mogolo ite kod thiepe, kendo onyago olembe!

⁹ Eka Musa nogolo ludhego oko, monyiso jo-Israel duto. Ne ginenogi gi wang’gi, kendo jatelo ka jatelo nokawo mare.

¹⁰ Ruoth Nyasaye nowacho ni Musa niya, “Dwok ludh Harun e nyim Sandug Rapar, obed ranyisi ma siemo joma wigi tek duto, mondo owe ywakna chuth, eka ok ginitho.”

¹¹ Musa notimo mana kaka Ruoth Nyasaye nochike.

¹² Bang’e jo-Israel nowacho ni Musa niya, “Waserwenyo! Waduto warumo!

¹³ Ng’ato ang’ata kuomwa mosudo machiegni gi Hema Maler mar Nyasaye biro tho! Wabiro tho waduto koso?”