Kwan 14 - MUMA MALER 2015

Jo-Israel oweyo Ruoth Nyasaye

¹ Kane giwinjo weche jogo, oganda jo-Isarel duto noywak matek otienono duto, ka chunygi lit.

² Giduto ne ging’ur ni Musa gi Harun, ka giwacho niya, “Mad ne watho e piny Misri, kata e thimni!

³ Ere gima omiyo Ruoth Nyasaye okelowa e pinyni mondo watho e lweny, kendo omak mondwa gi nyithindwa? Donge diber ka wadok Misri?”

⁴ Eka ne gimedo wacho niya, “Wayier ng’ato mondo odwokwa Misri.”

⁵ Musa gi Harun ne jopodho piny mana e nyim oganda jo-Israel,

⁶ to Joshua wuod Nun kod Kaleb wuod Jefune, mane gin ji ariyo kuom joma nochengo piny Kanaan, noyiecho lepgi,

⁷ mi owacho ni oganda duto niya, “Piny mane wadonjoe kendo wachengono en piny maber sidang’.

⁸ Ka Ruoth Nyasaye mor kodwa, to obiro terowa e piny maber kendo momewno, mi omiwago.

⁹ To kik uwe Ruoth Nyasaye, bende kik uluor jopinyno, nimar wabiro mwonyogi amwonya. Tipo ma nyocha ogeng’ogi osea, to wan, Ruoth Nyasaye ni kodwa, omiyo kik uluorgi.”

¹⁰ To kar dwokogi, oganda jo-Israel nobwogogi mana ni goyogi mana gi kite, to sano duong’ mar Ruoth Nyasaye nothinyorenigi duto e Hemb Romo.

¹¹ Ruoth Nyasaye nowacho ni Musa niya, “Jogi biro chaya kamano nyaka karang’o? Pod gibiro tamore gena marom nadi, to eka asetimonigi ranyisi mang’eny?

¹² Abiro goyogi gi tuo, bende ok abi kwanogi ka joga. To in gi nyikwayi natimu oganda maduong’ kendo mang’eny moloyogi.”

¹³ To Musa nodwoko Ruoth Nyasaye niya, “A Ruoth Nyasaye, jo-Misri ong’eyo ni in ema nigolo jo-Israel kuomgi gi tekoni iwuon,

¹⁴ kendo gibiro nyiso jo-Kanaan kamano. Gin bende koro gisewinjo ni idak e dier jogi, kendo ni gineni wang’ gi wang’. Ging’’eyo bende ni bor polo mari ochung’ ewi jo-Israel, ka itelonigi e siro mar bor polo godiechieng’, to gotieno itelonigi e siro mar mach.

¹⁵ Kuom mano, ka inego jogi duto rat, to ogendini mosewinjo humbi biro wacho niya,

¹⁶ ‘Ruoth Nyasaye osetieko jogi e thim, nikech kelogi e piny mane osingorenigi otame.’

¹⁷ “Omiyo ma e sa monego inyisie tekoni machal gi weche mane iwacho niya,

¹⁸ ‘Ruoth Nyasaye ok kech piyo, kendo onyiso herane mosiko, koweyo ni ji kethogi gi richogi, to kata kamano ok okwan jaketho ka ng’ama ler, to okumo nyithindo nyaka tieng’ mar adek kod mar ang’wen nikech richo kweregi.’

¹⁹ Omiyo kaka ng’wononi thoth, we ni jogi richogi, mana kaka isetimo, chakre Misri nyaka koroni.”

Nyasaye okumo jo-Israel

²⁰ Ruoth Nyasaye nodwoko Musa niya, “Koro asewuoyonigi kaka ikwaya.

²¹ To kaka antie, kendo kaka duong’na nopong’ piny duto,

²² akuong’ora ni onge kata mana ng’at achiel kuom joma oseneno duong’na kod honni mane atimo e piny Misri kendo e thim

²³ ma none piny mane asingora ni nami kweregi. Gisetema kendo gisetamore winja nyadipar, omiyo onge kata ng’at achiel kuom joma nochayago ma none pinyno.

²⁴ To jatichna Kaleb ema osebedo gi chuny maber, nimar oseluwa gi chunye duto. Kuom mano abiro kele e piny mane osedhiye, mi nyikwaye nokaw. En piny pap, ma jo-Amalek kod jo-Kanaan odakie.

²⁵ Kuom mano, kiny nyaka uwichru, mi udogi e thim, kuluwo yo ma ochomo Nam Makwar.”

²⁶ Ruoth Nyasaye nowacho ni Musa gi Harun niya,

²⁷ “Asewinjo ka jo-Israel ng’urna. Anyalo ng’wono ni oganda marachni nyaka karang’o?

²⁸ Wachnigi ni awacho kakuong’ora ni, Kaka antie, abiro chopo mana weche ma asewinjo kuwacho.

²⁹ Ng’ato ka ng’ato ma nyinge nondiki e kweno cha, chakre jahigni piero ariyo kadhi nyime, chokene biro dong’ e thimni, nikech useng’urna.

³⁰ Onge ng’ato kuomu ma nodonj e piny mane akuong’ora kating’o bada ni nobed maru, to mak mana Kaleb wuod Jefune gi Joshua wuod Nun.

³¹ To nyikwau mane uwacho ni nobed joma omak e lweny ema abiro kelo e piny ma usedagino, mi ginidagie maber.

³² To un uduto, chokeu nodong’ e thim.

³³ Nyithindu biro digni e thim kuom higni piero ang’wen, nyaka ng’atu mogik tho kuno, ka gichulogo richo mane utimo kuom weya.

³⁴ Ne ubet ka urango pinyno kuom ndalo piero ang’wen omiyo unuchul richou kuom higni piero ang’wen, ka higa achiel ikwano kar ndalo achiel, mi unung’e kaka ajok kodu.

³⁵ An Ruoth Nyasaye, asewuoyo, kendo abiro timo ni oganda marach moseriworenani gima asewachono. Gibiro rumo mana e thimni! Adier, ka ema gibiro thoe!”

Jombetre apar maricho otho

³⁶ Joma Musa nooro mondo ocheng piny, kendo mane oduogo mi omiyo oganda duto ochako ng’urne,

³⁷ tho nonego e nyim Ruoth Nyasaye nikech ne gikelo wach marach.

³⁸ To Joshua wuod Nun gi Kaleb wuod Jefune kende ema nokwo kuom joma nodhi chengo pinyno.

Jo-Israel olo Horma

³⁹ Kane Musa onyiso jo-Israel gima Ruoth Nyasaye owacho, ne gimuoch gi ywak.

⁴⁰ To kinyne ne giwuok kogwen, mi gidhi ewi gode mag piny moting’ore, ka giwacho niya, “Wayie ni wasebedo joketho, omiyo koro wan e yo, wadhi kuma Ruoth Nyasaye owacho.”

⁴¹ To Musa nodwokogi niya, “Marang’o umedo ketho chik Ruoth Nyasaye? Tim makamano ok nyal kelo gima ber,

⁴² Kik umed dhi nyime gi wuoth, nimar Ruoth Nyasaye ok nobed kodu, kendo wasiku biro loyou.

⁴³ Jo-Amalek gi jo-Kanaan nie nyimu, kendo gibiro negou. Ruoth Nyasaye ok nyal bedo kodu, nikech useweyo luwe.”

⁴⁴ Kata kamano pod ne gihedhore ahedha idho gode mag piny moting’oreno, to Sandug Muma, kata mana Musa, ne ok owuok kodgi e kambi.

⁴⁵ Jo Amalek gi jo-Kanaan ma nodak e godego nomwomore kuomgi, moriembogi ka rodhogi nyaka Horma.