Kwan 16 - MUMA MALER 2015

Korah gi Dathan kod Abiram jong’anyo

¹ Korah wuod Izhar ma wuod Kohath ma wuod Lawi, kod jo-Reuben ma Dathan gi Abiram yawuot Eliab, kod On wuod Peleth,

² ne jotamore bet e bwo Musa, kendo jo-Israel mia ariyo gi piero abich ma jotend oganda kendo ma joma ogen bende ne ni kodgi e wachno.

³ Ne giriwore giduto ni Musa gi Harun, mi giwachonigi niya, “Marang’o uhedhoru moloyo, to ng’ato ka ng’ato kuom oganda jo-Israel owal ni Ruoth Nyasaye, kendo Ruoth Nyasaye ni kodgi giduto. Ere gima omiyo ukaworu moloyo jo Ruoth Nyasaye duto?”

⁴ Kane Musa owinjo kamano, nopodho piny auma.

⁵ Bang’e nowacho ni Korah gi joge niya, “Kiny gokinyi Ruoth Nyasaye nohul ng’at ma ng’ate adier, kod ng’at mowalne, kendo monego timne misengni. Ng’at ma Ruoth Nyasaye oyiero ema notim misengni ni Ruoth Nyasaye.

⁶ To in Korah, gima nyaka utim kaachiel gi jogi duto e ma: Kiny ukaw tepe ubani,

⁷ uket mach e igi, mi uolie ubani e nyim Ruoth Nyasaye. Ng’at ma kiny Ruoth Nyasaye oyiero e ng’at mowalne. Un ema uhedhoru moloyo, un jo-Lawi!”

⁸ Musa nochako owacho ni Korah niya, “Winjuru un jo-Lawi.

⁹ Donge en gima ber ka Ruoth Nyasaye osepogou kuom dhout Israel mamoko kokelou bute mondo urit tije mag Hema Maler mar Ruoth Nyasaye, kuchung’ e nyim oganda jo Ruoth Nyasaye, kendo kutiyonigi?

¹⁰ Osekelou machiegni kode, un kaachiel gi jo-Lawi weteu, to koro eka udwaro ni mondo ubed jodolo bende!

¹¹ Mano emomiyo in kaachiel gi jogi duto useriworu ka ukwedo Ruoth Nyasaye. Uparo ni Harun nigi teko manade, ma omiyo onego uywagne kamano?”

¹² Musa nooro wach mondo oluongne Dathan gi Abiram ma yawuot Eliab, to ne gidwoko niya, “Ok wabi.

¹³ Iparo ni gol mane igolowago e piny maber kendo momew mondo watho e thim ka, en gima tin koso, ma pod idwaroe mana ni nyaka ibed jatendwa?

¹⁴ To gima rach moloyo en ni ok isekelowa e piny maber kendo momew, bende ok isemiyowa puothe cham gi mag mzabibu mondo obed mawa. Iparo ni inyalo wuondo ji machal kodwa kama? Ooyo, ok wabi!”

¹⁵ Kane Musa owinjo wechegigo, mirima mager nomake, mi owacho ni Ruoth Nyasaye niya, “Kik idew ng’ur ma ging’urgono. Pok amayogi kata mana kanyna achiel, bende pok atimo marach ni ng’ato ang’ata kuomgi.”

¹⁶ Musa nochako owacho ni Korah niya, “Kiny ibi e nyim Ruoth Nyasaye, in kaachiel gi jogi kod Harun bende.

¹⁷ Ng’ato ka ng’ato kuomu nyaka kaw tap mach, kendo oketie ubani. Eka inikel jogi kaachiel gi tepegi mia ariyo gi piero abich e nyim Ruoth Nyasaye kendo un gi Harun bende nyaka ukel tepeu.”

¹⁸ Kuom mano, ng’ato ka ng’ato nokawo tape, moketoe mach kendo oolo e ubani. Musa gi Harun to nodhi mochung’ e dho Hemb Romo.

¹⁹ Korah bende nochoko joge duto, mi gichung’ ka gimanyore gi ji ariyogo e dho Hema. Bang’e duong’ maler mar Ruoth Nyasaye nothinyore ni oganda duto mar Israel,

²⁰ kendo Ruoth Nyasaye nowacho ni Musa gi Harun niya,

²¹ “Chung’uru mabor gi ogandani mondo atiekgi dichiel ka diemo wang’!”

²² To ne gipodho piny auma, ka giwacho niya, “A Nyasaye ma Nyasach ngima, bende mirima nyalo maki gi oganda duto mana nikech richo mar ng’ato achiel?”

²³ Ruoth Nyasaye nowacho ni Musa niya,

²⁴ “Wach ni ji mondo osud gi chien, oa but hembe mag Korah gi Dothan kod Abiram.”

²⁵ Kamano Musa nodhi ir Dothan gi Abiram, kendo jodong Israel noluwo bang’e.

²⁶ Eka nowacho ni oganda duto niya, “Suduru mabor gi hembe mag ji marichogi. Kik umul girgi moro amora, nono to urumo nikech richogi.”

²⁷ Kuom mano, oganda duto noa kama ne Korah gi Dothan kod Abiram nitie. Koro noyudo ka Dothan gi Abiram josewuok, mochung’ e dho hembegi, kaachiel gi mondgi gi nyithindgi kod jogi.

²⁸ Musa nowacho nigi niya, “Ubiro ng’eyo ni Ruoth Nyasaye ema noora mondo atim gigi duto, to ok ni aketora awuon.

²⁹ Ka jogi otho mana kaka ji duto tho, to kara Ruoth Nyasaye ok oseora.

³⁰ To ka Ruoth Nyasaye otimo hono, mi bur obarore matut, kendo piny ong’amo dhoge momwonyogi kaachiel gi mwandugi duto, mi gidhi e bur ka gingima, eka unung’e ni ne gichayo Ruoth Nyasaye.”

³¹ Kane dho Musa pok olwar, lowo mane jogo ochung’ie nobarore,

³² kong’amo dhoge momwonyogi gi hembegi kod ji duto mane luwo Korah, kaachiel gi mwandugi duto.

³³ Ne gidhi e bur ka gingima, mi lowo oumogi kod mwandugi duto, kendo gidwono nono kuom oganda jo-Israel.

³⁴ Ne giywak, mi jo-Israel duto mane ni machiegni kanyo, oringo ka kok niya, “Neyeuru kaka piny biro mwonyowa!”

³⁵ Ruoth Nyasaye nooro mach mowang’o ji mia ariyo gi piero abich mane oyudo wang’o ubani kande.

³⁶ Bang’e Ruoth Nyasaye nowacho ni Musa niya,

³⁷ “Nyis Eleazer wuod Harun jadolo mondo ogol tepe mag ubani e buch mach, kendo opuk mach man e igi kuma bor, nikech gin gik maler.

³⁸ Adier, tewni mag joma timo richo, mi oyudo kum mar tho ler, nikech osechiwgi e nyim Ruoth Nyasaye. Omiyo nyaka uthedhgi mopamore mondo oumgo kendo mar misango. Ginibed rapar ni jo-Israel.”

³⁹ Kamano Eleazer jadolo nokawo tepe ubani mag mula ma ji mane mach owang’o ochiwo. Ne othedhgi raum mar kendo-mar-misango,

⁴⁰ mondo obed rapar ni jo-Israel ni ng’ato ang’ata ma ok jadolo, kendo ma ok jaka Harun kik wang’ ubani ni Ruoth Nyasaye, nono to otho mana kaka Korah kod joge. Mago duto notimore mana kaka Ruoth Nyasaye nomiyo Musa ochiko Eleazar.

⁴¹ To kinyne oganda duto mar Israel nong’ur ni Musa gi Harun, ka giwachonigi gisemiyo jo Ruoth Nyasaye moko otho.

⁴² E sa mane gichokoree ka ging’ur ni Musa gi Harun, ne giwichore ka gichiko Hemb Romo mi gineno ka bor polo oime, kendo duong’ maler mar Ruoth Nyasaye nothinyore kanyo.

⁴³ Musa gi Harun ne jobiro e nyim Hema,

⁴⁴ kendo Ruoth Nyasaye nowachonigi niya,

⁴⁵ “Chung’uru mabor gi jogi mondo atiekgi dichiel ka diemo wang’!” To ne gipodho piny auma.

⁴⁶ Eka Musa nowacho ni Harun niya, “Kaw tapi mar ubani iketie mach moa e kendo-mar-misango, kendo iolie ubani, mi idhi kode piyopiyo ir oganda mondo ipwodhnigi richogi. Mirima mager mar Ruoth Nyasaye osechopo, kendo tho osechako nego ji.”

⁴⁷ Omiyo Harun nokawo tape mar ubani kaka Musa nochike, mi noringo odhi ir oganda jo-Israel, kendo noyudo ka tho osechako nego ji adier. Ne oketo ubani e tawo, mi opwodho ni ji richogi,

⁴⁸ kochung’ e kind joma osetho gi joma ngima, mi tho norumo.

⁴⁹ To ji alufu apar gang’wen gi mia aboro notho, ka ok kwan joma ne otho nikech ketho mar Korah.

⁵⁰ Kane tho oserumo, Harun nodok ir Musa e dho Hemb Romo.